Il-każ tat-tabib Naged Megally; każ ieħor fejn il-qorti tal-appell tikkrea inġustizzja flok tagħmel ġustizzja ma’ persuna li dan il-gvern irid joqtolha bil-ġuħ.

Il-Ħadd li għadda, il-Mument tatna l-istorja tat-Tabib Naged Megally. Dan hu tabib, fl-opinjoni ta’ dan is-sit, vittma tal-arroganza li teżisti llum fl-awtorita’ jew dipartiment tal-gvern. Flok il-qrati tal-Appell tagħna jaraw li din l-arroganza tiġi mrażżna, qed jispiċċaw jagħtuha r-riħ. Dan is-sit iltaqa’ mat-tabib Megally u ser ikun qed jitkellem dwar il-każ tiegħu.

Dan it-tabib ilu fil-professjoni sa mill-1988 meta beda jservi fl-isptar Karen Grech u wara fl-isptar Mater Dei. Wieħed jistaqsi, għaliex qed jiffaċċja problemi kbar u ilu f’din is-sitwazzjoni mill-2013? Dan it-tabib Naged Megally ilu jagħmel ix-xogħol ta’ ultrasound ta’ ommijiet fit-tqala għal bosta snin. Kellmuni ommijiet li kienu taħtu u qaluli li mn’Alla kien hu għaliex kieku ma kienx hu, it-tarbija tagħhom illum mejta. Iżda mill-2013, lil hawn, dan it-tabib kien fil-mira ta’ vendikazzjonijiet u diskriminazzjoni mill-għola Awtoritajiet tal-iSptar Mater Dei. B’hekk kellu jidħol il-qorti.

L-ewwel qorti, immexxija mill-imħallef Grazzju Mercieca tagħtu raġun. Imma l-qorti tal-appell, immexxija mill-prim imħallef Chetcuti – li jiddispjaċini ngħid għandu record ikrah ta’ kif isib ix-xagħra fl-għaġina biex jaġevola l-ħmieġ tal-awtoritajiet, qaleb din is-sentenza. B’hekk dan it-tabib ma fadallux triq oħra ħlief li jmur quddiem il-Qorti Ewropea tad-Drittijiet tal-Bniedem.

Dan it-tabib kellu intervista twila mal-gazzetta il-Mument. Minħabba dak li dan it-tabib ilu għaddej minnu wasal biex jiddikjara li “U ma nistax nifhem għal xix, għaliex jien dejjem qdejt ħidmieti bl-aktar mod dedikat u serju. Imma għaliex jien għandi diżabbiltà, allura jridu jkissruni minn kollox”. Hu qal hekk għaliex mhux biss tilef il-kawża issa fl-appell, imma minħabba din is-sentenza ta’ Chetcuti u żewġ imħallfin l-oħra, dan it-tabib ma jistax jaħdem Mater Dei u l-anqas jista’ jaħdem privatament u l-anqas jista’ jsiefer.

Megally huwa tabib speċjalizzat fil-qasam tal-Fetal Medicine. Din twassal biex ikollu ċertifikat tal-ispeċjalizzazzjoni tiegħu li jingħata kull sena u li għadu jgawdi minnu sal-lum. Huwa saħansitra kien it-tabib pijunier li daħħal għall-ewwel darba dawk li huma magħrufa bħal 4D Scans.

Fl-2013, mal-bidla tal-Gvern, kien hemm bdil fl-amministrazzjoni tal-isptar Mater Dei. Minn dik in-nhar bdew jitfaċċaw il-problemi għal Dr. Megally. Il-problemi qalagħhom l-Uffiċjal Eżekuttiv Ewlieni tal-istess sptar meta ma ħallliex lit-tabib juża s-sistema 4D Scans li għalihom kien hemm sitt magni. Barra minn hekk fuq direzzjoni tal-istess uffiċjal dan is-servizz permezz ta’ dawn il-magni twaqqaf għal kollox għax skont l-uffiċjal, dan kien ‘ħala ta’ ħin’.

Fis-snin ta’ wara il-Kap tad-Dipartiment ta’ dan it-tabib li kien jimxi id f’id mal-uffiċjal għoli tal-isptar kompla jnaqqar u jnaqqas mir-rwoli li kellu l-istess tabib b’tali mod li spiċċa jservi fl-isptar Mater Dei għal ġurnata waħda biss. Jirriżulta wkoll li din is-saga baqgħet għaddejja għaliex fl-2018 waqt li kien qed jara xi pazjenti daħal fuqu l-Kap tad-Dipartiment u ordnalu biex jitlaq mill-klinika fejn kien qed iservi bir-raġuni tkun li Dr Megally kien idum jara l-pazjenti għax kellu problema, naturalment kien qed jirreferi għall-problema fiżika li għandu t-tabib.

Meta kkuntatja l-Uffiċjal Eżekuttiv Ewlieni, dan mhux talli kkonferma dak li ddeċieda l-Kap tad-Dipartiment li jkeċċih mill-klinika, talli żied u qal lill-istess tabib li mhux kien ser ikeċċih mill-klinika tal-Obstetrija u l-Ginekoloġija biss, iżda mill-Isptar Mater Dei kollu. It-tabib ma kellux triq oħra ħlief li jikteb lill-Ministru, li waqqaf inkjesta. Ftit wara bagħat għat-tabib l-Uffiċjal Eżekuttiv Ewlieni li sa dak in-nhar kien tbiddel u qallu biex iwaqqa’ l-każ. Ir-riżultat tal-inkjesta kien kontra t-tabib u allura ma kellux triq oħra ħlief li jmur il-qorti. Imma mbagħad meta tara kif kien kompost dan il-bord ta’ inkjesta li ried il-Ministru Fearne, tinduna kif jinħadmu nkjesti fażulli minn dan il-gvern. U mbagħad, dan il-gvern ma jridx li ssir inkjesta għall-mewt ta’ Sofia, għaliex jaf li din ma jistax jimmanipulaha.

Għalkemm fetaħ il-kawża, ma naqsux it-tentattivi biex ikeċċu lit-tabib Megally mill-professjoni tiegħu. Il-kawża nqatgħet favur it-tabib u saħansitra ġie mogħti kumpens imma l-Gvern appella, u s-sentenza tal-appell marret kontra t-tabib. Issa dan it-tabib ma fadallux triq oħra ħlief li jmur quddiem il-Qorti Ewropea għad-Drittijiet tal-Bniedem. Wieħed jispera li dan it-tabib isib ġustizzja ġewwa l-Ewropa.