Esklussiva: qed nippubblika l-kontenut tal-ittra li Patrick Dalli kien waddab lejn il-Prim Imħallef minħabba l-każ ta’ ibnu

Din hija l-ittra kollha li kien tefa’ Patrick Dalli fil-qorti tal-appell lejn il-Prim Imħallef. Qed nippubblikaha kif kitibha mingħajr ċensura ta’ xejn.

“Il-ġustizzja iffejljatu lit-tifel – Justice has failed my son.

Il-qorti għandha tgħaddikhom ġuri fuq it-tortura mentali li eżerċitajtu kontra ibni. Kawża fuq 6 pirmli sharing damet għaxar snin. Erbgħa imħallfin u maġistrat irrifjutaw l-isfilzar ta’ statement ta’ ibni, imma mbagħad f’dawn l-aħħar sentejn. min qatel jew inqabad b’kilos ta’ droga, l-istatements tiegħu ġew kollha sfilzati mill-ewwel.

Il-Maġistrata Natasha Galea Sciberras twaħħlu 3 xhur ħabs wara 8 snin, sempliċiment għaliex emmnet id-dikjarazzjoni ta’ wieħed mill-ispetturi. Fis-sentenza tagħha hija qalet li t-tifel għen ħafna lill-pulizija, kixef lil min tah il-pirmli, kellu clean record, u l-ammont ta’ droga kien żgħir wisq. U lil dan l-individwu li ta l-pirmli lit-tifel sfilzawlu l-istatement, ħareġ liberat u l-avukat tal-kuruna ma appellax. Dan ma hux sewwa. Għaliex waħħaltu 3 xhur ħabs lit-tifel? Dawn affarijiet li ma jitwemmnux!

Il-Maġistrata Natasha Galea Sciberras damet sena u nofs biex tagħtih is-sentenza. Iddiferitha darbtejn. Timmaġinaw titla’ għas-sentenza darbtejn u tgħidlek diferita? Għandi informazzjoni, jekk hi vera, li int (jiġifieri l-maġistrata) għidt lil xi ħadd ħabib tiegħek u quote, “waħħaltu 3 xhur ħabs biex imbagħad jappella u joħroġ liberat”. Tinnega? Din hi l-ġustizzja f’dan il-pajjiż? Din ħniżrija f’isem il-ġustizzja. Ara kemm għajruh il-gazzetti li hu drug dealer minħabba fik. Tifel ta’ 18-il sena. Kissirtulu ż-żogħżija tiegħu. Min hi l-id moħbija wara dan kollu?

U int l-avukat tal-kuruna, għaliex bqajt tappella sa llum li sentenza ma tinbidilx meta inti ma appellajtx minn sentenza ta’ mhux ħati minn min lit-tifel qal li tah id-droga u ħafna oħrajn b’każijiet simili. U għaliex? Minħabba l-ġurnalisti? Min hi l-id moħbija wara dan kollu?

L-Imħallef Ian Spiteri Bailey, bniedem ultra-konservattiv, bla kuxjenza u eks-kandidat Nazzjonalista, ma sfilzax l-istatement, għax qal li t-tifel kellem lill-avukat qabel ma daħħal l-istatement; allura, irraġuna li kellu avukat miegħu. Argument tal-ġungla. Kien hemm oħrajn li kellmu l-avukat qabel ma daħħlu l-istatement u l-istatements ġew kollha sfilzati. Għaliex tat-tifel le? Imissek tistħi. Taf li damu sagħtejn jinterrogawh u qatt f’għomru t-tifel ma kellem pulizija jew daħal ġo xi għassa. L-imħallef Ian Spiteri Bailey qal li ma kkonvinċihx li hu vulnerabbli. Taf xi tfisser vulnerabbli sur duttur tal-liġi? Kellu 18-il sena biss meta sar il-każ. Veru li mort tgħid li kellek tibla’ d-droga biex ktibt is-sentenza? Min kien qed jiġri warajk? Minn min kont qed tibża? Min hi l-id moħbija wara dan kollu?

F’dawn l-aħħar sentejn, kull statement li sar mingħajr avukat kollha sfilzawhom. Għaliex tat-tifel le? X’hemm moħbi?

U peress li aħna tlabna għall-isfilzar tal-istatement, għaliex kellek tikkonferma li s-sentenza ta’ ħabs kienet korretta? B’liema dritt ikkummentajt meta ma kienx kompitu tiegħek? L-appell kien fuq l-isfilzar biss. Domna 4 xhur oħra nistennew is-sentenza. Qataha kontra. Immaġinaw dan it-tifel. Min hi l-id moħbija?

L-Imħallef Consuelo Scerri Herrera li kull kas li deher quddiemha sfilzatu, lagħbitu lit-tifel tul il-kawża kollha, meta qaltli f’messaġġ li kelmet l-avukat ġenerali fuq il-każ tat-tifel, meta fil-fatt kienet qed taħdem kontra t-tifel għaliex meta ġiet il-kawża tal-appell quddiemha irrikużat ruħha. Tal-blieħ. In the first place, min qallek tindiegħes magħna? Għamilt hekk għax ridt l-għajnuna minn għandna. Għinik. Fejn fil-fatt irringrazzjajtna kemm-il darba.

Jekk dawn l-affarijiet ma jġegħlukx taħseb li parti mill-qorti hija mafja u mażunerija, xi provi jista’ jkollok iżjed? Ittorturawh lit-tifel. Għandkom qalb sinjuri dutturi tal-liġi, qed insaqsikom bħala missier li jħobb lill-uliedu, ma ħallasx għall-għemilu ibni? Dawn it-torturi kollha li qegħdin tagħtuh lilu u lilna l-familjari.

Qed niddikjara minn issa li jekk jiġrilu xi ħaġa bl-inġustizzja li qed timxu miegħu naħlef li nżommkom responsabbli. Ara ma taħsbux li għandkom id-dritt divin fuqna għax tkunu żbaljati. Morna quddiem il-qorti kostituzjonali, quddiem 3 imħallfin. Reġgħu rrifjutaw li jisfilzaw l-istatement. Domna 4 xhur u nofs nistennew s-sentenza. Għaliex? Min hi l-id moħbija?

Int sur prim imħallef, mela ma għadekx disgustat bid-deċiżjoni li ħa Spiteri Bailey? Hu veru li hekk mort tgħid? U x’ġara issa? Inbidel kollox. X’hemm fin-nofs? Min ġagħlek tibdel fehmtek?

Min hi l-id moħbija? U lilek Tony Ellul, wieħed mill-imħallfin, mhux biżżejjed urejt il-ħdura tiegħek lejn familti meta jiena nirbaħ l-ikbar libel li qatt intrebah fil-qorti Maltija deċiż mill-wisq abbli Maġistrat Dr. Franco Depasquale, illum Imħallef. Int dawwartu ta’ taħt fuq fl-appell għax jien Laburist u għax il-kawża kienet kontra Caroline Muscat. U issa? Issiġillajt il-ħdura tiegħek lejn ibni. Min hi l-id moħbija?

Il-qorti għandha tgħaddi lilkom ġuri u takkużakhom b’aġir ta’ tortura mentali istituzzjonalizzata li tista’ tinbotta għal suwiċidju bl-inġustizzja tagħkom.

Hija ħasra li hemm maġġoranza kbira ta’ maġistrati u imħallfin serji u ta’ integrita’ kbira li jiġu mtappna minn dawn il-ftit li l-għan tagħhom hija l-ħdura, it-tpattija politika u l-vendikazzjonijiet għax mingħalihom ma jista’ għalihom ħadd.

Istħu.

Shame.