Il-gvern jista’ jwettaq conversion therapy fuq it-tfal: ħaddieħor le.

Minn Edwin Vassallo

Dan il-gvern jista’ jwettaq conversion therapy imma ħaddieħor, le. Dan hu l–messaġġ li bagħtet Rebecca Buttigieg bil-parteċipazzjoni tagħha f’attivita’ maħsub biex tindottrina lit-tfal fil-gender ideology. Jekk persuna ma tistax tagħmel “conversion therapy” daqshekk ieħor il-gvern ma jistax jagħmel l-istess. Jekk din hija illegali għal wieħed, għandha tkun illegali għall-ieħor. Dan li rajna fil-Belt ma kien xejn għajr conversion therapy fuq it-tfal. Mela jekk din hija ħażina f’għajnejn il-ħaqq għal wieħed, għandha tkun ħażina meta wkoll titwettaq mill-istess gvern.

Infakkar li dan il-gvern ma kienx kuntent b’dak li kien għadda fuq dan il-punt ta’ conversion therapy mill-parlament. Reġa’ għamel aktar emendi biex isaħħaħ il-liġi kontra dawk li hu qed isejjaħ bħala fundamentalisti tal-conversion therapy u b’riżultat ta’ dan, rajna persuna, bħal Matthew Grech, li għaliex qal l-esperjenza ta’ ħajtu u kif ma baqgħax gay, ġie mkaxkar il-qorti qiesu l-agħar kriminal. Ara hemm l-ebda ministru jew xi Rebecca Buttigieg ma ħarġet tgħajjat li Matthew Grech kull ma kien qed iwassal il-messaġġ tal-imħabba ta’ Kristu. Illum il-messaġġi ta’ imħabba jitwasslu biss f’serati favur l-indottrinazzjoni sesswali!

Mela issa bl-istess loġika u raġunar, jekk il-liġi tgħid li huwa llegali li persuna ma’ tistax twettaq conversion therapy biex persuna LGBTIQ+ tkun mgħejjuna jew imħajra terġa’ lura għas-sesswalita’ jew ġeneru oriġinali tagħha, daqstant ieħor għandu jkun illegali li xi ħadd, inkluż il-gvern, iwettaq conversion therapy fuq tfal jew persuni oħra biex mis-sesswalita’ u l-ġeneru oriġinali tagħhom jitħajru jinbiddlu għall-ġeneru ieħor. Iżda għal dan il-gvern, il-conversion therapy taħdem biss “one way”.

Dak li f’isem ‘l hekk imsejħa “ugwaljanza” li ma hija uġwaljanza xejn, dan il-gvern, u dawk kollha involuti wara dawn it-teoriji tal-woke, iridu biss li jmexxu l-propaganda irħisa tal-LGBTIQ+. Meta din il-propaganda tmur ħażin u xi ħadd ifettilu jitkellem u jgħid l-esperjenza tiegħu, u għala din hija propaganda ħażina, jiġi mkaxkar il-qorti u akkużat, qiesu xi qattiel, b’conversion therapy.

Mela għal dan il-gvern, hu tajjeb li wieħed jimmanipula moħħ it-tfal u jħajjarhom għal kull tip ta’ sesswalita’ u ta’ ġeneru lilhinn minn dak bioloġiku tagħhom, imma jekk xi ħadd ma jaqbilx ma dan, jiġi mgħajjar faxxista u konservattiv. Mela l-gvern għandu dritt jagħmel propaganda tal-“gayyaġni” u jimponiha fuq it-tfal u s-soċjeta’ “at large”, imma huwa llegali għall-istess soċjeta tagħmel l-istess u turi l-opinjoni tagħha jekk ma taqbilx ma dan kollu. Din mhix ugwaljanza. Dan totalitariżmu tal-idejoloġija tal-ġeneru.

U f’pajjizna ħadd ma jgħid xejn, għaliex min jipprova jitkellem jibda jiġi msejjaħ “dinosawru”. Min jirraġuna bħali, il-ġurnalisti woke jelliminawh u jibdew jgħidulu lemini u estremist.

U dan kollu sar b’kompjaċenza tal-oppożizzjoni Nazzjonalista. Kulħadd jara kif jidher u jintgħoġob. Il-politika għalhekk ftaqret mill-ħsieb politiku. Illum kollox sar strateġija u manipulazzjoni. Kulħadd jimpurtah minn kif ser isalva wiċċu biex forsi jieħu promotion jew jerbaħ xi elezzjoni. Imma mbagħad quddiem il-poplu, ħadd ma hu qed jiddefendi l-verita’. Dan kollu qed iseħħ għaliex il-priorita’ ma għadhiex aktar il–bniedem, iżda r-rebħ tal-voti. B’hekk spiċċajna b’oppożizzjoni Nazzjonalista li l-anqas biss hija denja li tissejjaħ oppożizzjoni. L-anqas biss xammet dawn il-weġġgħat tal-poplu. Illum l-oppożizzjoni Nazzjonalista maqtugħa mir-realta’. Biegħet ruħha. B’hekk illum ma tistax titkellem fuq il-ħsara li dawn l-emendi qed jagħmlu lis-soċjeta’ tagħna.

Jiddispjaċini ngħid li anki l-awtoritajiet ekklezzjastiċi endorsjaw dawn il-liġijiet. Illum l-awtoritajiet ekklezzjastiċi Maltin huma parti minn din il-kultura “woke” u liberali. Minflok jitkellmu dwar il-liġi ta’ Alla, jaraw kif jintgħoġbu mal-affarijiet tad-dinja. Meta l-istat jgħaddi dawn il-liġijiet li jgħażlu x’inhu leġittimu u x’inhu illegali, l-awtoritajiet ekkleżjastiċi baqgħu b’ħalqhom magħluq anki jekk dawn saru biex jagħlqu ħalq il-qassisin milli jitkellmu b’mod miftuħ u komplet dwar dak li tgħallem il-Bibbja fuq is-sesswalita’. Mela waqt li hu llegali għall–knisja li titkellem fuq is-sesswalita’ kif espressa fil-Bibbja, hu legali għax-xellugin u l-progressivi li jitkellmu kif iridu u jaqblilhom fuq is-sesswalita’. Dik ugwaljanza u diversita’! Dak li hu llegali għal wieħed, huwa legali għall-ieħor.

Infakkar lill-awtoritajiet tal-Knisja li meta Kristu beda jgħid affarijiet li ma kienux idoqqu għan-nies, u n-nies bdew jitilquh, l-appostli ġibdulu l-attenzjoni. U kulħadd jaf x’kienet it-tweġiba. “Tridux titilqu intom ukoll?” U Pietru tah ir-risposta. “Għand min tridna mmorru?” (Ġwanni 6, 66-69)

U veru ġejna fi kliem Pietru. Illum l-elettorat konservattiv u dawk li jgħożżu l-valuri tal-familja ma fadlilhom lill-ħadd għand min imorru!