Konferenza stampa tal-PN li aħjar ma saret xejn

Minn osservatur politiku

Għadna kif kellna konferenza stampa mill-Partit Nazzjonalista fejn rajna tliet uċuh li mingħajr dubju kulħadd jafhom sewwa. Huma tliet deputati li huma magħrufin aħjar bħala tlieta mill-famużi blue heroes li għamlu l-ħajja tal-eks-kap tagħhom infern. Huma tliet deputati marbutin mar-Repubblichini.

Mela dawn it-tlieta min-nies kienu fost numru ta’ deputati oħra li ddeċidew li għandu jitneħħa kap ta’ partit għaliex ma rieduhx iżjed minħabba l-ambizzjonijiet personali tagħhom. Dawn it-tlieta min-nies ma huma ħadd ħlief Karol Aquilina, Ryan Callus u Mark Anthony Sammut.

Dawn kienu bnew in-narrattiva dak iż-żmien fuq dak li kien intqal minn Jason Azzopardi. Azzopardi kien qala’ minn żniedu ħafna dubji fuq l-andament ta’ Adrian Delia bħala kap. Dawn it-tlieta rikbu fuq il-karru ta’ Azzopardi u tar-Repubblichini u kienu minn ta’ quddiem biex mexxew ir-rewwixta kontra l-kap tagħhom stess.

Jidher li l-Partit Nazzjonalista ma tgħallem xejn minn din l-istorja. Fl-istrateġija jew in-nuqqas tagħha, reġa’ poġġa fuq quddiem lil dawn it-tliet deputati biex flimkien imexxu konferenza fejn ikkritikaw lill-Gvern dwar t-tibdil fil-liġi biex jiġi appuntat il-Kummissarju tal-iStandards fil-Ħajja Pubblika. Dan għamilha faċli għall-Partit Laburista biex ikisser il-messaġġ politiku tagħhom.

Din hija t-tip ta’ strateġija li l-Partit Nazzjonalista għandu jevita għaliex din titfa’ dubji fuq it-tmexxija u tikkonferma kif dan l-istess partit għadu maħtuf, bħal ma kien f’dawn l-aħħar snin, minn din il-klikka li min għalihom li l-Partit Nazzjonalista ħallihulhom fil-wirt xi familjari tagħhom.

B’hekk preżenza bħal din tittieħed bħala konferma jew sinjal pjuttost qawwi li din l-imbierka klikka jew kif inhu magħruf ukoll, l-establishment, għadhom jaħsbu u jiddettaw l-aġenda tal-Partit Nazzjonalista. Dan meta bħalissa hemm kap li suppost li ilu li qered din in-narrattiva li għamlet tant ħsara lill-Partit Nazzjonalista.

Dawn it-tliet Repubblichini miġburin flimkien biex jagħtu din il-konferenza stampa bagħtu messaġġ ħażin lill-elettorat. Infatti, il-konferenza tagħhom ma ħalliet l-ebda effett. Din hija l-problema kbira li qed ikollu l-Partit Nazzjonalista meta jressaq lil dawn in-nies. Hawn fejn l-istrateġija mhux qed taħdem. L-istorja tal-abort għandha tiftaħ għajnejn lill-istrateġisti ta’ dan il-partit. Għax ir-Repubblichini huma favur l-abort, baqgħu barra minn din il-ġlieda. X’ġara? Din il-ġlieda qed tintrebaħ minn dawk li huwa favur il-ħajja! Jekk hemm xi ħaġa li tgħaqqad lill-Laburisti u lil ħafna Nazzjonalisti hija l-ismerrija li dawn għadhom lejn ir-Repubblichini.

Ovvjament, mhux qed ngħid li dawn id-deputati ma għandhomx jagħtu konferenzi stampa f’isem il-Partit Nazzjonalista. Dażgur li għandhom. Imma tlieta tar-Repubblichini flimkien itellef kull effett tajjeb li jista’ jkollha konferenza stampa bħal din, kif fil-fatt ġara. Dan għaliex, kif spjegajt, dawn it-tlieta min-nies flimkien bilfors ifakkruk f’dak il-perjodu ikrah li għadda minnu l-Partit Nazzjonalista li suppost qed tingħata l-impressjoni li dak żmien li għadda. Imma mid-dehra, ir-Repubblichini għad għandhom interess li jsostnu l-preżenza tagħhom fil-Partit Nazzjonalista. B’konferenza bħal din uriet l-interess li jibgħatu messaġġ lill-partitarji Nazzjonalisti li l-klikka għadha b’saħħitha fil-Partit Nazzjonalista. Din kienet il-vera raġuni għal din il-konferenza stampa saret aktar milli biex ikun ikkritikat l-istess gvern.

Għalhekk din l-istrateġija mhux ser iġġib voti lill-PN.