Il-PN ta’ kontribuzzjoni tajba fil-parlament dwar il-liġi li ser tirregola l-qasam tal-kostruzzjoni: minnha għandu jieħu tagħlima biex ikun organizzat aħjar.

Minn osservatur politiku

M’ilux kellna sitt ġimgħat ta’ konsultazzjoni ma’ kulħadd fil-qasam tal-kostruzzjoni. Kien hemm konsultazzjoni pubblika dwar il-liċenżjar tal-kuntratturi li damet madwar sitt ġimgħat. Din l-istess konsultazzjoni rat konkorrenza ta’ għadd kbir ta’ nies. Kienu mijiet li attendew għad-diskussjonijiet pubbliċi li saru. Kienu ħafna wkoll dawk li pparteċipaw bis-sottomissjonijiet tagħhom fil-konsultazzjoni pubblika li saru. Jiġifieri meta tħares jekk intlaħaqx l-iskop ta’ din il-konsultazzjoni, jidher li minn dak li ħareġ din kienet waħda ta’ suċċess. Il-pubbliku ġenerali għamel l-almu tiegħu kollu u kien parteċipattiv. Nies li jaħdmu fis-settur taw l-idejat tagħhom. Kien hemm ħafna organizzazzjonijiet li pparteċipaw. U fuq kollox kien hemm ukoll partiti politiċi.

U hawn fejn jiżbalja l-PN. Huwa ħaġa tal-iskantament kif il-Partit Nazzjonalista ma għamel ebda sottomissjoni u ma pparteċipax. Din ħalliet togħma morra. U iktar u iktar meta tiftakar li Bernard Grech, f’wieħed mid-diskorsi tiegħu fil-parlament, qal li la hu u lanqas il-Partit Nazzjonalista ma kellhom għalfejn jieħdu sehem fid-diskussjoni jew jibgħatu s-sottomissjonijiet. Nixtieq inkun naf min qed jagħtih dawn il-pariri. Forsi xi darba Fr. Joe Borg jgħidilna!

Il-pożizzjoni tal-PN ma għamlet ebda sens u wieħed isib diffikulta biex jifhimha. Biss wara ftit ġranet li għalaq iż-żmien ta’ konsultazzjoni, din il-liġi tressqet fil-parlament u hemmhekk kellna l-parteċipazzjoni sħiħa tal-kelliema tal-Oppożizzjoni li taw l-idejat tagħhom u s-suġġerimenti tagħhom.

Allura wieħed jistaqsi, x’kien l-iskop tal-Kap tal-Oppożizzjoni li ma jipparteċipax fil-konsultazzjoni pubblika li saret? X’sens jagħmel li kont lest li tiddibatti fil-parlament u meta kellek iċ-ċans kollu li tagħmel ħoss anki f’diskussjoni pubblika? Waqt li għamel sew il-PN li għażel il-Parlament biex il-kelliema jagħmlu l-osservazzjonijiet tagħhom, kellu okkazzjoni oħra fejn seta’ jsemma leħnu u tilifha.

Anzi missu rikeb fuq il-mewġa u organizza lin-nies u l-organizzazzjonijiet ħalli b’hekk kienu jitressqu aktar sottomissjonijiet.

Hawn tinsab il-vera raġuni għala n-nies qed ikollhom diffikulta li jifhmu lill-Partit Nazzjonalista u l-imġieba tiegħu f’ċertu sitwazzjonijiet. Nemmen li din hija waħda mir-raġunijiet għala dan il-partit qiegħed jisfronda u mhux jaqbad art mal-elettorat. Minn din l-istorja, għandu jieħu tagħlima kien ikun organizzat aħjar.