Issa bil-provi li l-esperti żelqu fin-nixef għax bdejna nisimgħu diskorsi dwar il-bżonn ta’ reviżjoni ta’ din il-liġi tal-abort.

Minn Edwin Vassallo

Tiftakru x’kien kiteb l-eks-Dekan tal-Fakulta’ tal-liġi, Kevin Aquilina, dwar dawn l-emendi li bihom iddaħħal l-abort f’Malta? Kevin Aquilina kien iddeskriviehom bħala ambigwi. Dawn huma emendi ħafna l-bogħod mill-proposta tal-esperti. Għadni ma nistax nifhem għal liema raġuni dawn l-esperti ħarġu jkantaw rebħa jekk mhux għall-egoiżmu intellettwali tagħhom. Illum jafu li spiċċaw kompliċi fi dħul ta’ kundizzjonijiet ristretti, iżda ambigwi ħafna li ser jippermettu l-abort, speċjalment fi kliniċi privati.

Din il-liġi fiha ħafna dubji u nuqqas ta’ ċarezza. Dan maż-żmien ser jagħti lok għall-abort “on demand” imbasta jkun it-tabib li jridhom. Fuq kollox l-argument ser ikun li dak li issa ser jibda’ jsir fi kliniċi privati, għandu jsir bħalu fl-isptarijiet tal-gvern. ‘Il quddiem ser nibdew nisimgħu argumenti dwar anomaliji ta’ proċeduri fejn l-isptar tal-gvern u l-kliniċi privati anki jekk suppost dawn qatt ma kellhom jeżistu għaliex din il-liġi kellha tirregola u ġġib uniformita’ f’dan is-settur.

Fuq kollox, issa qed nitkellmu li nagħmlu proċeduri għat-terminazzjoni tat-tqala meta dan ma huma xejn ħlief abort. Dan kollu qed ngħiduh biex niġġustifika r-raġuni għaliex fil-maġġoranza, dawk kollha li huma kontra l-abort, qed jaqblu ma’ dawn l-emendi. Dawn kollha llum spiċċaw kompliċi u ma għadhomx konservattivi. Kollha għamlu u-turn biex effettivament ddaħħal l-abort. Il-bieb tbexxaq tant li ġa hemm min qed jaħseb kif u meta l-gvern ser ikun jista’ jiftħu aktar.

Dak li jrid jibda’ jingħad li wara li ġiet approvata din l-emenda, ġa għandha professjonisti fil-mediċina li qed joffru s-suġġerimenti tagħhom lill-gvern dwar kif għandu jsir it-tieni pass. U fil-każ xi ħadd għandu xi dubju, ġa bdejna naraw The Times timbotta x’qed jgħidu l-pseudo-esperti tal-Ġnus Magħquda li issa spiċċaw jindaħħlu fuq affarijiet interni tal-pajjiżi membri u jitkellmu fuq materji li ma’ għandhomx x’jaqsmu mar-remit li għalih ġiet ikkreata din l-organizzazzjoni. Dan jissejjaħ kolonjaliżmu ġdid.