Il-ġurnalisti tal-MediaLink ma kinux mistiedna għall-kunċert ta’ Metsola għax mhux mitqiesha bħala tal-first tier.

Minn persuna qrib id-Dar Ċentrali

Ħadt pjaċir naqra l-artiklu tiegħek dwar il-famuż kunċert li għamlet Metsola fil-Manoel Theatre ġimgħa ilu. Naqbel miegħek li kieku dan għamlu Joseph Muscat, kieku xbajna naqraw li dan kien skandlu kbir min-naħa tal-kink ta’ Malta! Issa għandna r-reġina u qed iġġib ruħha qiesha xi prinċipessa. Imsomma kif ngħidu bil-Malti, arani u la tmissnix.

Imma nixtieq infakkar fuq skandli oħra li nqalgħu marbuta mal-Orkestra Nazzjonali. Jien għadni ma nsejtx kemm werżqu tal-media indipendenti u għajtu li kien skandlu kbir meta taħt Joseph Muscat l-Orkestra Nazzjonali rċeviet fondi mingħand oligarka Russu qrib ta’ Putin. Tiftakru kemm kien sar diskors dak in-nhar?

U fuq kollox tiftakru kemm għamlu plejtu tal-media indipendenti meta Joseph Muscat uża l-orkesta bħala parti mill-messaġġ tiegħu tal-Ewwel tas-Sena. Jien għadni ma nsejtx. Imma issa jidher tajjeb li l-Eminenza tagħha, il-Prinċipessa Roberta Metsola tista’ tuża l-Orkestra Nazzjonali għall-funzjoni privata tagħha bi spettaklu u reception wara għall-elite ta’ Malta u Għawdex.

Ara issa ma jimpurtax li għal din l-okkazzjoni, l-Eminenza tagħha, Roberta Metsola tuża lil Joseph Calleja biex ikantalha. Tiftakru meta Joseph Calleja kien offra s-servizzi tiegħu lil ta’ Henley. Ara hemm kellna boycott. Imma meta tkun Metsola, kollox jinbidel.

Fuq kollox, kien hemm xi ħadd li staqsa kemm kien hemm ġurnalisti mill-media indipendenti li ġew mistiedna biex jattendu għal dan il-kunċert? Dawn huma ġurnalisti li jridu jinvestigaw lil kulħadd u kollox. Ara huma mbagħad, ma jiddejqux jattendu kunċerti proġettati bħala attivita’ esklussiva għas-sinjuri u l-elitisti ta’ Malta u Għawdex u anki jmorru wara r-reception, jieħdu drink magħhom.

Huwa fatt magħruf li Metsola ilha li startjat il-magni tal-kampanja tagħha għall-elezzjonijiet Ewropej. Huwa ċar li quddiem il-kriżi li qed jiffaċċja l-gvern ta’ Robert Abela, Metsola qed tibni l-alleanzi mal-elitisti ta’ Malta li għandhom il-kapital biex jiddeterminaw min jista’ jiggverna lill-pajjiżna. Qed tagħmel kif għamel Joseph Muscat qabel l-2013 u qed tagħmel agreements mal-aktar nies b’saħħithom finanzjarjament ġewwa pajjiżna. Ara hemm ma jimpurtahiex li dawn jista’ jkunu potenzjalment involuti f’money laundering.

Allura quddiem dan kollu, il-media hekk imsejħa indipendenti, li kellha l-ġurnalisti tagħha għal din l-attivita’, ma kellhiex interess tirrapporta liema politiċi attendew għal dan il-kunċert u liema businessmen bi spallejhom wesgħin kienu preżenti? Infakkar li wara dan il-kunċert kien hemm reception il-Każin Malti. Ara fuq din ir-reception, il-gazzetta Illum ma qaltilna xejn, Xi ħadd staqsa kemm ġie jiswa’ dan ir-riċeviment?

Infakkar li Metsola tħobb ittella’ r-ritratti tal-attivitajiet tagħha fuq Facebook. Anki meta tkun qed tiekol xi pastizz tara r-ritratt tagħha fuq Facebook biex tidher ‘humble’. Imbagħad għamlet festa daqshekk kbira biex tiċċelebra l-għoxrin anniversarju tat-tieġ u ma kitbet xejn? L-anqas ritratt wieħed? Għaliex? Ma hix xi mara li tiddejjaq mill-pubbliċita’ fuq il-Facebook!

Imma l-ikbar daħqa hija hawn. Waqt li t-top journalists tal-media indipendenti kienu mistiedna għal din l-attivita’, għax dawn huma mitqiesha tal-first tier, dawk tal-Medialink ma kienux mistiedna għaliex dawn mitqiesha bħala second jekk mhux third rate journalists minn Roberta Metsola. Imma mbagħad l-istess Metsola tippretendi li dawn ikunu dejjem hemm għas-servizz tagħha jew kif ngħidu at her beck and call, bħal l-iskjavi ta’ żmien l-imperu Ruman. Mela tajjeb. Metsola l-ħin kollu tordnalhom lill-ħaddiema tal-Medialink u mbagħad l-anqas biss stidniethom. Infatti ħafna minnhom huma nkazzati ħafna.

Mhux ta’ b’xejn li Metsola ma tellgħetx ritratti ta’ din l-attivita’ biex turi kemm kienet lavish mal-elitisti ta’ Malta għaliex kieku għamlet hekk kienet tkun biss tkompli troxx il-melħ fuq il-ferita’ li jisimha l-finanzi tal-Partit Nazzjonalista. Kulħadd jaf li l-finanzi huma ħżiena. Ħafna mill-ġurnalisti li jinstabu at her beck and call l-anqas jafu jekk hux ser jitħallsu fl-aħħar tax-xahar minħabba l-qagħda tal-Partit. Imbagħad minflok tara kif Metsola kif tista’ tgħin il-partit, tara kif ittajjar dawn l-eluf ta’ ewros kollha biex tifforma alleanzi mal-elitisti ta’ Malta.

Biss meta niġu għall-house visits u l-house gatherings, hemmhekk l-affarijiet jinbidlu. Jien ninsab infurmat li hemmhekk Metsola tippretendi li dawn jitħallsu mill-attivisti tagħha u mhux minnha. Tkellmu man-nies li jagħmlulha l-house gatherings u taraw kif dawn dejjem ikollhom iħallsu kollox huma.