Il-Kamra tal-Kummerċ tixgħel il-bozza l-ħamra lill-gvern: tgħid dan hu pajjiż bla tmexxija.

Minn Edwin Vassallo

Dan huwa messaġġ li jeħtieġ jibgħat lill-estbalishment politiku kollu u mhux lill-Gvern biss. L-akbar problema ta’ dan il-pajjiż huwa li dan il-pajjiż qiegħed jegħreq u l-poplu jħoss li ma għandux lil min jafda.

Jien nemmem li aħna għandna kriżi ta’ valuri. Xejn ma għadu jiswa. Il-ħażin ġie tajjeb. L-importanti li tasal u kif ma jimpurtax. Din il-loġika ta’ xejn ma hu xejn, qed twassal biex dak li l-aktar jiswa’ huwa l-“jien”. Ir- reliġjon illum saret ir-religjon tal-alla tal-flus. Għal ħafna, l-iskop tal-ħajja sar kif tagħmel il-flus akkost ta’ kollox. L-iskop fil-politika sar kif tirbaħ il-voti akkost ta’ kollox ħalli tkun tista’ tagħmel il-flus.

Dan huwa pajjiż li tilef kull sens ta’ direzzjoni. Kull awtorita’ li għandna fil-pajjiż tilfet l-awtorita’ morali tagħha. Dan kollu wassal biex dan il-pajjiż, kif issa qed tgħid il-Kamra tal-Kummeċ, qiegħed jegħreq. Jien, ilni żmien nikteb fuq dan is-suġġett f’dan is-sit. Minn meta kont fil-Parlament, jien dejjem għidt li biex dan il-pajjiż ikollu tiġdid ekonomiku, jeħtieġ l-ewwel li jkollu tiġdid morali. Jeħtieġ li nerġgħu nibdew nagħrfu li hemm il-ħażin u t-tajjeb. Il-ħażin ma jistax jibqa’ jitqies tajjeb. Il-Kamra tal-Kummerċ qed tgħid lil dan il-Gvern u kull l-establishment politiku ieħor li hawn f’dan il-pajjiż jeħtieġ ma jibqgħux egoistiċi.

Imma daqshekk ieħor, kull imprenditur għandu jara li bħala priorita’ tiegħu jkollu l-valur tal-bniedem u dan il-valur għandu jiġi qabel il-valur tal-flus. Pajjiżna warrab ir-riga tas-sewwa biex għamel il-flus l-alla tiegħu. Dan sar pajjiż li ma jrid lil ħadd jgħidlu li hemm affarijiet ħażina li ma jistgħux isiru. Issa qed ngħerrqu għaliex bla riga tas-sewwa. Żvalutajna l-valur tal-ħajja umana u dan kollu biex nidhru sbieħ quddiem il-votant jew l-Ewropa.

Dan wassal biex l-awtoritajiet politici tilfu s-sinsla u direzzjoni politika. Iridu jgħidu “iva” għal kollox u għall-kulħadd. B’hekk l-awtoritajiet politiċi qegħdin jitlfu l-fiduċja tan-nies għaliex qed jispiċċaw irrelevanti.

Proset lill-Kamra tal-Kummerċ li qed titkellem imma ma tistax tieqaf hawn. Jekk mhux ser naħdmu flimkien biex nifqgħu għaddejjin f’din it-triq li nikkorrompu l-verita’, dak li qegħdin fih mhux it-tmiem, iżda l-bidu tat-tmiem