Jum il-Missier

Minn Osservatur Politiku

Kull sena, fit-tielet Ħadd ta’ Ġunju, niċċelebraw Jum il-Missier – ġurnata ddedikata biex nagħrfu u napprezzaw il-kontribut tal-missirijiet u ta’ dawk kollha li jaqdu rwol ta’ missier fil-ħajja ta’ tant nies. F’Malta wkoll, Jum il-Missier huwa mmarkat bħala okkażjoni biex nagħtu ġieħ lil dawk il-persuni li ħafna drabi jagħmlu tant sagrifiċċji fis-skiet, mingħajr ma jfittxu tifħir jew rikonoxximent.
Meta nitkellmu dwar il-missier, ħafna drabi jiġu f’moħħna memorji personali. Xi wħud jiftakru f’missier li qatt ma naqas milli jkun hemm meta kien hemm bżonn. Oħrajn jiftakru f’parir sempliċi li baqa’ magħhom għal ħajjithom kollha. Hemm min jiftakar f’ħidma bla waqfien biex il-familja ma tonqosha xejn. U hemm ukoll dawk li llum iħarsu lura b’nostalġija lejn missier li m’għadux magħna iżda li ħalla marka li qatt ma titħassar.
Il-verita’ hija li r-rwol tal-missier inbidel ħafna matul is-snin. Darba, il-missier kien meqjus primarjament bħala dak li jipprovdi l-għajxien għall-familja. Kien il-persuna li taħdem barra d-dar filwaqt li l-mara tieħu ħsieb il-familja. Illum, il-ħajja hija differenti. Il-missier modern mhux biss jipprovdi finanzjarjament, iżda huwa wkoll preżenti fit-trobbija, fl-edukazzjoni u fil-ħajja emozzjonali tat-tfal tiegħu.
Naraw missirijiet li jwasslu t-tfal l-iskola, li jattendu attivitajiet sportivi, li jgħinu fix-xogħol tal-iskola, li jqattgħu ħin ta’ kwalita’ mal-familja u li jieħdu sehem attiv fid-deċiżjonijiet kollha li jolqtu lit-tfal tagħhom. Din hija bidla pożittiva li saħħet il-familja Maltija.
Fil-fatt, diversi studji internazzjonali matul is-snin komplew juru kemm il-preżenza attiva tal-missier għandha impatt pożittiv fuq l-iżvilupp tat-tfal. Tfal li jikbru b’relazzjoni soda ma’ missierhom ħafna drabi jiżviluppaw aktar kunfidenza fihom infushom, aktar stabbilta’ emozzjonali u kapaċitàa’ aħjar li jiffaċċjaw l-isfidi tal-ħajja.
Iżda Jum il-Missier għandu jfakkarna wkoll li l-missier ma jkunx perfett. Bħal kull bniedem, jagħmel l-iżbalji tiegħu. Jgħaddi minn mumenti ta’ dubju. Jiffaċċja pressjonijiet. Jinkwieta dwar il-futur tal-familja tiegħu. Ħafna drabi jġorr piżijiet li ma jurihom lil ħadd.
Forsi għalhekk ħafna missirijiet qatt ma jfittxu r-rikonoxximent. Jemmnu li qed jagħmlu sempliċement dak li għandu jsir. Iżda proprju għalhekk Jum il-Missier huwa importanti. Għax ifakkarna li anke dawk li jagħtu tant lill-oħrajn għandhom bżonn kelma ta’ apprezzament.
F’soċjeta’ li kultant tkun mgħaġġla wisq, li dejjem għaddejja minn impenn għall-ieħor, faċli ninsew nesprimu gratitudni lejn dawk li kienu dejjem hemm għalina. Xi kultant ma hemmx bżonn rigali kbar. Ma hemmx bżonn ċelebrazzjonijiet elaborati.
