Għaliex l-argument ta’ Joseph Muscat kontra l-Maġistrata Gabriella Vella ma jorbotx?

Minn osservatur politiku

Argument bażwi dak li qed juża Joseph Muscat biex jipprova jiddefendi l-indifensibbli. Skont l-eks-Prim Ministru, il-Maġistrat Gabriella Vella għandha tirtira mill-kumpilazzjoni tal-evidenza għaliex ħuha u missierha ikkritikawh fuq Facebook. U skont Muscat, la hi ma ċanfrithomx allura qed iżżomm magħhom.

Argument pwerili bħal dawk li qed iġib l-eks-President Amerikan Donald Trump u l-eks-Prim Ministru Ingliż Boris Johnson meta jippruvaw isaħħnu l-irjus biex iġibu l-appoġġ tal-poplu warajhom. Mela skont Muscat għax il-Maġistrat Vella qalet li ħuha u missierha għandhom dritt għall-opinjoni u espressjoni tagħhom dan ifisser li taqbel magħhom. Il-familjari tal-maġistrat ixxerjaw post fuq facebook li kienet tellgħet l-għaqda Repubblika.

Skond Muscat minn dak il-mument li l-maġistrat iddikjarat ruħha fuq il-familjari tagħha, l-każ ġie preġudikat u inkissru d-drittijiet tiegħu. Muscat qed jistaqsi lill-qorti biex tordna r-rikuża tal-istess maġistrat wara li hi kienet iddeċidiet li ma tirrikużax ruħha. L-avukati tiegħu għamlu rikjesta biex Vella tkun sospiża mix-xogħol kollu li għandu x’jaqsam mal-inkjesta u allura ma tibqax tiġbor informazzjoni dwar l-isptarijiet. Il-maġistrat Vella qalet li l-kummenti tal-familjari tagħha kienu riżultat ta’ free speech. Għall-kuntrarju Muscat qed jgħid li huwa qed jitlob din ir-rikuża għax jemmen li d-drittijiet tiegħu qed jiġu mittiefsa kif il-maġistrat ma kkundannatx dak li kitbu l-familjari tagħha.

Imma fuq kollox, il-Maġistrat Vella m’hix se tkun hi li tagħti xi verdett fuq Muscat, imma xogħolha hu biss li tiġbor l-evidenza u wara tħalli f’idejn il-pulizija biex tidditermina jekk għandiex tressaq lil Muscat jew le. Fuq kollox, anki jekk tordna biex jittieħdu passi, finalment huwa l-avukat ġenerali li jiddeċidi jekk għandhomx jittieħdu passi jew le.