Meta Dee Crespo u Repubblika ser imorru jipprotestaw quddiem il-Kurja?

Ittra li rċevejt mingħand resident minn Nadur Għawdex.

Għażiż Dr. Mercieca.

Kemm hi ħaġa sabiħa li meta tkun qed tmexxi istituzzjoni jew komunita’ żżomm id-dixxiplina. Dan ma jfissirx li tkun xi monstru dixxiplinat, imma turi li kull dover irid isir u kull obbligu jrid jintgħamel. Meta min imexxi jkun dixxiplinat miegħu nnifsu u juża d-dixxiplina ma ħaddieħor, ikun hu stess qed jagħti l-eżempju u ma jkollux għalxix jinkwieta meta jiddixxiplina lil xi ħadd min-nies ta’ taħtu. Kull tmexxija għandha tkun eżemplari u ma għandiex tagħmel preferenzi. Dan qed ngħidu għall-istituzzjonijiet anke tal-Knisja, u b’mod partikolari knisja f’Malta mmexxija mill-Arċisqof Charles Scicluna.

Kulħadd irid jaqdi d-doveri tiegħu u ħadd ma jista’ jkun ta’ eżempju ħażin għall-oħrajn. Jiddispjaċini ngħid li jiena vittma ta’ din id-dixxiplina ħażina tal-Knisja Maltija. U b’li qed tagħmel il-knisja f’Malta qed tkompli titfa’ l-melħ fuq il-ferita’ li l-istess knisja kkreat lili u lill-familja tiegħi.

Inti ġieli rrimarkajt li persuna li hija marbuta mat-tribunal tal-Knisja qed jidher b’mod regolari fi protesti kontra l-gvern fil-ħin li normalment assoċjat max-xogħol. Wieħed jista’ jkollu l-leave jew l-istituzzjoni tippermetti dan. Biss mhux dan hu l-iskop ta’ din l-ittra.

Meta din il-persuna jkollha kariga għolja fit-tribunal tal-knisja u tidher fi protesti pubbliċi tkun qed tagħti eżempju tajjeb jew ħażin? Dan qed nitkellmu fuq istituzzjoni tal-Knisja u ma niddejjaqx ngħid li fl-opinjoni tiegħi qed tibgħat messaġġ ħażin.

L-arċisqof għandu jara li dawn il-messaġġi kontrastanti jieqfu u ma jsirux iżjed. Kif għidt qabel jien vittma ta’ dawn il-messaġġi kontrastanti tal-Knisja Maltija. Il-Knisja trid tieqaf tibgħat sinjali ħżiena lis-soċjeta’. Mhux ser nidħol fil-mertu tal-protesti. Biss persuna qrib ħafna tal-Arċisqof Scicluna, li għandha pożizzjoni għola qed titkellem fil-pubbliku fuq protesti ta’ livell politiku. Din il-persuna marret takkompanja lill-President ta’ l-għaqda Repubblika, meta dan mar jippreżenta ittra lill-President tal-Partit Laburista fejn talab it-tkeċċija ta’ Joseph Muscat mill-Partit Laburista. Hawn qed nirreferi għal Alessandra Dee Crespo. Din Dee Crespo terġa’ tmur ma’ Robert Aquilina biex tippreżenta din l-ittra fil-kwartieri tal-Partit Laburista fil-Ħamrun.

Biss Dee Crespo taf li l-partner tal-Maġistrat Rachel Montebello, l-avukat Patrick Valentino, spiċċa mqabbad mill-arċisqof Scicluna biex ikun l-abbati ta’ propjeta’ li l-knisja Maltija kellha f’Għawdex, eżattament fin-Nadur? Ara meta aħna r-residenti tan-Nadur, tlabna biex wieħed minnha jkun magħżul bħala l-abbati, il-knisja qaltilna le. Forsi ma għoġobnihiex lill-knisja għax aħna missieri u ommijiet tal-familja miżżewġin bis-sagrament taż-żwieġ u b’hekk ma stajniex nikkwalifikaw għall-knisja Maltija! Il-Knisja Maltija ma riditx li tagħżel lil ħadd minnhom bħala amministratur ta’ din il-propjeta’.

Illum aħna vittma u ħadd ma jipprotesta għalina. Ma taħsibx Dee Crespo, bħala l-President midluk ta’ Repubblika, u fuq kollox il-kanċillier fit-tribunal tal-qorti tal-knisja li tirregola ż-żwieġ li saret inġustizzja magħna? Għalhekk Repubblika għandha tipprotesta favur tagħna. Żgur li l-mod kif imxiet il-kurja magħna ma kienx l-aktar mod idoneo ta’ kif il-knisja tamministra l-artijiet tagħha. Fuq kollox, jekk forsi aħna ridna inħallsu xi ħaġa biex wieħed minnha jkun jista’ jintgħażel bħala l-abbati biex jieħu ħsieb din il-propjeta’ konna lesta li nagħmlu ġabra bejnietna u nħallsuha lill-Knisja f’Malta.

Imbagħad il-qassisin u l-patrijiet qed igorru għaliex in-nies qed tonqos milli tmur il-knisja! Din mhix knisja ta’ Alla. Din hija knisja tan-negozju. Meta membri ta’ istituzzjoni importanti, bħal ma hija l-knisja, jibdew jibgħatu dawn il-messaġġi u jippermettu nies għolja tagħhom li jagħmlu li jridu bil-fors li nies bħali, li dejjem konna wara l-knisja nibdew ntilfu l-fidi. Ilum għajnejn il-Maltin u l-Għawdxin huma miftuħin aktar milli qatt kienu qabel. B’hekk jekk Dee Crespo u Repubblika jridu jkunu kredibbli, organizzaw protesta quddiem il-kurja tal-Arċisqof minħabba l-mod kif, aħna, residenti fin-Nadur, ġejja ttrattati f’din il-kwistjoni kollha. Ma tħoss Alessandra Dee Crscpo li din hija qarnita’ oħra li wieħed għandu jipprotesta kontra tagħha?

Ir-ragħaj spiritwali tagħna f’Għawdex qed jagħmel ħafna. Biss nibża li x-xogħol tiegħu ser jiġrilu bħal dak ir-raġel li qed jibni id-dar tiegħu r-ramel, għaliex finalment is-sisien qegħdin f’Malta. U dawk li llum qegħdin jipprotestaw qed ikunu selettivi fuq liema qarnita’ jitkellmu. Mhux verament jinteressahom joqtlu ras il-qarnita li jien u l-familja tiegħi konna vittma tagħha, anzi din lesta u qed takkomodhom tajjeb ħafna.

Tislijiet

NN