Ħafna deputati qed jitkellmu fil-magħluq kontra Bernard Grech u jgħidu li għandu jitlaq

Minn osservatur politiku

Id-deputati stess li Bernard Grech imbotta biex ikunu fil-Partit Nazzjonalista issa qed jitkellmu kontrih. Issa dawn qed jingħaqdu ma’ deputati oħra aktar anzjani u qed jgħidu li jkun jaqbel li jinbidel il-kap tal-Partit Nazzjonalista kemm jista’ jkun malajr. Ħafna deputati Nazzjonalisti qed jibżgħu li l-Partit Nazzjonalista ser ikun qed jaffaċċja sitwazzjonijiet oħrajn imbarazzanti meta f’Ġunju jsiru l-elezzjonijiet tal-Parlament Ewropej u tal-Kunsilli Lokali.

B’hekk qed nisma’ diversi deputati li qed jgħidu li hemm bżonn li Bernard Grech iżarma ħalli forsi l-partit jibda’ jaqbad art. Dan qed jgħiduh fil-magħluq imma issa saret ħafna importanti li diskors bħal dan jibda’ jingħad fejn jitwassal il-messaġġ ċar li hemm bżonn ta’ kambjamenti fit-tmexxija tal-Partit Nazzjonalista.

Donnu t-tmexxija tal-Partit tinsab f’pożizzjoni antipatika ħafna li ser jibqgħu jtawwlu d-deċiżjoni tagħhom, li jafu li trid tittieħed, għad-dannu tal-istess partit. Donnu ser jibqgħu mdendlin bl-aspettattiva ta’ Roberta Metsola li tiġi hawn Malta biex tieħu t-tmexxija tal-partit hi.

Metsola għamlet suċċess kbir bħala President tal-Parlament Ewropew. Imma dan ma jfissirx li ser tkun ukoll ta’ suċċess fit-tmexxija ta’ Partit lokali. L-isfidi huma totalment differenti u s-suċċess ta’ waħda ma jfissirx suċċess awtomatiku għall-oħra.

Lanqas huwa tajjeb li l-Partit Nazzjonalista jibqa’ għaddej minn dan l-isfreġju kollu u dan biex nistennew Metsola x’ser tagħmel wara li jgħaddu l-elezzjonijiet tat-8 ta’ Ġunju. Kulħadd jaf li Metsola għandha ċans tajjeb li tibqa’ President. Allura l-Partit Nazzjonalista ser jibqa’ mdendel sa’ x’ħin naraw il-futur ta’ Metsola x’ser ikun. Ma jistax il-Partit ifittex kap ieħor u jieħu r-rigni f’idejh u Metsola jkollha ċ-ċans kollu tiddeċidi sa wara l-elezzjoni ġenerali li jmiss.

Jagħmel ħafna iktar sens għall-Partit Nazzjonalista li janalizza s-sitwazzjoni prekarja li jinsab fiha llum u jiddeċidi l-futur tiegħu mingħajr ebda stennija ta’ xi messija. Iktar ma qed jgħaddi ż-żmien iktar qed tidher ċara li l-Partit Nazzjonalista ma għandux it-tama li jnaqqas il-vantaġġ elettorali jew b’xi mod jersaq viċin lejn il-Partit Laburista. Stħarriġ wara l-ieħor qed juri li d-distakk għadu qawwi u b’Bernard Grech kap ma hemmx ċans li ser ikun hemm xi tibdil.

Allura wieħed jistaqsi, it-tmexxija tal-Partit huma lesti li jsoffru telfa oħra minħabba l-fatt li ma humiex lesti li jieħdu deċiżjoni ta’ bdil ta’ Kap. Donnu l-Partit daħħal f’rasu li jilgħab il-waiting game u joqgħod jistenna l-manna taqa’ f’ħalqu. Imma din mhix strateġija li ser twassal għall-Partit Nazzjonalista li jkun b’saħħtu fl-elezzjoni ġenerali li jmiss li fuq kollox hija l-akbar sfida li partit politiku jiffaċċja.