Kelma sinċiera ta’ “grazzi” tista’ tfisser ħafna aktar. Telefonata. Żjara. Tgħanniqa. Mument ta’ ħin flimkien. Dawn huma l-affarijiet li ħafna missirijiet japprezzaw l-aktar.
Jum il-Missier huwa wkoll okkażjoni biex niftakru f’dawk il-missirijiet li llum qed jaffaċċjaw sfidi partikolari. Missirijiet li qed jippruvaw ilaħħqu mal-għoli tal-ħajja. Missirijiet li qed jaħdmu sigħat twal biex jipprovdu għall-familja tagħhom. Missirijiet li qed irabbu tfal waħedhom. Missirijiet li qed jieħdu ħsieb membri tal-familja morda jew anzjani.
Spiss ma narawx dawn l-isfidi. Iżda huma reali. U huma xhieda tal-kuraġġ u d-dedikazzjoni li ħafna missirijiet juru kuljum.
Hemm ukoll dimensjoni oħra li ma għandhiex tintesa. Mhux kulħadd għandu l-privileġġ li jiċċelebra ma’ missieru. Għal xi wħud, Jum il-Missier huwa jum ta’ tifkira. Jum li jqajjem emozzjonijiet differenti. Jum li fih jiġu mfakkra dawk li ħallewna.
Iżda anke f’dawn il-mumenti hemm ċertu sbuħija. Għax tfakkarna li l-imħabba ta’ missier ma tintemmx meta tintemm il-ħajja tiegħu. Tibqa’ tgħix fil-valuri li jgħaddi lil uliedu, fil-prinċipji li jgħallimhom u fl-eżempju li jħallilhom.
Forsi aktar minn qatt qabel, il-familja għandha bżonn missirijiet preżenti. Mhux biss fiżikament. Iżda emozzjonalment. Missirijiet li jisimgħu. Missirijiet li jiggwidaw. Missirijiet li jagħtu eżempju. Missirijiet li jgħallmu r-rispett, l-onesta’, il-ħidma u l-kompassjoni.
Għax il-bini ta’ soċjeta’ b’saħħitha jibda mill-familja. U familja b’saħħitha ħafna drabi tkun mibnija fuq il-preżenza ta’ missier li jħobb, li jieħu ħsieb u li jmexxi bl-eżempju.
Jum il-Missier għandu jfakkarna wkoll li l-akbar wirt li missier jista’ jħalli mhux wieħed materjali. Mhux il-proprjeta’. Mhux il-ġid. Mhux il-possedimenti. Iżda l-valuri. L-integrita’. Il-karattru. L-imħabba lejn il-familja. L-impenn lejn dak li hu tajjeb. Dawn huma l-affarijiet li jibqgħu għal dejjem.
Illum, mela, nagħtu ġieħ lill-missirijiet kollha. Lil dawk li għadhom qed irabbu familja. Lil dawk li saru nanniet. Lil dawk li servew bħala missirijiet mingħajr qatt ma kellhom tfal tagħhom. Lil dawk li għaddew minn diffikultajiet kbar iżda baqgħu sodi għall-familja tagħhom. U lil dawk li llum m’għadhomx magħna iżda li l-memorja tagħhom tibqa’ tgħix f’qalb dawk li ħabbewhom.
Għax fl-aħħar mill-aħħar, missier tajjeb ma jitkejjilx bil-ġid li jakkumula jew bil-kariga li jokkupa. Jitkejjel bl-imħabba li jagħti. Bis-sagrifiċċji li jagħmel. Bil-ħin li jiddedika. U bil-ħajja li jgħin biex jibni.
F’dan Jum il-Missier, ejjew nieqfu għal mument u ngħidu kelma sempliċi iżda qawwija lill-missirijiet tagħna: Grazzi. Grazzi talli kont hemm. Grazzi tas-sagrifiċċji tiegħek. Grazzi tal-imħabba tiegħek. U grazzi talli għent tibni l-persuna li jien illum.