Kastilja ma tinkisibx b’indirizz ġdid: l-Oppożizzjoni trid turi li lesta tmexxi

Minn Osservatur Politiku

Fil-politika, is-simboli għandhom il-valur tagħhom. Post, indirizz, uffiċċju u l-mod kif partit jippreżenta lilu nnifsu jistgħu jibagħtu messaġġ. Imma l-politika ma titmexxiex bis-simboli biss. U aktar ma partit ikun qed jipprova jikkonvinċi lill-poplu li lest jieħu r-responsabbilta’ tal-Gvern, aktar il-mistoqsija ssir waħda sempliċi: x’għandek x’toffri lill-pajjiż

It-tħabbira li l-operat politiku tal-Kap tal-Partit Nazzjonalista u Kap tal-Oppożizzjoni se jiċċaqlaq minn Pieta’ għal Valletta ġiet ippreżentata bħala pass lejn iċ-ċentru tal-poter politiku, lejn il-Parlament u lejn Kastilja. Huwa messaġġ li għandu s-simboliżmu tiegħu. Imma indirizz ġdid ma jistax jieħu post il-kompitu ferm aktar diffiċli: li tikkonvinċi lin-nies li inti verament lest tmexxi l-pajjiż. Dan huwa l-veru test.

Il-poplu Malti mhux se jkun qed jistaqsi biss fejn jinsab l-uffiċċju tal-Oppożizzjoni. Se jkun qed jistaqsi jekk l-Oppożizzjoni għandhiex il-politiki, it-tim, il-kompetenza u d-dixxiplina meħtieġa biex tmexxi Malta meta jasal iż-żmien.

Wara elezzjoni ġenerali, partit tal-Oppożizzjoni għandu opportunita’ unika. M’għandux biss jikkritika lill-Gvern. Għandu juri x’jagħmel differenti. Għandu jibni kredibbilta’. Għandu jipprepara pjanijiet konkreti. Għandu juri li jaf x’inhuma l-problemi tal-pajjiż u, aktar importanti, li jaf kif isolvihom. Din mhijiex xi ħaġa li tista’ tinbena f’ġurnata.

Il-politika Maltija għaddiet minn snin fejn il-poplu sar aktar esiġenti. In-nies iridu jkunu jafu kemm se tiswa politika, min se jħallas għaliha, x’riżultat se tagħti u f’kemm żmien. Ma għadux biżżejjed li jingħad li se jkun hemm “bidla” jew “bidu ġdid”. Il-poplu għandu dritt jistaqsi: bidla għal xiex?

Fuq l-ekonomija, pereżempju, l-Oppożizzjoni trid tkun kapaċi tispjega x’tip ta’ ekonomija trid għal Malta. Irridu nibqgħu nkejlu s-suċċess primarjament bil-popolazzjoni, bil-ħaddiema u bil-volum tal-attivita’ ekonomika? Jew irridu nimxu lejn ekonomija ta’ produttivita’ ogħla, pagi aħjar, investiment fit-teknoloġija, aktar valur miżjud u kwalita’ tal-ħajja aħjar?

Dawn huma d-deċiżjonijiet li jiddeterminaw jekk partit huwiex lest imexxi.

Fuq il-finanzi pubbliċi, il-mistoqsija hija saħansitra aktar diretta. X’se tagħmel Oppożizzjoni li ssib quddiemha stat b’nefqa dejjem tikber, dejn pubbliku li żdied u pressjonijiet fuq il-finanzi? Se twiegħed aktar mingħajr ma tispjega minn fejn se jiġu l-flus? Jew se jkollha l-kuraġġ tistabbilixxi prijoritajiet u tgħid lill-poplu x’inhu sostenibbli u x’mhuwiex?

Il-poplu jista’ ma jaqbilx ma’ kull proposta. Imma jista’ jirrispetta partit li għandu direzzjoni ċara.

