Il-Prim Ministru jrid iwettaq ġewwa pajjiżna dak li qal lill-Kunsill tal-Ewropa fir-rigward tal-Ukraina.

Minn Edwin Vassallo

“L-ebda paċi bla ġustizzja u l-ebda ħaqq bla kontabilita’ fl-Ukraina“. Dan kien il-kliem li qal il-Prim Ministru Robert Abela lill-Kunsill ta’ l-Ewropa. Il-Prim Ministru fakkarna li “il-ġustizzja trid issir u trid tidher li qiegħd ssir“. Kemm hu kliem sabiħ dan il-kliem tal-Prim Ministru Abela fil-konfront tal-Ukraina. Iżda Onor Prim Ministru, aħna Malta qegħdin u kif jgħidu bl-Ingliż, “charity begins at home“. Il-Prim Ministru ma jistax jinsa li biex jitkellem kemm hemm bżonn ta’ kredibilita’ fil-konfront tal-Ukraina fil-fora lokali u f’dawk internazzjonali jrid verament jemmen fih diskors bħal dan. Fi kliem ieħor, biex il-Prim Ministru jittieħed bis-serjeta’ f’dak li qed jgħid għal Ukraina, irid ikun huwa stess li jipprattika dak li qed jgħid ġewwa Malta.

Sur Prim Ministru dak li tixtieq għal Ukraina wettqu f’darek stess. U darek hija Malta. Meta tagħmel hekk, tibda titwemmen. Pajjiżna wkoll qiegħed fi gwerra bħal Ukraina. Il-gwerra f’pajjiżna hija kontra l-inġustizzji, kontra l-loġika tal-korruzzjoni u kontra l-arroganza fost l-oħrajn. Pajjiżna mhux pajjiż li qiegħed jgħix il-ħajja fin-normalita’. Huwa pajjiż fi gwerra kontra dak il-ħażen kollu li daħal fih. Fuq kollox, qiegħed fi gwerra kontra l-loġika ta’ xejn ma hu xejn li qegħdha tgħerrieh.

F’Malta ukoll ma jistax jkun hawn il-paċi bla ġustizzja. Infakkrek li l-ġustizzja trid issir u tidher li qed isir. Dan ifisser li jekk il-ġustizzja ma tkunx qegħda ssir u tidher li qed issir, ma jkun qed isir l-ebda ġustizzja.

Onor Prim Ministru, ħu ħsieb darek l-ewwel. Put your house in order u mbagħad tara li tibda tittieħed bis- serjeta’.