Mhux Salvu Balzan biss jieħu kuntratt mingħand il-gvern. Hemm ħafna oħrajn li jieħdu flus, imma ħadd ma jsemmiehom.

Minn osservatur politiku

Xbajna naqraw stejjer dwar il-kuntratti ta’ PR li qed jieħu Salvu Balzan tal-MaltaToday. Bħallikieku dawn is-sitwazzjonijiet ma kienux jeżistu fil-passat meta tal-Where’s Everybody kienu jieħdu kollox huma waqt li kellhom programmi ta’ ġrajjiet kurrenti fuq TVM.

F’Malta ftit huma dawk li jafu jagħmlu PR politiku u nies bħal Lou Bondi u Salvu Balzan huma fost l-aktar imfittxija. Mhux għax il-MaltaToday paladina tal-istejjer ġusti, għax ġieli jiktbu oxxenitajiet li ma jagħmlux sens, imma tiskanta kif il-media mainstream moħħhom f’Salvu Balzan u jinsew players oħra influenti.

Per eżempju kif ħadd ma jistaqsi x’jieħdu mingħand il-Gvern tal-LovinMalta jew tal-MaltaDaily? Dawn ukoll saru influenti. Jew kif ħadd ma jinnota li dawn il-portals jieħdu flus mingħand ċertu MEPs u qatt ma jikkritikawhom?

Kif it-Times u The Shift qatt ma jistaqsu kemm jieħu flus mingħand diversi entitajiet tal-Gvern ħaten Beppe Fenech Adami? Dan għandu xi erba kumpanniji reġistrati u daqqa tisma b’kunċert ġej minn kumpannija X u wara tara programm minn kumpannija Y u kollha jgawdu minn tax-rebates, sponsorships u reklamar galore.

Imma ta’ Salvu Balzan biss jinten waqt li ta’ ħaddieħor ifuħ. U ma ninsewx il-kumpannija ta’ dawk li jaħdmu l-kampanja elettorali tal-Partit Laburista. Dawn jieħdu fondi mill-Kummissarju tal-Films, mill-Arts Council u minn entitajiet oħra.

Mhux ta min kieku l-media mainstream tistaqsi fuq kulħadd u tikxef l-interessi u ħbiberiji ta’ kulħadd? Waqt li tagħmel sew titkellem fuq Salvu Balzan, biex tkun kredibbli, trid titkellem fuq kulħadd.