L-istess jgħodd għall-infrastruttura. Malta ma tistax tkompli żżid il-popolazzjoni, il-karozzi, il-bini u l-attivita’ ekonomika mingħajr ma tistaqsi jekk it-toroq, is-sistema tal-enerġija, it-trasport, l-ilma, l-iskart u l-ispazji pubbliċi humiex kapaċi jlaħħqu.

Jekk partit irid ikun Gvern alternattiv, irid ikun kapaċi jgħid x’se jagħmel dwar dan kollu. Mhux biss x’ma jaqbilx miegħu fil-politika tal-Gvern.

Hemm ukoll kwistjoni aktar profonda: it-tim. Li tmexxi pajjiż mhijiex attivita’ ta’ persuna waħda. Hija responsabbilta’ ta’ tim sħiħ. Teħtieġ nies li jafu l-ekonomija, is-saħħa, l-edukazzjoni, l-ambjent, l-enerġija, it-trasport, il-ġustizzja, l-affarijiet barranin u għexieren ta’ oqsma oħra. Teħtieġ nies kapaċi jieħdu deċiżjonijiet, jamministraw riżorsi u jwieġbu għalihom.

Għalhekk, il-preparazzjoni għall-Gvern trid tidher qabel ma partit jidħol fil-Gvern. Għandha tidher fil-mod kif janalizza l-problemi. Għandha tidher fil-proposti li jagħmel. Għandha tidher fil-mod kif jiskrutinizza l-Gvern. U għandha tidher fil-kapaċita’ tiegħu li jammetti meta proposta tiegħu teħtieġ titjib.

Il-kredibbilta’ ma tintalabx. Tinbena. U tinbena bil-ħidma ta’ kuljum.

Il-mossa lejn Valletta tista’ tkun simbolu ta’ ambizzjoni politika. Imma l-ambizzjoni waħedha mhijiex biżżejjed. Il-poplu jrid jara x’hemm wara s-simbolu.

Jekk l-uffiċċju l-ġdid ikun aktar qrib il-Parlament, dan għandu jfisser aktar viċinanza għall-problemi tan-nies, mhux biss aktar viċinanza fiżika għall-bini tal-poter.

Għandu jfisser aktar skrutinju, aktar xogħol fuq il-politika u aktar kuntatt mal-komunitajiet li l-Oppożizzjoni trid tirrappreżenta.

Għax Kastilja ma tinkisibx billi tmexxi uffiċċju eqreb tagħha. Tinkiseb billi partit ikun kapaċi jikkonvinċi lill-poplu li jista’ jamministra l-pajjiż aħjar. U dan huwa proċess li jibda ħafna qabel elezzjoni.

Jibda meta partit jippreżenta viżjoni ekonomika ċara. Jibda meta jkollu pjan serju għall-finanzi pubbliċi. Jibda meta joffri soluzzjonijiet għall-housing, l-enerġija, it-traffiku u l-infrastruttura. Jibda meta jipproponi riformi istituzzjonali li jsaħħu l-fiduċja. Jibda meta juri li jaf mhux biss jikkritika, iżda jieħu deċiżjonijiet.

Malta għandha bżonn Oppożizzjoni b’saħħitha. Imma aktar minn hekk, għandha bżonn Oppożizzjoni li tkun ippreparata.

L-isfida mhijiex li jinbidel indirizz. L-isfida hija li tinbidel il-perċezzjoni. Liċ-ċittadin irid jiġi ppruvat, bil-ħidma u mhux bil-kliem, li wara l-Oppożizzjoni hemm alternattiva serja ta’ Gvern.

Għax meta jasal iż-żmien li l-poplu jerġa’ jivvota, mhux se jkun qed jivvota għal uffiċċju f’Valletta. Se jkun qed jivvota għal min jemmen li jista’ jmexxi lil Malta. U dik hija sfida ferm akbar minn kwalunkwe indirizz ġdid.