Ta’ The Times jgħidu kemm hu kbir Melo Hili talli ħa jġib li fuq Kemmuna tista’ tmur biss jekk tiflaħ tħallas!

Minn qarrej ta’ dan il-blogg.

Inti lbieraħ tellajt storja dwar The Times u l-konnessjonijiet ċari tagħha ma’ Melo Hili u r-Repubblichini li huma biċċa waħda mal-istess Times. Infatti meta qrajt l-artiklu dwar Melo Hili u l-proġett tiegħu fuq Kemmuna ma ridtx nemmen l-għajnejha. Is-soltu ta’ The Times joħorġu qatta’ bla ħabel kontra l-iżviluppaturi. Iżda min qara l-gazzetta jew l-intervista’ ma’ Melo Hili, żgur ftakar f’George Orwell għax jidher li hemm xi annimali li huma aktar indaqs minn annimali oħra.

Mela jekk Portelli jibni bini għoli iqattgħuh u meta għamlulu intervista kienet biex jinfexxu fih.

Jekk Stivala idejjaq lill-ġirien isallbuh u fl-intervista li jagħmlulu idumu jagħtuh bil-frosta għall-ġimgħat.

Imma Hili le. Se jibni fi gżira li hija żona naturali protetta bil-pjan tiegħu huwa li ma tkunx tista’ tmur Kemmuna jekk ma tiflaħx tħallas u ta’ The Times jgħidulu kemm int kbir. Ma jridx familji b’dgħajjes żgħar għax idejjquh hemm. Irid biss cabin cruisers enormi. Dawk tajbin ħafna u ma jħammġux l-ambjent.

The Times għamlulu intervista iżda minflok staqsuh dan kollu, trattawh bl-ingwanti u kważi spiċċaw iċapċpulu. Kienet intervista mill-playbook tal-Pravda fi żmien l-Unjoni Sovjetika.

Mhux se ngħidu li The Times ħadu l-flus iżda l-ispag deher marbut. Forsi ikkonvinċihom bl-Ingliżati u raffinatezza li Portelli u Stivala m’għandhomx.