Għal li jista’ jkun il-Prim Ministru Robert Abela qed ikun rikattat politikament minn Randolph Debattista?

F’dawn il-jiem, Rosianne Cutajar kienet fl-aħbarijiet. Imma meta s-soltu, din id-deputata tkun fl-aħbarijiet minħabba dak li jgħidu fuqha r-Repubblichini, din id-darba kienet fl-aħbarijiet minħabba dak li qal Randolph Debattista.

Fuq l-istazzjon tal-Kurja, Randolph Debattista qal li biex Rosianne Cutajar tiġi lura fil-Partit Laburista trid titlob skuża. Hawn, Debattista kien qed jitkellem bħala ċ-CEO tal-Partit Laburista. Din l-istqarrija ġiet wara li l-istess Randolph Debattista u l-partner tiegħu kienu ilhom itellgħu messaġġi fuq Facebook li kienu qed jinqraw bħala botti lill-prim ministru.

F’sitwazzjoni politika normali, meta jiġri hekk, iċ-CEO tal-Partit jintalab jirreżenja. F’dan il-każ ġara bil-maqlub. Mhux talli ma ntalabx jirreżenja talli l-istess prim ministru għamel tiegħu dak li qal Randolph Debattista. B’hekk Robert Abela spiċċa jgħid li biex Rosianne Cutajar tiġi lura fil-Partit Laburista, għandha l-ewwel titlob skuża. Dan wassal biex attivista tal-Partit Laburista, l-avukat Anna Malla ttella’ dan il-post li jgħid hekk:

Imma dak li huwa stramb huwa kif il-prim ministru jagħmel tiegħu kliem ta’ persuna li ftit ilu kien qed jagħmel stqarrijiet politiċi li f’sitwazzjoni normali, kap tal-partit jitolbu jirreżenja. Fuq kollox, dawn l-istqarrijiet ta’ Robert Abela spiċċaw boomerang politiku kontra tiegħu għaliex l-attenzjoni mxiet minn fuq Rosianne Cutajar għal fuqu bħal mal-post ta’ Jason Azzopardi u David Casa jixhdu. Huma qed jgħidu kif il-prim ministru jitlob apoloġija mingħand xi ħadd, meta hu kellu fejn jagħmel apoloġija u ma għamilhiex.

Għalhekk wieħed jikkonkludi li din l-imġieba politika tal-Prim Ministru hija stramba ħafna. Normalment imġieba bħal din isseħħ meta jkollok prim ministru li qed ikun rikattat politikament.

Hu fatt magħruf li Randolph Debattista, bħala CEO tal-Partit Laburista jaf ħafna sigrieti li jekk jinħarġu barra, jistgħu jimbarazzaw politikament lill-istess prim ministru. Fuq kollox, il-partner ta’ Randolph Debattista kellu storja kerha ta’ revenge porn u fuqha qatt ma intalbet skuża. Anki din l-istorja kienet marbuta ma’ rikatt. Għalhekk wieħed jistaqsi jekk il-prim ministru hux qed ikun irrikattat politikament. Dak li qed iseħħ fl-istorja politika bħalissa fih xamma’ ta’ rikatt.