It-taħdidiet sigrieti bejn il-ministru tal-affarijiet barranin Ċiniż u l-kap tas-sigurta’ tal-Whitehouse f’Malta jikkonfermaw li newtralita’ għadha relevanti għall-pajjiżna

Sa ftit tal-jiem ilu, dan il-gvern ta’ Robert Abela ried ibellgħaha lil kulħadd li n-newtralita’ ma għadx għandna bżonn tant li wżat l-okkażżjoni tat-8 ta’ Settembru biex iwassal dan il-messaġġ li l-klawsola tan-newtralita’ għadda żmienha u Malta għandha tissieħeb fi blokk militari. Il-blokk militari ma ssemmiex b’ismu. Imma kulħadd jaf li dan il-blokk militari huwa dak tan-NATO. Dan hu l-uniku blokk militari li għadu jeżisti llum.

Issa lbieraħ, il-ġurnali barranin, primarjament dawk Amerikani, tawna l-aħbar tal-laqgħa li saret f’Malta bejn Jake Sullivan u Wang Yi. Jake Sullivan huma l-konsulent tas-Sigurta’ Nazzjonali tal-Istati Uniti. Wang Yi hu l-ministru tal-Affarijiet Barranin Ċiniż. Din il-laqgħa qed tkun diskritta bħala ta’ suċċess diplomatiku kbir ġewwa l-Amerika minħabba l-implikazzjonijiet tagħha fuq ir-relazzjonijiet bejn iċ-Ċina u l-Amerika. U din il-laqgħa saret f’Malta grazzi għall-ħidma diplomatika tal-Ministru tal-Affarijiet Barranin Ian Borg.

Imma dak li għandu jingħad li din il-laqgħa ma kienetx tkun posssibbli li kieku Malta ma kienetx pajjiż newtrali u kieku Malta kienet fin-NATO. Taħsbu li ċ-Ċiniżi kienu ser jaċċettaw li jiltaqgħu ġewwa pajjiż li kien membru tan-NATO. Jien ma naħsibx. Laqgħat bħal dawn dejjem isiru f’pajjiżi newtrali.

Infakkar li Dom Mintoff kien l-ewwel mexxej tal-Punent li rrikonoxxa liċ-Ċina bħala stat Sovran u beda r-relazzjonijiet diplomatiċi ma’ l-istess Ċina. Infatti Malta stabbilit relazzjoni maċ-Ċina qabel l-Amerika. Dan il-fatt, iċ-Ċiniżi ma nsewh qatt.

Għalhekk il-mexxejja passati, kemm Nazzjonalisti u Laburisti qablu li Malta għandha tkun newtrali. Illum il-mexxejja li għandna, kemm Nazzjonalisti u Laburisti, qed jaqblu u jimbuttaw l-idea li Malta ma’ għandhiex tibqa’ newtrali għaliex in-newtralita’ għadda żmiena. Ftit tal-jiem wara li saret dikjarazzjoni solenni li n-newtralita’ għadda żmien iseħħ dan l-avveniment internazzjonali kbir li juri kemm in-newtralita’ għal Malta għadha valida u hija importanti.