Politiku tajjeb għandu jiċċekken u mhux jipprova jikber minn fuq dahar il-voti tan-nies: Roberta Metsola għandha titgħallem mill-iżbalji tagħha stess.

Minn Edwin Vassallo

Huwa ġust li kandidat, hu min hu, u hi min hi, f’run up għall-kampanja elettorali tonfoq somma flus biex torganizza attivita’ straordinarja li tiswa’ ammont ta’ flus sostanzjali? Din hija l-mistoqsija li tqanqlet minn ħafna wara l-attivita’ organizzata mill-MEP Roberta Metsola fit-Teatru Manwel. Huwa minnu li kull persuna għandha dritt torganizża dak kollu li tixtieq, iżda l-kredibilita’ titlob ċertu għaqal u prudenza.

Meta persuna hija nvoluta fil-politika, speċjalment meta f’pajjiżna għandna dawn l-istejjer kollha ta’ korruzzjoni min-naħa tal-gvern u każjiet ta’ politiċi li allegatament huma involuti ma’ persuni f’negozju kbir, wieħed kien jistenna aktar prudenza minn Roberta Metsola.

Aspett ieħor ta’ din l-attivita’ ta’ Metsola huwa li dan il-kunċert sar għall-udjenza selettiva, meta mbagħad, trid il-vot tal-poplu Malti kollu. Għalhekk ma narax li hija ġusta mal-elettorat, speċjalment dak li vvutawlha, f’ċirkostanzi fejn ħafna nies qed jesperjenzaw il-faqar u l-familji f’riskju ta’ faqar qegħdin dejjem jiżdiedu, politiku jorganizza attivita’ bħal din li ġiet tiswa’ eluf ta’ ewro għall-erba’ min-nies selettivi u tat-tajjeb. Żgur li din kienet attivita’ in bad taste – kif jgħidu bl-Ingliż. Fi kliem ieħor kienet attivita’ tistona mal-fatti u ċ-ċirkostanzi li qed jgħixu fihom il-maġġoranza tal-familji Maltin u Għawdxin.

Veru li l Malti jgħid li “min għandu l-bżar ħa jroxxu“. Iżda diġa’ għandna ministri min-naħa tal-gvern bi stejjer ta’ laxkezza fil-relazzjonjiet man-negozjanti kbar. Issa kif jista’ jkun li jkollna kandidati għall- Parlament Ewropew, li qed jitolbu biex jiġu afdati bil-voti tagħna u jġibu ruħhom b’mod daqshekk elitist għaliex donnhom telgħu skaluna ‘l fuq fil-ħajja soċjali tagħhom?

Jien nemmen fil-loġika li min hu kbir irid jiċċekken, u min qiegħed fil-politika jrid iservi. F’dan il-pajjiż, dak li għandna bżonn huwa modi ġodda ta’ kif nuru l-umilta’ u mhux kif nuru s-superjorita’. Għandna bżonn politiċi li jimxu pass pass mal-ħajja tal-poplu u mhux politiċi li jużaw lilll-poplu biex jitilgħu minn fuq dahru, l-iskaluni tas-soċjeta’.

Nittama li l-ħajja tgħallimna u fuq kollox nittama li nitgħallmu mill-iżbalji tal-ħajja.