L-istrateġija fil-qasam tas-saħħa għandha tkun dik li jkun reġenerat l-isptar ta’ San Luqa.

Minn osservatori politiku

Ma jistax ikun li l-poplu Malti u Għawdxi ma jiftakarx kuljum fis-serqa kbira li saret f’dak li suppost kien investiment fis-settur tas-saħħa ta’ pajjiżna. Ma jistax ikun li ninsew id-diffikultajiet li qed jiffaċċja Mater Dei minħabba li ma għandux wisgħa biex jilqa’ l-pazjenti li qed jirrikorru għandu għall-għajnuna.

Issa li l-kawża ta’ Adrian Delia ntrebħet u l-isptarijiet għaddew għand il-Gvern il-poplu qed jistenna li l-Gvern jibda’ jindirizza l-veru investiment fl-isptarijiet Maltin u Għawdxin. Hemm bżonn li l-Gvern jibda’ jara kif ser jiġġenera l-isptar San Luqa ħalli jkun ta’ għajnuna lill-isptar Mater Dei li qed iwerżaq għal din l-imbierka għajnuna. Dan ser ikun ta’ bżonn minħabba ż-żieda fil-popolazzjoni ta’ pajjiżna.

Kulħadd jaf li għad hemm l-appell għaddej imma aħna nistennew li l-Gvern jibda’ jurina kemm jista’ jkun malajr kif ser jixpruna l-investiment fis-settur tas-saħħa. Ma jistax ikun li jibqgħu jintilfu l-ġranet. Diġa’ rajna tmien snin ta’ ħela ta’ ħin fejn l-investiment waqaf għal kollox għax ma sar xejn. Il-pazjent ma jistax jibqa’ jistenna li jingħata servizz professjonali li pajjiżna huwa rinomat għalih.

Ir-real deal qatt ma kien. Kien biss daħq fil-wiċċ. Issa min webbilna bir-real deal irid iqum fuq tiegħu u jgħidilna tassew kif ser jissaħħaħ is-servizz tas-saħħa mhux iħallina mċappsin ma’ kuntratt li ġie deċiż li hu frawdalenti u li ma sewa ta’ ebda għajnuna lill-poplu Malti u Għawdxi. Issa wasal iż-żmien li l-poplu jkun jaf kif ser itaffi mid-diffikultajiet li qed jiffaċċja Mater Dei u li minħabba fihom qed ibatu kemm il-pazjenti kif ukoll il-ħaddiema fl-isptar.

Din hija sitwazzjoni li ma jistax jaħrab minnha l-Partit Laburista. Dan ġie maħsub fi żmienhom. Inkitbu l-kuntratti min-nies tagħhom. Iffirmat il-kuntratt minn Ministri tal-Gvern Laburista. U fuq kollox in-nuqqas ta’ twettiq tal-kuntratt sar kollu kemm hu meta Gvern Laburista kien fil-poter. Mela żgur li ma jistgħux jippruvaw idaħħlu lil xi ħadd ieħor fl-istorja. Din hija kollha storja ħamra mill-bidu sat-tmiem. Ir-responsabilita’ hija kolla tal-uffiċjali tal-Gvern Laburista. Misshom kienu aktar attenti għal min ħawwad fil-borma. Misshom żammew din l-oxxenita’ milli ssir u misshom waqfu lil diversi politiċi jibqgħu għaddejjin u jgħaddu ż-żmien bil-poplu Malti u Għawdxi kollu.

Issa għall-magħmul ma hemmx kunsill. Imma għall-inqas minn din l-istorja għandna nerġgħu bil-mod nibdew naħsbu biex nerġgħu nagħmlu minn San Luqa sptar ieħor diċenti biex inkunu nistgħu nleħħqu maż-żieda fil-popolazzjoni tagħna. Il-bini għandu potenzjal li hu ħafna akbar minn Mater Dei. Kull ma jeħtieġ huwa ftit attenzjoni u maniġjar tajjeb biex dan ikun jista’ jsir.