L-inġustizzja fil-penzjonijiet ma’ dawk li twieldu qabel l-1962 trid tissewwa.

Minn osservatur politiku.

Iż-żewġ partiti l-kbar kellhom subgħajhom imbill fil-fonti ta’ diskriminazzjoni fis-settur tal-pensjonijiet. Matul is-snin u eżattament fl-2006 jew 2007 il-Gvern Nazzjonalista kien għamel din ir-riforma fuq il-pensjonijiet. Il-Gvern Laburista ta’ wara kien implimenta. Mela t-tnejn kienu nvoluti f’din l-inġustizzja.

Għax huwa diffiċli biex wieħed jaċċetta l-fatt li llum fl-2023, għandek pensjonanti li twieldu qabel 1961 li jieħdu €300 (kull erba’ ġimgħat) inqas minn dawk il-pensjonanti li twieldu fl-1962 jew wara. Dawn huma pensjonanti li matul is-snin għixu fl-istess pajjiż, xtraw l-istess bżonnijiet u nefqu flus fl-istess ħwienet. Mela kif jista’ jkun li sal-lum għadha teżisti din id-diskriminazzjoni.

X’tort għandhom dawk il-pensjonanti li twieldu qabel fl-1961 jew qabel? Issa qed jingħad li din ir-riforma ser terġa’ tiġi studjata jew iċċekkjata. Imma meta ser isir dan l-eżerċizzju? Ma jistax ikun li fiż-żminijiet tal-lum hemm pensjonanti li jibqgħu jieħdu flus f’idejhom inqas, dan kollu għax għandhom iżjed età. Imma dawn xorta ħadmu għall-pensjoni tagħhom. Xorta ħallsu kemm kienu obbligati jħallsu. Allura għalfejn din id-differenza?

Minn dak rapurtat hemm mad-90,000 li qed jintlaqtu minn din id-diskrimanazzjoni. Mela issa la din l-istorja reġgħet sabet ruħha fuq l-aġenda nazzjonali x’ser jagħmel il-Gvern biex inaddaf din l-inġustizzja? Ma tantx għadna smajna wisq diskors minn naħa tal-awtoritajiet tal-Gvern dwar din il-kwistjoni. Lanqas il-politiċi, speċjalment fuq in-naħa tal-Gvern, ma tantx tawha importanza. Imma din xi ħaġa urġenti għax il-pensjonant illum qed jgħix u llum għandu bżonn dawk il-flejjes li jidhru li huma tiegħu bi dritt.

Nisperaw li meta jinqara l-budget tas-sena d-dieħla nisimgħu li l-Gvern beda jirranġa din l-anomalija. Huwa ż-żmien idoneu li din l-inġustizzja titwarrab u tibda ssir ġustizzja li ilha dovuta għal diversi snin.