David Casa kontra l-fossil fuel u l-green house effects u mbagħad favur aktar armi għall-Ukraina

Kif kitbet tajjeb Marica Micallef, David Casa qed imexxi aġenda kbira kontra dak li qed jissejjaħ bħala global warming. Mhux ser nidħol fl-argument jekk hux minnu jew le. Imma jista’ xi ħadd jispjegali kif MEP li jgħid li hu kontra l-global warming ikun favur ta’ aktar għotjiet ta’ armi tal-gwerra u tal-mewt? Mela l-armi ma jikkawżawx huma wkoll global warming?

Forsi persuni kontra l-invażjoni tal-Ukraina mir-Russja jgħiduli għaliex ma għandux jitkellem favur il- gwerra u jkun favur l-armi? X’hemm interessanti u daqshekk eċitanti f’din il-gwerra ma nafx. Imma li jkollok deputat tal-PPE li fuq naħa qed ibiegħ l-aġenda tal-global warming u n–naħa l–oħra qed jitlob għal għoti tal-armi, hemm xi ħaġa li mhux tiffunzjona tajjeb fl–argumenti politiċi li qed isiru ġewwa l–Ewropa. Jekk wieħed verament jemmen fil–global warming ma jistax ikun favur t–tixrid tal–armi għaliex dawn, suppost għandhom iżidu fil–global warming. Hu ċar li fl–Ewropa, il–global warming teżisti biss skont l–aġenda li wieħed ikun irid imexxi.

Waqt li nemmen li għandna naħdmu għall-paċi u mhux aktar favur il-mewt, jekk xejn din l-istorja ta’ David Casa tikkonferma kemm il-global warming ma jeżistix, imma hija aġenda politika maħluqa biex iż-żgħir jiġi aktar intaxxat u misluħ mill-Ewropa. –

Kieku Casa kien jemmen li verament għandna global warming, kieku ma kienx jitlob biex jitqassmu aktar armi, imma kien jinsisti fuq il–bżonn ta’ aktar diplomazija għall-waqfien ta’ din il-gwerra.

Fl-Ewropa qiegħed ikun hemm protesti favur il-waqfien tal-ġlied u ta’ din il-gwerra. Filwaqt li l-popli Ewropej iridu il-waqfien tal-ġlied, politiċi bħal Casa jridu aktar gwerer anki jekk dawn il-gwerer, bl-argument tagħhom stess, ser iżidu l-global warming. Imma fl-istess waqt jgħidu li huma kontra l-istess global warming.

L-argument ta’ Casa juri li hemm min qata’ qalbu daqshekk maljar mid-diplomazija. Mela jekk Casa verament kien jemmen fil-global warming, l-ewwel missu mar jitlob għall-waqfien mill-ġlied, għaliex dan iwassal biex ikollna inqas global warming u fuq kollox imwiet li qed toħloq din il-gwerra u mhux jitlob biex l-Ukraina tingħata aktar armi.