Xi darba jeħtieġ li jibda jimpurtana wkoll min-nies.

Minn Edwin Vassallo

It-tbatija tan-nies teħtieġ li tkun f’moħħ min jieħu d–deċiżjonijiet. Ma jistax jkun li ċentru tas-saħħa jingħalaq minħabba li fuqu hemm bżonn li jsir xi xogħol u mbagħad dan ix–xogħol jieħu aktar ħin milli jkun previst.

Il–Malta Today tatna l–aħbar li ser ikun irrangat iċ–Ċentru tas–Saħħa ta’ Ħal Qormi. B’hekk dan iċ-Ċentru ser jingħalaq u n–nies ser ikollhom jużaw ċentri oħra fost dawk ta’ Birkirkara. Sa hawn ma hemm xejn ħażin. Imma din hija aħbar tajba. Mela għala qed nikteb? Qiegħed nikteb biex ikun evitat li jerġa’ jiġri l-istess kif kien ġara meta sar xogħol fuq iċ–ċentru tas–saħħa f’Birkirkara. Ix–xogħol fuq dan iċ-ċentru dam ma tlesta u tlesta ħafna wara ż-żmien stipulat. Dan wassal biex ġiet ikkreata tbatija żejda lil min kien juża dan iċ–ċentru tas–saħħa. Kienet esperjenza li għexuha min ġarrabha. Nies li kienu jinqdew minn Birkirkara kellhom jiġu l–Mosta jew imorru Mater Dei. Ġenituri ta’ tfal jiġru minn ċentru ta’ saħħa għall-ieħor.

Illum dawn iċ–Ċentri tas-Saħħa qed jkollhom ħafna xogħol. Kważi aħjar jiżdiedu u mhux jonqsu jekk irridu naraw li nnaqqsu mill–pressjoni fuq Mater Dei. Għalhekk qed nikteb biex fil–każ taċ–Ċentru ta’ Ħal Qormi, ma tkunx ripetuta l–istess storja ta’ dewmien bħaċ–Ċentru tas–Saħħa ta’ Birkirkara. Fuq kollox, dan il–gvern għandu record li jdum ma jlesti l–proġetti tiegħu. Dan is–sit kiteb kif proġetti ta’ housing soċjali, fosthom dawk fis–Siġġiewi għadhom ma tlestux. Dan ix–xogħol mhux xahar qiegħed lura, imma snin. Ma jistax jiġri l-istess fil-qasam tas-saħħa.

Mela l–gvern għandu jara li min jieħu l–kuntratt ikun kapaċi jispiċċa x–xogħol fil-ħin stipulat. Jekk hemm bżonn, dawk li jieħdu l-kuntratti jibqgħu għaddejjin bix–xogħol anki fil–weekends. Qiegħed nikteb hekk għaliex meta jiġi ppjanat ix–xogħol, ftit huma dawk l–awtoritajiet li jieħdu konsiderazzjoni u jaħsbu fil-ħtigijiet tan–nies, tal-ġenituri jew tal-anzjani. Dawn qed ikollhom jiġru minn ċentru għal ieħor biex jieħdu l–kura li jkunu qed ifittxu. B’hekk, huwa mportanti li x–xogħol iżomm mal–iskeda prevista. Ma nistgħux nibqgħu niġu naqgħu u nqumu mill-weġgħat u t-tbatija tan-nies.

Bil-kliem “għaliex x-xogħol irid isir” ma nistgħux nittraskuraw il-vittmi tad-deċiżjonijiet li jittieħdu. Donnu li dan il-gvern jimpurtah biss li jara x-xogħol isir. Din ma fiha xejn ħażin, imma daqstant ieħor għandu jara li x–xogħol isir fil-ħin stipulat. Ma jistax ikun li fil–qasam tas-saħħa, u f’kull qasam ieħor, il-gvern ma jimpurtahx mill-impatt li x-xogħol iħalli fuq il-klijent jew il-persuna li tiddependi minn dan is-servizz.

Xi darba jeħtieġ li jibda jimpurtana wkoll min-nies.