Illum doqt personalment l-istat ta’ arroganza li ġiet ridotta Malta fl-immaniġjar tat-traffiku.

Dalgħodu kelli bżonn immur fi Triq Birbal. Din it-triq hija magħluqa miż-żewġ naħat tagħha. Il-warden li kien hemm fit-tarf ta’ isfel tat-triq kien ġentili u wara li spjegajtlu li ridt nidħol fit-triq għaliex ridt immur għand residenta li tgħix fl-istess triq, qalli mhix problema u tista’ tgħaddi.

Kif wassalt f’nofs it-triq (ftit ‘il fuq minn St Francis Street, sibt it-triq magħluqa għaliex kien qed isir xogħol fuqha permezz ta’ dumper. Id-dumper kien f’nofs it-triq, jibblokka t-triq. Bil-ġentilezza kollha tlabt lill-persuna li kien qed isuq id-dumper biex imexxih daqsxejn ħa ngħaddi. B’arroganza kbira, dan il-Malti qalli le. Mhux ser imexxih. Jien ppruvajt nispjegalu imma baqa’ jinsisti li kull ma kelli nagħmel hu li ndur bid-dawra u nidħol min-naħa l-oħra. L-anqas biss kellu d-diċenzja jgħidli stenna ftit għax daqt inlesti u ser ikun qed immexxih. Minflok beda jippilla u jgħidli li l-anqas suppost dħal minn dik in-naħa għax magħluqa bis-sign ta’ no entry. Għalxejn ippruvajt nispjegalu. Id-daħqa hija li din it-triq hija magħluqa bis-sign tan-no entry anki min-naħa l-oħra. Mela jista’ xi ħadd jispjegali kif wieħed jista’ jidħol f’din it-triq?

B’hekk kelli ndur bid-dawra u nidħol fi Triq il-Ferrovija l-Qadima u naqbad Triq Birbal min-naħa ta’ San Anton. Ma għandix xi ngħidu li dan kollu żied it-traffiku għaliex issa ġejt kontra l-kurrent tat-traffiku. U ma għandix xi ngħidu li t-triq kienet anki b’sign ta’ no entry fuq din in-naħa. Dan hu l-istat Kafkesk li ninsabu fih fit-toroq tagħna!

Meta wasalt fejn kelli mmur, iddeċidejt li mmur niġbed ritratti tax-xogħol mill-bogħod għaliex żgur li mhux aċċettabbli li arterja bħal ma’ hi Triq Birbal, il-kuntrattur jaħdem fuqha b’ħaddiem wieħed Malti u xi tnejn jew tlieta barranin. Hawn hux qed nattakka l-użu tal-ħaddiema barranin imma l-fatt li hemm ftit ħaddiema fuq lant tax-xogħol daqshekk importanti. Dan ix-xogħol ilu għaddej ġimgħat. Mela dak li laqatni hu l-ammont ta’ ftit ħaddiema fuq il-lant tax-xogħol fi triq daqshekk traffikuża li qed tikkrea konġestjoni ta’ traffiku enormi.

Fuq kollox, laqtitni l-arroganza. Meta dan il-ħaddiem Malti rani nieħu r-ritratti ġie jiġri għas-sodisfazzjoni u fost ħafna kliem ta’ arroganza beda jċempel lill-kuntrattur u bħali ħa ritratt tiegħi. Kien f’dan il-waqt li ddeċidejt li nieħu ritratt tiegħu u nipproduċih f’dan l-artiklu. Ovvjament meta rani li qed neħodlu r-ritratti, sar aktar arroganti. Ma kellhiex problema li nidentifika ruħi. U pprova jiżżuffjeta biha.

Imbagħad niskantaw li qed ikollna daqshekk imwiet fit-toroq tagħna!

Qed nippubblika r-ritratti biex in nies jibdew jifhmu l-arroganza li ħakmet dan il-pajjiż u d-disastru li tinsab fih Transport Malta.