Aktar dwar it-tneħħija tal-iskart minn taħt il-Kunsilli Lokali għall-Kunsilli Reġjonali u ż-żieda tal-firien fit-toroq tagħna, speċjalment lokalitajiet fejn imorru joqgħodu t-turisti.

Minn osservatur politiku

Nagħmel referenza għall-artiklu li deher fuq dan is-sit bit-titlu “Kien żball li l-ġbir tal-iskart tneħħa minn idejn il-Kunsilli lokali u ngħata lir-reġjuni”. Qed nagħmel din ir-referenza biex inkompli nisħaq fuq il-problemi kbar li qed jiffaċċjaw lokalitajiet Maltin u Għawdxin minħabba il-problema tal-iskart. Issa, skond it-Times, għandna żieda ta’ firien li qed jitfaċċaw ħafna iżjed minħabba dan il-ħmieġ li l-iskart iħalli meta jibqa’ għal ħafna tul fit-toroq tagħna.

Dawn il-firien saru ħafna iktar problematiċi f’diversi lokalitajiet li jilqgħu fosthom l-ikbar numru ta’ turisti minħabba li l-iskart mhux jinħareġ skond il-ġurnata tiegħu. Huwa rrapurtat li qed jidħlu ħafna iżjed rapporti għand id-dipartiment konċernat biex jitolbu l-għajnuna biex jiġu meqruda dawn il-firien li qed jitfaċċaw b’numru ħafna iktar qawwi fit-toroq tagħna.

In-numru tal-firien kien naqas minħabba d-dixxiplina li kienet daħlet fil-mod kif jinġabar l-iskart. Imma issa donnu ntilfet din l-imġieba tajba u erġajna qed naraw ħafna iktar firien. Jekk dan jirriflettix it-tneħħija tal-ġbir tal-iskart minn idejn il-Kunsilli Lokali jew le hija mistoqsija li trid tiġi mwieġba. Imma żgur li s-sistema marret lura u mhux ‘l quddiem. U dan ġara minħabba l-fatt li l-ġbir ġie organizzat differenti u tneħħa minn idejn il-Kunsilli.

Fejn insibu ħafna turisti jidher li qed jiżdiedu n-numru ta’ firien. Raġuni hija li f’dawn il-lokalitajiet jiżdied enormament l-ammont ta’ żibel li jitpoġġa għall-ġbir. Ħafna drabi dan joħroġ minn filgħodu u jinġabar filgħaxija allura d-dewmien li jagħmel fuq il-bankini huwa ta’ attrazzjoni għal dawn il-firien. Raġuni oħra li qed tingħata għal din iż-żieda hija l-ammont essaġerat ta’ kostruzzjoni li għaddej kullimkien. Nistgħu nżidu wkoll li s-sħana qawwija li għamlet f’dawn l-aħħar ġimgħat żiedet il-possibilita’ ta’ aktar firien fit-toroq.

Illum saret iktar faċli li l-aħbar tiġi mxandra u għalhekk ritratti ta’ firien jiġru fit-toroq għamlu r-rondi fuq Facebook u kulħadd seta’ jispekula li għaddejjin ħafna firien fit-toroq. Dan jista’ jkun fatt imma jista’ jkun wkoll li n-numru mhux daqstant allarmanti. Forsi fejn jidhru dawn il-firien tagħmel id-differenza għax tfaċċaw f’postijiet li s-soltu ma jidhrux.