Il-Partit Nazzjonalista irid l-ewwel jispjega kif sar dan id-dejn kollu tiegħu qabel ma jitkellem fuq l-infieq irresponsabbli tal-gvern

Minn osservatur politiku

Il-Partit Nazzjonalista permezz tal-media tiegħu NET News qalilna li

“Il-gvern għandu jispjega infieq irresponsabbli ta’ fondi pubbliċi”.

Naqblu. Huwa importanti li kulħadd ikun sorveljat ta’ kif jonfoq il-flus fdati f’idejh.

Imma jista’ l-istess Partit Nazzjonalista barra li jipponta subgħajh għal infieq li qed jagħmel il-Gvern minn flus il-poplu jgħid lis-sostenituri tiegħu kif il-Partit għamel tant infieq żejjed li tella’ d-dejn għal €32 miljun?

Fil-fatt NET News ikompli jgħidilna li

“l-Kelliem għall-Amministrazzjoni Pubblika, Darren Carabott u l-Kelliem għax-Xogħol, Ivan Castillo f’isem il-Partit Nazzjonalista saħqu li trid tintrefa’ responsabbiltà għal min qed jagħmel użu ħażin tal-fondi pubbliċi li qiegħda twassal f’instabilità u inċertezza għall-eluf ta’ familji ta’ impjegati mas-settur pubbliku, u fl-istess waqt tfisser allokazzjoni u nefqa ħażina tal-fondi pubbliċi – flus in-nies”.

Għal darba oħra nikkonferma li naqbel ma’ dak li qalu ż-żewġ kelliema f’isem il-Partit Nazzjonalista. Imma meta naqra dawn id-dikjarazzjonijiet mill-ewwel niftakar fis-sitwazzjoni finanzjarja prekarja li jinsab fiha l-Partit Nazzjonalista.

Dan iwassal biex in-nies u l-partitarji jgħidu u jisħqu min ser jerfa’ responsabbilta’ għall-użu ħażin tal-fondi tal-Partit Nazzjonalista għax din is-sitwazzjoni qed twassal f’instabilita’ u inċertezza għall-eluf ta’ sostenituri tal-Partit Nazzjonalista. Fl-istess waqt, dan id-dejn ifisser allokazzjoni u nefqa ħażina tal-fondi tal-Partit Nazzjonalista – jiġifieri l-flus tat-tesserati.

Huwa importanti li qabel ma jaraw kif ser isolvu l-problema finanzjarja akuta li għandu l-Partit jaraw, janaliżżaw u jinvestigaw kif, meta u min wassal biex il-Partit Nazzjonalista għandu €32 miljun dejn. Qabel mal-partit jitkellem fuq il-finanzi tal-pajjiż, irid jara li l-finanzi tiegħu huma fis-sod.

Il-Partit Nazzjonalista, permezz ta’ NET News,

“jappella wkoll sabiex mill-aktar fis possibbli, il-Gvern jispjega b’mod ċar f’liema setturi u/jew dipartimenti qiegħda ssir din in-nefqa ħażina kemm għall-finijiet ta’ trasparenza sħiħa u kif ukoll sabiex iserraħ l-imħuħ ta’ eluf ta’ impjegati inkwetati wara dan żvelat”.

Anke dan jgħodd tajjeb għall-Partit Nazzjonalista għaliex mill-aktar fis possibbli, dan il-Partit għandu jispjega b’mod ċar min huma dawk is-setturi (nies) li għamlu dan l-infieq ta’ miljuni ta’ Euro. Dan jagħmluh kemm għall-fini ta’ trasparenza sħiħa u kif ukoll sabiex iserraħ l-imħuħ ta’ eluf ta’ tesserati u ta’ dawk l-impjegati ta’ Media Link li jinsabu inkwetati wara dak li żvela Dr Bernard Grech.