Il-ġbir tal-iskart u l-problemi li hemm marbuta miegħu.

Minn Edwin Vassallo

Bħalissa qed nisimgħu ħafna diskors dwar problemi fil-ġbir tal-iskart. Imma l-problema mhux fil-ħinjiet tal-ġbir tal-iskart qedha iżda fil-fatt li s-separazzjoni tal-iskart fid-djar ma tistax issir kif mitluba. Mela mingħajr ma nkunu polemikużi ejjew naraw għaliex.

Il-problema tal-ġbir tal-iskart qed tingħata importanza minħabba dak li qed jingħad fis-social media u fuq kollox, minħabba l-problemi li l-Kunsill lokali ta’ Tas-Sliema qed jiffaċċja f’dan il-qasam. Imma ejjew naqblu li din il-problema mhux f’ta’ Sliema biss qedha. Illum din hija problema madwar il-pajjiż kollu.

Imma f’Tas-Sliema u f’postijiet urbani bħal tas-Sliema, din il-problema qed tkun waħda aktar akuta. Dak li qiegħed jiġri f’tas-Sliema huwa kas fejn għandek numru kbir ta’ residenti fi blokok ta’ appartamenti. Ma’ dan il-fatt wieħed irid iżid li hemm numru kbir ta’ barranin jgħixu f’din il-lokalita’. Li qed jiġri li għall-raġunijiet differenti, Maltin u barranin ma jistgħux jibqgħu jżommu mal-iskeda tas-separazzjoni tal-iskart. Ħafna drabi l-barranani ma jkunux jafu bl-iskedi ta’ meta jinġabar iż-żibel. Fuq kollox, illum għandek ħafna nies, Maltin u barranin li qed jgħixu f’appartamenti żgħar u ma tagħti tort lill-ħadd, għaliex iż-żibel, speċjalment l-iskart tal-ikel, ħadd ma jista’ jibqa’ jżommu ġranet ġewwa sakemm jinġabar. Mela jekk xejn, dak li qed jiġri f’Tas-Sliema qed jitfa’ fl-attenzjoni tal-pajjiż problemi ġodda li qed jiżviluppaw mal-mod ġdid ta’ ħajja li llum qed ngħixu ġewwa pajjiżna.

Dawn il-problema u realtajiet ġodda flimkien ma’ problemi jew sistemi oħra li ġew introdotti, fejn kollox issa qed ikun magħmul kumitat reġjonali f’dawk li huma tenders tal-ġbir tal-iskart qegħdin joħolqu problemi ġodda. Imma dik tas-separazzjoni tal-iskart tidher li hija l-ikbar problema li għandna bħalissa f’dan il-qasam.

Jien nemmen li l-Wasteserve trid tifhem li ma tistax tibqa’ tiddeċidi biss skont il-ħtiġijiet tagħha jew kif jaħsibha xi manager minn tagħha. Trid l-ewwel u qabel kollox tiddeċidi skont l-esiġenzi tan-nies. Dak li qed jiġri huwa li s-separazzjoni tal-iskart fid-djar mhux qed issir skont l-esiġenzi tan-nies imma skont l-esiġenzi tal-Wasteserve.

Dawn jieħdu deċiżjoni u jimponuha b’liġi fuq in-nies. Mela dawn qed jippretendu li l-familji jimxu mal-iskedi li jkunu deċiżi skont il-ħtiġijiet tal-Wasteserve. Dan it-tip ta’ management irid jispiċċa. Il-Ministru ma jistax jippretendi jew jistenna li kulħadd jkollu jobdi.

Issa qed nindunaw mill-munzelli ta’ boroz ta’ skart fit-toroq li mhux kull skeda tista’ taghmel sens. Jien nissuġġerixxi li l-WasteServe, flimkien mal-kunsill lokali fosthom dawk ta’ Tas-Sliema jitkellmu ħa jaraw kif jistgħu jibdew jimxu flimkien. B’hekk jistgħu jibdew minn xi mkien.

B’hekk għandhom jistħarrġu r-raġuni ta’ dak li qed isir ħażin. Irridu nibdew nitgħallmu li qabel ma noħorġu direttivi u liġijiet, naraw x’impatt ser iħallu u jekk dawn id-direttivi, skedi, ordnijiet, regolamenti jistgħux jiġu osservati. Ejjew qabel ma ngħatu ordni nibdew nidħlu fiż-żarbun ta’ min qed nordnawlu jobdi biex naraw jekk dik l-ordni tistax taħdem. Ejjew naraw qabel nintroduċu xi regolament, jekk dak ir-regolament jew dik l-ordni tistax tiġi osservata jew le.