Il-Ħadd li għadda, Metsola għamlet kunċert fil-Manoel u l-media tgħid kemm kien ħelu; kieku għamlu Joseph Muscat, l-istess media ilha ġimgħa tgħajjat li dan skandlu kbir.

Mela Illum tatna l-aħbar li l-Ħadd li għadda, il-koppja Metsola għamlet kunċert privat fil-Manoel Theatre. Xi ħadd qalli li dan il-kunċert privat sar għaliex kellhom l-anniversarju. Imsomma skont dan is-sors dan kien ir-rigal ta’ Metsola lir-raġel tagħha. Illum hi parti mill-Malta Today u allura qed tagħti spallata lil Metsola billi ddiskrivit dan il-kunċert bħala xi ħaga romantika.

Immaġinaw ftit li kieku kien Joseph Muscat għamel xi kunċert bħal dan x’kien jinqala’. Immaġinaw għamel kunċert fil-birthday tal-mara kemm kienu jgħidu li hu skandlu. Imma għaliex għamlitu Metsola, ġie deskritt bħala kunċert romantiku ta’ min ifaħħru.

Issa dejjem skont Illum, dan il-kunċert kien hemm Joseph Calleja u anki l-orkestra Nazzjonali. Naħseb li Calleja tħallas ta’ dan il-kunċert u sew għamel. U naħseb ukoll li l-orkestra tħallset ukoll.

Mhux ser nidħol kemm sewa Joseph Calleja imma xi ħadd qalli li biex tikri l-Manoel Theatre jiswa 3000 ewro waqt li l-kirja tal-orkestra tiswa minimu ta’ 8000 ewro.

Fuq kollox, preżenti kien hemm l-establishment tal-PN. Ma setax jonqos hux li jkun hemm anki Richard Caruana Cachia.

Dawn l-ispejjeż kollha għall-kunċert li dam xi siegħa b’kollox. Wieħed jikkalkula li għal dan il-kunċert intefqu bejn għoxrin u tletin elf euro. Imsomma mhux ta’ b’xejn li jiġġieldu biex jispiċċaw ġewwa l-Ewropa. U l-poplu jibla’ t-taxxi!

Infakkar kemm kien inqala’ nkwiet u tgħajjir għaliex Joseph Muscat għamel birthday party il-Girgenti. Dan il-kunċert ta’ Metsola sar ġimgħa ilu u l-media l-anqas biss qalet kelma waħda. Issa ppreżentat din l-aħbar l-Illum u din il-kakkata qed tkun muriha bħala pudina tfuħ.

Fuq kollox, għaliex l-istess media, ma hix tistaqsix kemm ġiet tiswa’ din l-attivita? Fuq xi murtal tal-festi, il-media tal-Liberali jagħmlu għaġeb! Ara fuq il-festi tagħhom, ma jimpurtax li jitnefqu l-elufi u jġibu ruħhom qieshom xi prinċipijiet u rejiet.

Wara li dan is-sit ippubblika din l-istorja, irċevejt messaġġ mingħand partitarji Nazzjonalisti u qaluli li kien ikun aħjar li kieku dawn il-flus li nefqet Metsola biex tiċċelebra dan l-anniversarju tathom lill-Partit Nazzjonalista. Kieku għamlet hekk, kienet qed tkun tagħmel opra ta’ karita’ mal-istess partit. Hemm min saħasitra qed jgħid li nefqgħet aktar milli kkalkulajt jien, jiġifieri 30K u l-ispiża setgħet anki telgħet għal 40K.

Fuq kollox, Metsola titla’ bis-saħħa tal-Partit Nazzjonalista. Imsomma kulħadd qed jara kif jirkeb fuq dan il-partit, mhux għall-imħabba tal-patria jew tal-Partit Nazzjonalista, imma biex jara kif ħa jħaxxen butu. U biex tonfoq 40K fuq attivita’ ta’ siegħa trid tkun verament qed taqlagħha tajjeb minn fuq l-Ewropa! Fuq kollox, jekk ma ridtx tagħtihom lill-PN, xi ħadd ieħor qalli, dejjem setgħet tathom karita’.