Deputati ġodda jridu joqogħdu ħafna attenti x’jiktbu fuq Facebook għax jistgħu juru li ngħataw karigi li ma jafu xejn dwarhom

Id-deputat il-ġdid Nazzjonalista, Darren Carabott tella’ post fuq Facebook wara li Bernard Grech appuntah ic-Chairperson tal-Kumitat tal-Kontijiet Pubbliċi tal-Parlament. Deputati ġodda, bħal Darren Carabott, jridu joqogħdu attenti x’jiktbu għax juru li ser ikunu qed imexxu kumitati imma ma jafux kif jaħdmu dawn il-kumitati tal-parlament.

Fil-bidu ta’ dan il-post Darren Carabott kiteb hekk

“Ġejt afdat biex immexxi u nkun Chairperson tal-Public Accounts Committee – irwol li jġib miegħu responsabbilta’ kbira. Dan hu l-uniku kumitat parlamentari li l-Oppożizzjoni għandha maġġoranza fuqu”.

Hawnhekk qed jgħaddilna messaġġ li hu ser ikun qed imexxi l-kumitat tal-kontijiet pubbliċi u skond Carabott l-Oppożizzjoni għandha l-maġġoranza fuqu. Dan juri li Darren Carabott qatt ma segwa dan il-kumitat. L-oppożizzjoni ma għandha l-ebda maġġoranza fuq l-ebda kumitat tal-Parlament. Il-maġġoranza qegħda dejjem f’idejn il-gvern.

Wisq inqas f’dan il-kumitat li ser ikun qed imexxi. Kull ma għandha l-Oppożizzjoni fuq il-kumitat hija t-tmexxija, jiġifieri li c-chairperson tiegħu jinħatar mill-Oppożizzjoni. Dan il-kumment jitfa’ dell ikrah kemm din il-persuna hija idoneja biex tmexxi kumitat bħal dan li jġorr miegħu ċertu importanza fil-parlament?

Li huwa tajjeb f’dan kollu huwa l-fatt li tneħħa għal kollox Beppe Fenech Adami li spiċċa għamel farsa mil-kumitat tal-kontijiet pubbliċi. Konna spiċċajna naraw dramm tal-waħx kull darba li jiltaqa’ dan il-kumitat. Issa ser ikollna prinċipjant li nispera li minn issa, u allura qabel jibda jiltaqa’ l-parlament, imur jistudja b’ċerta attenzjoni l-istanding orders dwar dan il-kumitat u jipprova jifhem x’inhu mitlub minnu bħala Chairman ta’ dan l-istess kumitat parlamentari.

Nissuġġerilu li jara u jsegwi sew il-Parlament Ingliż ħalli jitgħallem tajjeb kif jaħdem il-Parlament Malti.

Qed ngħid dan għaliex Darren Carabott suppost li kellu training politiku tajjeb minn għand sħabu Claudio Grech u Austin Gatt.

Nispera u nittama li jipprepara ruħu tajjeb għax jispiċċa bill-membri tal-Gvern jiekluh qabel jibda.