Matthew Xuereb tat-Times jiffirma karta mal-Gvern biex ma jikxif kemm dan l-istess gvern, li hu jgħajjar korrott, kien qed jagħtih flus

Minn osservatur politiku

Qed nagħmel referenza għall-artiklu miktub f’dan is-sit taħt it-titlu ta’ “Ġurnalisti hekk imsejħa indipendenti jużaw il-mewt ta’ Daphne Caruana Galizia biex idawru lira tajba minn fuq dahar il-Gvern”. Shift News tatna konferma li dawn il-ġurnalisti ammettew li ġew imħallsa mill-Gvern biex jagħtu dan il-ħin tagħhom fuq il-Kumitat.

Apparti li kien hemm informazzjoni li Saviour Balzan tħallas €15,000. L-iktar li jidher stramb u ikrah huwa l-fatt li fost il-ġurnalisti kien hemm Matthew Xuereb. Dan huwa ġurnalist tat-Times of Malta. Issa aħna nafu li dan il-ġurnal tal-kuljum u kull nhar ta’ Ħadd jiftaħar li juża t-trasparenza bħala parti mill-politika tiegħu. Imma f’dan il-każ ma tantx jidher li kien hemm trasparenza.

Xi ħaġa li tidher ftit iżjed antipatika hija li Matthew Xuereb huwa l-President tal-Istitut tal-Ġurnalisti. Dan ħa l-flus, jiġifieri qed imexxi bl-eżempju tiegħu. Imma barra minn hekk dan il-ġurnalist u President tal-Istitut tal-Ġurnalisti ffirma “non-disclosure” bħal ma ffirmaw it-tliet ġurnalisti l-oħra li pparteċipaw f’dan il-kumitat.

Hija xi ħaġa li tiskantak li ġurnalist tat-Times li jippriedkaw, kif diġa’ għidt, it-trasparenza jasal biex jiffirma non-disclosure mal-Gvern. Mela kif nistgħu nifhmu li dan il-ġurnalist ikun lest li jikkritika lill-Gvern mingħajr ma jkollu xi ħaġa li tista’ b’xi mod twaqqfu milli jagħmel dan? Mela wieħed jistaqsi, meta tiffirma non disclosure mal-Gvern, dan ikun qed jillimitalek il-kritika tiegħek fuq l-istess Gvern? Għax jekk hu hekk allura veru li dan il-pajjiż sejjer lura bħal granċ.