Għaliex dan il-gvern ħalla li titnaddaf kull traċċa ta’ evidenza mill-post fejn miet Jean Paul Sofia?

Minn Edwin Vassallo

Nibda’ biex nuri solidarjeta tiegħi ma’ dak il-bniedem li ġie arrestat għaliex mar iwaħħal ritratt ta’ Jean Paul Sofia li miet fuq il-lant tax-xogħol. Waqt li hu minnu li Jean Paul Sofia miet b’inċident, huwa wkoll minnu li dan il-Gvern huwa determinat li joqtol kull possibilita’ ta’ inkjesta pubblika u kull inkjesta oħra li tista’ ssir. Il-Gvern irid b’saħħa joqtol kull memorja ta’ dan il-każ. Issa lest anki jarresta lil min jipprova jfakkar din il-mewt b’ġesti pubbliċi.

Ta’ xejn il-Ministru tal-Ġustizzja jgħid li ma hemmx differenza bejn inkjesta maġisterjali u inkjesta pubblika. Meta jgħid hekk verament dan il-ministru jrid jgħatti x-xemx bl-għarbiel. Għaliex li kieku verament il-gvern ma għandu xejn x jaħbi, ma kienx jara li jħalli lil min inaddaf kull evidenza mis-sit fejn seħħet il-mewt ta’ dan iż-żagħżugħ.

Tassew li għandha raġun l-opinjoni pubblika li titlob inkjesta fuq dan il-każ. Għandu fuq xix jinkwieta l-poplu meta jara gvern b’id iebsa ma’ din l-omm b’determinazzjoni tal-azzar li qed tfittex il-ġustizzja. Dan huwa gvern li qed juża din l-id tal-ħadid biex jaħbi kull traċċa ta’ kawża wara dan l-inċident. Quddiem dan kollu, ma jridx inkjesta pubblika għaliex jekk issir jinkixef li dan huwa gvern li saħansitra ħadem u qed jaħdem biex jinħbew il-provi ta’ min hu risponsabbli għal din il-mewt.

Bl-imġieba tiegħu, dan l-gvern qed ikompli jitfa’ l-ġebla fuq saqajh. Dan il-gvern qiegħed iqanqal aktar dubji fil-poplu Malti. Il-poplu Malti issa qiegħed jistaqsi l-mistoqsijiet li nemmen li jista’ jkunu mwieġba minn inkjesta pubblika. Lil min qed jiddefendi dan il-gvern b’din l-attitudi tiegħu? Għaliex ippermetta li l-binja fejn seħħet din it-traġedja tħalliet titwaqqa’? Min ser jirrispondi għal dawn il-mistoqsijet? X’tista’ tikxef aktar din l-inkjesta pubblika dwar dan il-gvern? Għala dan il-gvern irid li jibqa’ għaddej bulldozer b’tant saħħa biex iħassar kull evidenza ta’ ħtija f’dan il-każ?