Għaliex lil min għażlu ma laħaqx l-aspettattivi tagħhom, ir-Repubblichini qed jgħidu li mhux parti mill-PN

Minn osservatur politiku

Skont dak li qal Robert Aquilina, l-eks-President tal-għaqda tar-Repubblichini, f’intervista li kellu mal-gazzetta Illum, ‘l-appoġġ elettorali għall-Partit Nazzjonalista jrid jaħdem għalih il-Partit Nazzjonalista’. Skont dak li ddikjara l-eks-president qatt ma kellhom l-iskop biex jgħinu lil xi partit jew ieħor biex iżid l-appoġġ elettorali tiegħu. Skont Aquilina dak mhux ir-rwol tagħhom.

Imma kulħadd jiftakar kemm kien hemm indħil minn din l-istess Għaqda biex jitwarrab Dr Adrian Delia. Ilkoll niftakru kemm faħħru lil Daphne Caruana Galizia talli qalet li ser tattakka lil Dr Delia fuq l-istess livell li attakkat lil Joseph Muscat. Ma hu ebda sigriet li din il-għaqda kienet kontra t-tmexxija ta’ Dr Delia u għinet kemm felħet lill-klikka tal-Blue Heroes biex jottjenu r-riżultat mixtieq, dak li jġagħlu lil Adrian Delia jirriżenja.

Dawk l-attakki min-naħa tar-Repubblichini baqgħu għaddejjin sa kemm il-Blue Heroes sabu l-mod kif iwarrbu lil Delia. Tara d-differenza li l-attakk ma baqax isir meta t-tmexxija tal-Partit Nazzjonalista biddlet l-idejn. Kellhom aġenda ċara li riedu jwarrbu lill-kap ta’ dak iż-żmien biex jitpoġġa ieħor li kien ser jitkellem u jfaħħar kemm jiflaħ lill-għaqda tar-Repubblichini.

Dawn huma sitwazzjonijiet fejn dawk in-Nazzjonalisti ferventi ma jistgħux jinsew. Ħadd ma għandu d-dritt li jinsa minn xhiex għaddew lill-kap partikulari tal-Partit Nazzjonalista. Ma jistax ikun li jintnesa kemm intilef żmien f’attakki pwerili li servew biss biex inbidel il-wiċċ tat-tmexxija. Imma ġara li lil min għażlu ma laħaqx l-aspettattivi tagħhom. Imma l-attakk tar-Repubblichini fuq il-kap kurrenti sfumaw ħafna u ma kienux diretti fuq il-persuna.

Robert Aquilina jrid jammetti li l-għaqda tar-Repubblichini kienet u għadha b’saħħitha ma’ diversi pampaluni fil-Partit Nazzjonalista. Nafu min huma dawn il-pampaluni li ma kienux jitilfu okkażżjoni waħda biex juru wiċċhom fil-viċin tat-tmexxija ta’ din l-Għaqda. Illum l-attakki tar-Repubblichini jidhru li huma kollha fuq esponenti tal-Partit Laburista u wieħed irid jaċċetta l-fatt li r-Repubblichini qed jagħmlu ħafna ħsara lill-Partit fil-Gvern.

Imma Robert Aquilina jaf li dak li għamlu r-Repubblichini qed jaffettwa lill-Partit Nazzjonalista. Trid tkun iblah biex ma taċċettax il-fatt li dawk viċin tal-għaqda tar-Repubblichini jiffluwenzaw ħafna lil diversi persuni fit-tmexxija tal-Partit Nazzjonalista. Għalhekk huwa daqsxejn frivolu meta Aquilina jgħid li jekk il-Partit Nazzjonalista jrid javvanza fl-akkwist tal-voti jrid jaħdem għalih l-istess Partit u mhux jistenna lil l-għaqda tar-Repubblichini biex taħdem għalih.