Aktar ma’ kollox sar jiswa l-flus, aktar il-bniedem sar ma jiswa xejn.

Minn Edwin Vassallo

The Shift News tagħtina storja dwar triq f’Ħad-Dingli. F’din it-triq Joseph Portelli bena appartamenti u dawn qegħdin għall-bejgħ. Ovvjament, jekk l-appartamenti jkunu ta’ Portelli, dawn ser jispiċċaw, aktar minn ta’ ħaddieħor, fuq il-media. Imma biex tkompli tagħqad, it-triq fejn inbnew dawn l-appartamenti kienet fl-imgħoddi suġġetta għall-kontroversja. Meta Ian Borg kien ministru risponsabbli minn Transport Malta ried din it-triq b’saħħa kbira. Wieħed irid jiftakar li Ian Borg hu minn Ħad-Dingli u Ħad-Dingli huwa fid-distrett tiegħu.

Meta Ian Borg ried jiftaħ din it-triq, kien hemm minn qal li wara dan il-proġett kien hemm l-ispekulazzjoni. Illum x-Shift news qed juri li hemm propjeta’ għall-bejgħ li għadha l-anqas hija koperta’ bil-permessi tal-bini.

Bħal ma jiġri dejjem u f’kull żmien, wara kull proġett ta’ ftuħ ta’ toroq, ifaqqsu proġetti għall-bini. Wiehed jiftaħ it-triq u l-ieħor jibni. Dik hija biċċa xogħol normali u nista’ ngħid li dejjem hekk kienet. Imma llum, dawn il-proġetti qed iġibu mitt mistoqsija aktar mill-imgħoddi. Hawnhekk il-mistoqsija hija li mhux biss din it-triq kienet suġġett ta’ kontroversja, imma wkoll li bini li nbena fuqha huwa wkoll suġġett ta’ kontroversja.

Tajjeb jew ħażin, illum ma hemmx proġett li jsir minn dan il-gvern li ma joħloqx xi biċċa negozju. Hekk saret il-ħajja. Naf li dejjem kienet hekk, imma llum din saret kultura. Fi kliem ieħor, in-nies qed jaraw f’kull proġett tal-gvern, bħala proġett li warajh hemm biċċa negozju.

B’hekk, din l-istorja torbot ma’ dak li ktibt fuq il-Facebook page tiegħi ftit tal-jiem ilu, “waqt il-prova kollox”. F’din il-paġna Facebook ktibt “flus, flus u flus u kull ma jsir għall-flus”. Iva din mhux xi ħaġa t’issa, iżda issa, f’dawn iż-żminijiet, tal-għaġeb kif kull ma jsir irid b’xi mod jinbidel fi flus. Għalhekk inżid ngħid li llum ma jsir xejn jekk mhux għall-flus. Mhux ta’ b’xejn li l-volontarjat qed imut f’pajjiżna. Dak li hu nkwetanti huwa l-fatt li llum aktar minn dari, “aktar ma kollox sar jiswa’ l-flus, aktar il-bniedem sar ma jiswa xejn”.