Id-diskussjoni llum fil-qorti kienet li l-leak sar minn persuni qrib ta’ Repubblika: grazzi għalihom il-Lejber avvanz f’ġimgħa b’aktar minn ħamest t’elef vot.

Id-diskussjoni llum fil-qorti kienet dwar il-leaks li ħareġ Mark Camilleri. Ovvjament, dawn iċ-chats kienu għand ftit nies, jiġifieri għand il-maġistrata Rachel Montebello u l-entourage tagħha. Kienu għand l-avukat Ġenerali Philip Galea Farrugia u l-pulizija li qed tmexxi l-każ, fosthom is-Supretendent Arnaud. Kienu wkoll għand l-avukati tal-familja Caruana Galizia, jiġifieri Jason Azzopardi u Therese Comodini Cachia u allura għand il-familja Caruana Galizia. Magħhom hemm l-avukat tad-difiża. Ma għandix dubju, li l-avukati tad-difiża ta’ Yorgen Fenech ma għandhomx interess li joħorġu dawn il-leaks. L-anqas naħseb il-maġistrata u l-entourage tagħha.

Dak li hu żgur li kull meta joħorġu leaks bħal dawn, joħorġu permezz ta’ terzi, jiġifieri wieħed jgħaddihom lil xi ħadd u dan ix-xi ħadd għaddihom lil min ikun ser jippubblikahom, f’dan il-każ Mark Camilleri. Issa id-diskussjoni llum bejn l-avukati fil-qorti kienet li dawn għaddiehom lil Mark Camilleri xi ħadd minn ta’ Repubblika. U peress li dan beża’ li jinqabad u jekk jinqabad, jista’ anki jitlef il-warrant, jekk mhux ukoll xogħlu u jispiċċa l-ħabs, u l-każ ta’ Yorgen Fenech aktar jikkrolla, qam paniku sħiħ u ħarġu jiġru jorganizzaw protesta, għaliex issa d-diskors tar-rule of law inbidel. Fi kliem ieħor ħarġu jipprotestaw biex jagħmlu pressjoni ħalli dan il-persuna ma jinqabadx. Fl-istess waqt, il-media hija f’kukkanja titkellem dwarhom u tipprova tiġġustifika l-ħruġ tagħhom, għaliex qed tibża’ li dan il-leak ser jaħdem, in the long run, favur Yorgen Fenech.

Sadanittant, din l-istorja kollha wasslet biex il-PN tilef il-voti mhux rebaħ. Minn kalkolu li għamilt, tilef favur il-lejber mal-5 t’elef vot. Ħafna Laburisti li kienu mdejqin mill-Lejber jew irrabjati għal Robert Abela – quddiem din il-politika kollha tal-mibgħeda – iddeċidew li mhux ser jastjenu imma ser jivvutaw Lejber.

Fi kliem ieħor, min ħaseb li b’dan li għamel ser iwassal għat-tmiem tal-karriera politika ta’ Rosianne Cutajar, Cutajar aktar issaħħet mal-grassroot Laburista. Dan Robert Abela jafu sew. Tant li lbieraħ il-Ħadd setgħu jgħajtu faċilment laqgħa pjuttost imdaqqsa fil-Kwartieri Ġenerali – li sa ftit ilu kien diffiċli għal Robert Abela li jiġbor daqshekk Laburisti għal-laqgħat tiegħu.

Grazzi għal Cutajar u għall-balbuljata ta’ Mark Camilleri, il-Lejber ser jiffoka issa fuq ir-roots tiegħu u jara li jkunu warajh. Xi ħaġa li qatt il-PN ma ried jagħmel – anzi biex jisma’ minn ta’ Repubblika dejjem tahom bis-sieq. B’hekk l-istrateġija hija, li mill-lum ‘l quddiem, il-Lejber jaħdem biex jirkupra d-distakk li naqas. Dan ser jagħmlu mhux biex jirbaħ l-Ewropej imma li sa erba’ snin oħra jerġa’ jġib id-differenza tal-voti li ġab fl-aħħar elezzjoni.

Illum il-Lejber qed jogħrok idejh. Ser jara li wara l-Ewropej, Roberta Metsola tkun kap, għaliex jaf li Metsola ma tistax tisraqlu voti. Issa ħareġ anki fl-aħħar survey, li jekk kien hemm persuna fil-Partit Nazzjonalista li setgħet tnaqqar il-voti tal-Lejber, din il-persuna kienet Adrian Delia. Dan jien kont ktibtu imma kulħadd iddieħaq bija. Ara issa, The Sunday Times, kellha tikxef dan il-fatt. Qatt ma qalitu meta riedet ittajjar lil Adrian Delia.

Imma kif jgħidu bl-Ingliż, more pleasure to come fil-kamp politiku Malti. Imma sakemm jibqa’ Bernard Grech u sħabu ta’ Repubblika, il-PN huwa ddestinat li jibqa’ fl-Oppożizzjoni.