Joseph Muscat ma jistax jilminta mis-sistema ġuridika li ħoloq hu stess

Minn osservatur politiku

‘Malta tagħna lkoll’. Hekk kien jistqarr Joseph Muscat u b’dik il-għajta kisser lill-Partit Nazzjonalista fl-2013. Dik kienet il-mantra li rebħitu l-Gvern lil Muscat u li għaqdet moviment Laburista li ħa t-tmexxija tal-Gvern b’maġġoranza li qatt ma rajna bħalha.

Imma llum l-istess Joseph Muscat irid jirrejalizza li la Malta tagħna lkoll, anke l-ġudikatura hija tagħna lkoll. Illum Muscat irid jirrejalizza li l-ġustizzja hija wkoll tagħna lkoll. Fuq kollox, kien Muscat stess li ħoloq din is-sistema ġuridika li issa qiegħed jitkellem kontra tagħha.

Issa jrid jirrejalizza li jekk jiġi mixli b’xi ħaġa ħażina li seta’għamel irid, bħal kull Malti u Għawdxi ieħor, jikkonvinċi li hu ma kellu ħtija ta’ xejn. U dan irid jagħmlu quddiem maġistrati li aktar iwa milli le nħatru bis-sistema li daħħal hu stess.

Għalhekk kull aspett fil-ħajja huwa tagħna lkoll. Mela għalhekk seta’ jibbrilla fil-gawdjuż u llum irid ikompli jikkonvinċi fid-doloruż. Ma jistax ikun li kemm Muscat kif il-Prim Ministru tal-ġurnata jibqgħu għaddejjin bil-mantra li l-Laburisti qed jiġu provokati. Din hija xi ħaġa li bħalissa qed tissemma’ ħafna imma mhux sewwa għax kull Malti u Għawdxi jkun irid jara l-mexxejja tagħhom dejjem iġibu lil Malta qabel kollox u mhux jaħsbu fihom infushom.

Kemm Joseph Muscat kif ukoll Robert Abela hemm bżonn li jħallu l-ġustizzja tagħmel xogħolha. Hemm bżonn li jħallu lill-ġudikatura taħdem fil-liberta’ li għandha tant bżonn. Hemm bżonn li nieqfu nattakkaw lil kull min ma jaqbilx magħna. Hemm bżonn li jieqfu jgħidu li qed jiġu attakkati l-Laburisti kollha.

Mhux il-Laburisti kienu fit-tmexxija tal-Gvern. Mhux il-Laburisti jridu jippruvaw li huma nnoċenti. Imma mid-dehra ser taqa’ fuq eks-mexxej tagħhom li jrid jipprova l-innoċenza tiegħu. Fuq kollox, dan il-prinċipju li trid tipprova l-innoċenża tiegħek kontra l-prinċipju li kellna li l-ġustiżżja trid tipprova li inti ħati ġie mbuttat minn Muscat u sħabu. Ara issa, għax qed jingidmu qed jgħidu li mhux sew. Meta ngidem ħaddieħor, ħadd ma ħareġ jgħid li mhux sewwa.

Huma l-ftit fil-Partit Laburista li jridu jnaddfu isimhom jekk hemm għalfejn inaddfuh. Imma skont il-ġudikatura jidher li hemm bżonn ta’ tindif serju fi ftit kapurjuni tal-Laburisti.

Id-diskors kemm ta’ Muscat kif ukoll ta’ Abela huwa pjuttost perikulużi. Il-qorti ma hi qed tipprovoka lil ħadd. Il-qorti qed tagħmel xogħolha. Huma dawn iż-żewġ mexxejja li qed isaħħnu l-irjus. Huma dawn iż-żewġ mexxejja li qed jippruvaw jieħdu r-raġun meta jafu li biex jagħmlu dan iridu jitnaddfu mill-allegazzjonijiet li huma għaddejjin.

Dan it-tindif ma jistax isir bil-paroli imma mid-dehra ser ikun hemm bżonn li jersqu quddiem il-ġustizzja biex jiddefendu jsimhom u jiċċaraw dawn l-allegazzjonijiet kollha. Joseph Muscat u l-Prim Ministru jridu jirrealizzaw li l-ġustizzja ma taħfirha lil ħadd u jkun inutli li jippruvaw joskuraw membri tal-ġudikatura għax kien hemm żvilupp kontra tagħhom.

Dawn iż-żewġ protagonisti jridu jifhmu li l-liġijiet huma wkoll tagħna lkoll u allura kull liġi tista’ tintuża biex jiġi analizzat jekk hemmx xi ħaġa ħażina f’kull individwu Malti u Għawdxi u jekk tinstab xi ħaġa ħażina kulħadd jieħu dak li ħaqqu. Dak hu s-sabiħ li tgħid li Malta tagħna lkoll għax kulħadd jiġi stmat l-istess.