Il-qorti tikkonferma storja oħra ta’ gideb ta’ Daphne Caruana Galizia kontra Adrian Delia u ta’ The Times jibqgħu b’ħalqhom magħluq dwar din l-istorja.

Bħalissa, The Times qed tippubblika numru ta’ artikli biex tgħolli l-profile ta’ Daphne Caruana Galizia mal-poplu Malti b’aġenda ċara minħabba li wasal il-ġuri ta’ Yorgen Fenech u dan ser ikun ġuri jaħraq ħafna.

Imma nispera li The Times tippubblika kollox li kitbet Daphne Caruana Galizia. Ġa kelli okkażżjoni nfakkar fl-artikli kollha ta’ mibegħda li Daphne Caruana Galizia kienet tikteb kontra l-Laburisti u n-nies tas-South. Magħhom, wieħed irid iżid l-artikli kollha gideb kontra Adrian Delia biex tkissru. Infakkar li Daphne Caruana Galizia kienet tikteb li Adrian Delia huwa involut fil-prostituzzjoni u anki fit-traffikar tad-droga.

Infakkar li b’mod selettiv, Daphne Caruana Galizia kienet toħloq stejjer biex tkisser lil Adrian Delia u taġevola lil tal-establishment, jiġifieri l-klikka li kienet magħmula mill-fazzjoni ta’ Richard Cachia Caruana u ta’ Austin Gatt. Fil-fazzjoni ta’ Austin Gatt kien hemm persuni bħal Claudio Grech u Manuel Delia. F’dik ta’ Richard Cachia Caruana kien hemm u għad hemm persuni bħal Karol Aquilina u Beppe Fenech Adami u David Casa.

Nispera ma jkunx hemm min jgħidli li għandi bżonn għajnuna psikjatrika jekk għax nikteb li Daphne Caruana Galizia kienet tagħmel minn kollox biex tiffomenta l-mibgħeda kontra Adrian Delia ħalli tkissru minn kap tal-Partit Nazzjonalista, bħal ma kienet din l-istorja li ħa flus li ma kellux dritt għalihom. Din l-istorja kienet tikkonċerna lil Boris Arcidiacono. Arcidiacono spiċċa anki mar l-qorti kontra l-HSBC li kienet hija li talbet li Adrian Delia jitħallas tax-xogħol li għamel.

Issa llum għandna din l-aħbar fil-Malta Today marbuta ma’ din l-istorja li kienet ippubblikat Daphne Caruana Galizia. Il-qorti tgħid li Adrian Delia kellu dritt għal dawk il-flus bħala ħlas ta’ xogħlu. Mela bil-provi, Daphne Caruana Galizia kienet użat storja biex tigdeb fuq Adrian Delia ħalli tkissru.

Illum wara dawn is-snin kollha Adrian Delia ingħata raġun mill-qorti. Issa għandna sentenza li fiha qed jingħad li Adrian Delia kellu raġun jieħu l-flus li ħa bħala ħlasijiet u ma kien hemm xejn ħażin f’dan kollu.

L-iżball li għamel Adrian Delia, għax raġel ta’ qalb tajba, kien li waqqa’ l-libelli li fetaħ kontra Daphne Caruana Galizia. Mela, kif Adrian Delia kien ingħata raġun fuq tal-Vitals, illum qed jingħata raġun fuq stejjer oħra. Infakkar li kien hemm pulizija li tkeċċa għaliex għadda storja falza lil Daphne Caruana Galizia dwar storja li Adrian Delia kien qed jittraffika d-droga f’Tal-Ħandaq Ħal Qormi. Din l-istorja falza nkitbet meta Adrian Delia kien qed jiġġieled il-korruzzjoni fl-isports.

U min jaf kemm għad irid jingħata raġun fi stejjer qarrieqa oħra li kitbet din il-mara fuqu. Din kitbithom sempliċiment biex ma jsirx jew ma jibqax kap. Għaliex biex tkun kap tal-partit Nazzjonalista trid il-barka tal-establishment u hija kienet il-Goebbels ta’ dan l-establishment.

Daphne Caruana Galizia kienet ħolqot storja mżejjna dwar propjeta fl-Londra li Adrian Delia kien biss avukat tas-sid tagħha. Dan is-sid ma kien ħadd ħlief missier ir-raġel ta’ oħt Simon Busuttil. Imma mbagħad Daphne Caruana Galizia kien jinteressaha biss tkisser lil Adrian Delia u taqdi lill-establishment.

Sadanittant, illum ta’ The Times tellgħu artiklu ieħor selettiv mill-kitbiet ta’ Daphne Caruana Galizia. Fi kliem ieħor, The Times qed toqgħod attenta x’artikli tipproduċi biex tgħolli l-profile ta’ Daphne Caruana Galizia imma mbagħad silenzju fuq xi storja bħal din li ilha li ġiet deċiża mill-qorti u li fiha wriet kemm l-artikli ta’ Daphne Caruana Galizia kontra Adrian Delia kienu foloz u politikament motivati.