Tajjeb li l-Oppożizzjoni tibda tistaqsi jekk hux veru li dan il-gvern qed jagħti numru ta’ konsulenzi lil nies li l-unika kwalifika tagħhom hija li huma kanvassers ta’ xi Ministri.

Bħalissa għaddejja l-kontroversja, li qed tmexxi l-media kontra Rosianne Cutajar fuq konsulenza li ngħatat mill-Istitut tat-Turiżmu. Il-partit Nazzjonalista, għaliex hu mmexxi mir-repubblikini waqa’ fin-nassa. Illum Rosianne Cutajar hija sempliċi deputata indipendenti u naħseb dan l-attakk fuqha mhux li ser jagħmel ġid lill-PN. Anzi ser iġibilha s-solidarjeta’ tad-Diehard Labours.

Dak li ħareġ hu l-mod xejn tajjeb kif wieġeb il-Prim Ministru meta qal li fuq dan il-każ, wieħed għandu jipponta subajgħ lejn Konrad Mizzi.

Imma hawn fejn il-media qed tilgħab logħba kerha u l-Oppożizzjoni kull darba taqa’ fiha. Għaliex il-media ma tistaqsix dwar konsulenzi oħrajn f’ministeri oħra tal-gvern?

Jekk wieħed jaqra dak li nkiteb f’The Times, wieħed jieħu l-impressjoni li l-Prim Ministru ried lil Rosianne Cutajar titlaq mill-Partit u mill-grupp parlamentari minħabba din il-konsulenza. Tajjeb.

Imma għala l-media ma tistaqsix dwar numru ta’ Ministri ta’ Robert Abela li qed jagħtu konsulenzi? Wieħed jiddubita dwar l-expertise tagħhom u fuq kollox il-livell ta’ edukazzjoni li għandhom.

Dan is-sit kiteb li Duminku tan-Naxxar kien qed jaħdem favur il-kampanja ta’ Robert Abela meta mar jitkellem in-Naxxar. Sa hawn ma hemm xejn ħażin. Imma tista’ l-Oppożizzjoni jew il-media tistaqsi jekk dan il-canvasser ta’ Clayton Bartolo għandux xi konsulenza ukoll mill-Ministeru tat-Turiżmu li b’kumbinazzjoni huwa tal-istess Bartolo?

L-istess jista’ jinghand għal Guża Cassar, delegata tal-Labour għall-Għawdex. Jistgħu l-ġurnalisti jew membri Nazzjonalisti fil-Parlament jistaqsu jekk din tagħtix xi konsulenza lill-Ministru ta’ Għawdex Clint Camilleri u jekk iwa, kemm qed titħallas?

Jew il-media qed tistaqsi mistoqsijiet fuq Rosianne Cutajar għax taf li ma għandix x’titlef imma fuq ministri oħra ma tistaqsix għaliex inkella titlef il-pappa?

Jekk dan huwa l-każ, allura dan li qed naraw huwa l-anti-etika ġurnalista. Dan mhux biss mhuwiex etiku, imma jmur kontra l-etika nnifisha.

Fuq kollox jekk skont r-rapport tal-NAO Rosianne Cutajar, li għandha background ta’ edukazzjoni – għaliex anki kienet għalliema – ma kellhiex l-expertise, aħseb u ara nies li jitħallsu ta‘ konsulenti u l-anqas għandhom “O” level kemm għandhom expertise fil-qasam tagħhom. Imma dwar dawn in-nies, il-media tal-ġusti u tar-rule of law qatt ma tikteb xejn. Min jaf għaliex?