Bernard Grech juża x-xandir pubbliku biex ikeskes lill-ħaddiema kontrija minħabba l-kritika li qed nagħmel lit-tmexxija tiegħu

Illum Bernard Grech kien fuq il-programm ta’ Saviour Balzan Xtra. Mingħajr ma semmieni b’ismi, imma b’referenza ċara għalija, huwa uża dan il-programm biex jattakkani u jgħid li jien qed nipperikola l-jobs tal-ħaddiema tal-Partit Nazzjonalista. Dan hu dak li qal Bernard Grech u kif ġie rrappurtat mill-news tal-PBS.

Kulħadd irid jifhem li waqt li qed jikteb fuq Facebook, għax fettillu jitfa’ t-tajn jew jattakka biex juri kemm jaf, għax huwa l-ikbar analista tal-politika, jifhem li waqt li qed jikteb qed ikompli jagħmel ħsara lill-partit, qed ikompli jipperikola l-paga tal-ħaddiema u tal-familji tagħhom.

Ma hemmx dubju li meta qed jitkellem fuq l-ikbar analista tal-politika, dan qed jirreferi għall-kitba tiegħi. Jien qatt ma għidt li jien l-ikbar analista, biss nirriggrazzjah ta’ dan il-kumpliment.

Imma nixtieq infakkar lil Bernard Grech li jekk hemm persuna li pperikola l-ħobża ta’ kuljum tal-ħaddiema Nazzjonalisti kien hu.  Infakkar lil Bernard Grech li hu daħħal numru ta’ diretturi u tahom salarji astronomiċi u ma ġabux ir-riżultati meħtieġa waqt li baqa’ jħallas lill-ħaddiema biċ-ċiċri.

Nixtieq ngħid lil Bernard Grech li hu jinsab maħruq għaliex kien dan is-sit li kixef li l-id leminija tiegħu, Ray Bezzina spiċċa jaħdem mad-db Group. Huma dawn l-affarijiet li jipperikolaw ix-xogħol tal-ħaddiema. Infakkar lil Grech, li lil Ray Bezzina tah salarju ta’ aktar minn 40,000 euro fis-sena. U mbierek Alla, wara l-elezzjoni jmur direttur ma’ wieħed mill-aktar gruppi diskussi fil-qasam tal-kostruzzjoni.

Infakkar lil Bernard Grech li jien kont nisma’ dan it-tip ta’ diskorsi li qed jagħmel illum hu, fis-sebgħinijiet u tmenijiet minn Dom Mintoff. Dak kien jgħid li min jikkritika lill-gvern qed ixewwex u jipperikola l-ħobża tal-ħaddiema. Dan kien jagħmlu biex ikeskes lill-ħaddiema, primarjament industrijali kontra l-Partit Nazzjonalista u ħafna nazzjonalisti kienu jiġi vvittimizzati u jkollhom id-djar attakkati minħabba dan it-tixwix.

Dan it-tip ta’ diskors jikxef li Bernard Grech mhux ġej minn qafas jew background Nazzjonalista imma minn wieħed Mintoffjan. Anzi ħa l-affarijiet negattivi ta’ Mintoff, l-attakki fuq in-nies. Jekk trid timita lil Mintoff, għall-inqas imitah fuq it-tajjeb li għamel.

Jien nista’ nassigura lil Bernard Grech li ser nibqa’ għaddej nikteb. Mhux ser nibdel il-mod li bih nikteb. It-tixwix qatt ma beżżagħni. Issa nispera li PEN toħroġ tikkritika lil Bernard Grech, għaliex din hija theddida għad-demokrazija u għall-ġurnaliżmu ħieles. Din hija theddida għal kull minn lest jikkritikah jew jikkritika l-azzjonijiet politiċi tiegħu.

Il-Kap tal-PN se jqabbad esperti biex jiggwidawh dwar id-dejn tal-partit