L-Arċisqof Scicluna jrid jgħaddi mill-kliem għall-fatti dwar l-impenn tiegħu favur il-ħajja u l-imħabba.

Ilbieraħ, Newsbook tagħtna l-aħbar li lbieraħ, meta l-arċisqof mar il-Mosta biex iqaddes il-quddiesa tal-festa qal li għandna nissieltu għall-kultura tal-ħajja u l-imħabba. Il-bniedem li kiteb dan l-artiklu hu l-ġurnalista u l-PRO tal-Kurja, Kevin Papagiorcopulo li kiteb dwar dan l-avveniment fuq Newsbook. Sew għamel li diskors bħal dan li sar fil-Bażilika tal-Mosta nhar il-festa ta’ Santa Marija ngħata din il-pubbliċita’ kollha.

Nieħu ħafna pjaċir li l-Arċisqof Scicluna qed jitkellem ċar u bla kantunieri dwar il-fatt li għandna nkunu favur il-kultura tal-ħajja u kontra l-kultura tal- mewt. Nieħu gost li qed jitkellem dwar il-kultura tal-imħabba.

Imma jekk verament il-knisja hija favur il-ħajja, il-Knisja ma tistax tkompli tuża l-media tagħha biex tagħti leħen lill-klikka ta’ ġurnalisti u ħassieba liberali li kienu u huma parti mit-tkissir tan-nazzjon u waħda mir-raġunijiet għalfejn il-poplu Malti tilef il-fiduċja u t-tama fih innifsu u agħar fl-istess Knisja.

Il-poplu Malti ħabb il-knisja tiegħu għaliex kienet toffrilu ġejjieni. Għalhekk dan il-kliem tal-Arċisqof huwa pass fid-direzzjoni t-tajba biex nerġgħu nibdew nibnu mill-ġdid in-nazzjon tagħna. Imma jeħtieġ ukoll li l-Knisja ma tħallix min jużaha biex ikisser lin-nazzjon Malti. Il-knisja ma tistax tiffinanzja media u tagħti mill-inqas 600,000 ewro fis-sena lil din l-istess media, biex imbagħad din l-media tkun pjattaforma għal min irid jgħajjar lin-nies bil-mard mentali u jrid idaħħal l-abort f’Malta. Waqt li dawn għandhom kull dritt għall-ħsibijiet tagħhom, il-knisja trid tieqaf tiffinanzja lil dawn in-nies. Għalhekk in-nazzjon tagħna qed jiġġaraf għaliex il-mexxejja ta’ dan in-nazzjon għandhom ħafna kliem sabiħ, imma l-azzjonijiet tagħhom huwa bil-kontra ta’ dak li jipprietkaw. Infakkar x’jgħid il-Malti, il-kliem iqanqal imma l-eżempju jkaxkar. Kristu kien aktar iebes u sejjaħ lil dawn it-talin, oqbra mbajda.

Illum, il-ġurnalisti tal-Knisja jew aħjar min hemm warajhom huma mxirka mal-Woke u jmexxu l-aġenda tal-Woke u mhux tal-Knisja jew ta’ Alla. Jekk l-arċisqof ħaseb li ta’ Repubblika kienu ser jagħtuh xi awtorita’ morali u għalhekk qed jimla’ l-media tiegħu bihom, ser jgħarralu bl-ikrah. Aktar qed itellfuh mill-awtorita’ morali li suppost għandu. Dawn huma nies mimlja odju lejn għajrhom. Nies li moħħhom biex jgħajru u jagħmlu “like” lil min jgħajjar lin-nies. Minħabba fihom, il-knisja f’Malta qed tkun assoċjata mal-kultura tal-mibgħeda.

Għalhekk qed nikteb kif qed nikteb għaliex il-Knisja ma tistax u ma għandhiex tkun parti minn din il-kultura. Aktar u aktar tiffinanzja media biex tagħti pjattaforma lil dawn in-nies, aktar qed tagħmel ħsara lilha nnifisha. Infakkar li fost persuni li hemm jew kien hemm fuq l-istess tmexxija ta’ din il-media tal-knisja, hemm persuna jew persuni li jiftaħru li huma atei u li sesswalment ma jafux fejn qegħdin. Infakkar li meta, dan is-sit beda jikxef dan kollu, jien, Simon Mercieca, ġejt mhedded b’libell minn Kevin Papagiorcopulo. Illum il-knisja Maltija titkellem bil-lingwagg tal-libelli biex toħnoq il-verita’ meta din tkun skomda għall-widnejha. F’dan il-kuntest, nippreferi l-knisja tal-interdett għaliex kienet aktar onesta fil-kuntest tal-istorja lokali Maltija.

Ħa nkun dirett. Il-media tal-knisja trid tieqaf tkun fewdu ta’ Fr. Joe Borg u Austin Gatt. Anki jekk ma jidhrux, dawn hemm qegħdin imexxu l-unika politika li kieku kapaċi jmexxu, dik tal-mibgħeda u tal-cancel culture. Infakkar li l-establishment politiku ta’ Austin Gatt huwa wieħed mir-raġunijiet għala tkisser il-Partit Nazzjonalista. Illum dan l-istess establishment politiku huwa wara l-media tal-knisja u l-kurja qed tara kif tiffinanzja dan kollu b’aktar minn 600,000 euro fis-sena. Kif dawn kissru lill-PN, illum dawn qed ikissru lill-Knisja.

L-arċisqof Scicluna għad jispiċċa imma povru min ser jilħaq warajh! Għaliex knisja taċ-ċerimonji, tal-bażiliki u tal-munzetti biss ser isib warajh! Li nagħmlu l-bażiliki ma hemm xejn ħażin. Anzi jien favur tagħhom. Imma meta l-knisja kellha dawn l-affarijiet kollha, kellha wkoll sens qawwi ta’ korrettezza u li ma tħallix lin-nies jinqdew biha u l-abjad tgħidlu abjad u l-iswed tgħidlu iswed.

Għalhekk illum, il-poplu Malti ma għadux jagħraf fil-knisja s-sens ta’ korrettezza morali. Pajjiżna qiegħed jiġġarraf moralment. Il-media tal-Knisja trid tieqaf tkun parti minn dan it-tiġrif. J’Alla, il-paniġierku tal-arċisqof ġewwa l-Mosta ikun l-ewwel pass lejn id-direzzjoni t-tajba.