Iż-żieda fil-popolazzjoni qed iġġib il-bżonn ta’ sptar akbar.

Minn osservatur politiku

Mingħajr ebda dubju Malta għandha bżonn sptar ikbar biex tlaħħaq mal-influss ta’ nies li qed jersqu għas-servizz tas-saħħa. Pajjiżna reġa’ ġralu li kellu sptar li ma kienx baqa’ biżżejjed biex jagħti servizz tajjeb u professjonali lill-poplu. Imma d-differenza hi li St Luke’s kien ilu iżjed minn ħamsin sena jagħti servizz lill-poplu. Issa għandna l-isptar Mater Dei li jista’ jiġi kkonsidrat pjuttost ġdid għax ilu biss ftit iktar minn ħmistax-il sena, li mhux ilaħħaq mad-domanda.

Ma tridx tkun xi bozza tal-miljun biex tasal għall-konkluzjoni għalfejn ġara dan. Meta ġie ddiżinjat Mater Dei il-popolazzjoni kienet ta’ 370,000 u kulħadd kien jgħid li l-isptar kien biżżejjed għal dak iż-żmien. Sa meta beda jilqa’ l-pazjenti il-popolazzjoni kibret b’mod normali għal 405,000 u xorta kien meqjuż biżżejjed.

Imma meta tbiddel il-ħsieb ekonomiku, jiġifieri wara l-2013, beda l-inkwiet fuq l-isptar għaliex biż-żieda tan-nies b’mod qawwi, kien qed ikun ta’ piż qawwi fuq l-isptar. Fil-fatt l-isptar beda jkollu sfidi kbar biex ilaħħaq man-numru kbir ta’ nies li kienu qed imorru għas-servizz tas-saħħa. U dan qed nirreferu biss għal spażji fiżiċi. Ħafna iktar minn hekk inħolqot il-problema kbira ta’ nies li jaħdmu fl-isptar speċjalment tal-infermiera.

Kulħadd jaf li l-Gvern tagħna beda jirrikorri għall-infermiera u ħaddiema oħra barranin biex ikun jista’ jagħti servizz tajjeb fl-isptar. Imma din ma kienetx faċli għax ħafna minnhom użaw lil pajjiżna biex imbagħad imorru f’pajjiżi oħra Ewropej fejn il-paga kienet ħafna aħjar. Għaddejna u għadna għaddejjin minn żminijiet fejn operazzjonijiet jiġu posposti minħabba n-nuqqas ta’ ħaddiema fl-isptar.

Fl-2014 infetaħ iċ-ċentru tal-onkoloġija li naqqas id-domanda fuq Mater Dei. Imma għalkemm hemm dan l-isptar ġdid li ħa numru tajjeb ta’ pazjenti, xorta llum mhux qed ilaħħqu mad-domanda. Xorta ma kienx biżżejjed tant li ħafna zoni fl-isptar tbiddlu f’wards biex ikunu jistgħu jlaħħqu mal-influss.

Il-fatt li f’dawn l-aħħar għaxar snin il-popolazzjoni f’pajjiżna għamlet passi ta’ ġgant u żdiedet b’mod fenominali kien ifisser li l-isptar kien qed jilqa’ fih numru dejjem akbar ta’ nies. F’dawn l-aħħar għaxar snin il-popolazzjoni kibret għal 550,000. Dawn in-numri rriflettew fuq id-domanda ta’ servizz tas-saħħa li spiċċa ma jistax ilaħħaq mad-domanda. Issa rridu naraw jekk il-Gvern hux ser jibqa’ għaddej bl-importazzjoni ta’ ħaddiema barranin biex ikompli għaddej l-isvilupp ekonomiku. Jekk jiġri hekk ma jkunx għad fadal soluzzjoni ħlief li jiżdiedu s-swali fl-isptar.

Il-Gvern għandu r-responsabilita’ ta’ dan kollu. Jaf li din iż-żieda fin-nies qed toħloq ħafna problemi. Nisperaw li l-istess Gvern jieħu dawk il-passi neċessarji biex jilqa’ għal dan. Ma jistax ikun li nibqgħu għaddejjin bl-istess sentimenti ekonomiċi u ma nagħtux każ ir-reperkussjonijiet li qed iħallu fuq is-servizz tas-saħħa u servizzi oħra f’pajjiżna.