Fejn hu l-prinċipju tar-rule of law f’dan kollu?

Minn Edwin Vassallo

Irridu niffaċċjaw il-verita’, naħsbu u wara nitkellmu u jekk hemm bżonn nipprotestaw. Jekk xejn il-protesta tal-bieraħ wriet li f’pajjiżna r-rispett lejn il-verita’ ma għadux valur. Il-protesta tal-bieraħ uriet li r-rispett lejn dak li huwa sewwa qegħdin nitilfuh bil-minuta. Il-protesta tal-bieraħ uriet li hawn wisq rabja f’demmna, immexxija mill-mibgħeda u mhux mir-raġuni. Il-protesta tal-bieraħ kienet maħsuba biex tkompli ssaħħan lin-Nazzjonalisti kontra l-Laburisti. Din ir-rabja hija riflessjoni tal-mibgħeda li nżergħet u qed tkompli tinżera’. Issa mill-mibgħeda ser nimxu għall-ħdura bejnietna.

Il-ġurnalisti u l-ħbieb tagħhom għandhom wisq għatx għall-poter, imma ma għandhomx għatx għas-sewwa. Il-ġurnalisti u l-ħbieb tagħhom iridu l-poter mhux biex jagħmlu l-ġid, imma biex huma wkoll jaħilbu l-baqra li jisimha gvern. Min mhux jaħleb irid jara kif ser jaħleb u min kien jaħleb issa qed jitkellem baxx jew jibdel l-argumenti u jitkellem bil-maqlub ta’ dak li kien jgħid fl-imgħoddi, għaliex ma għadux jaħleb. L-aqwa li naħilbu. Dan kollu għall-fini ta’ dan l-argument ngħidlu li huwa mafja. Din il-klikka saret il-mafja li issa trid tieħu post il-mafia li hemm biex tibda taħleb il-baqra hi. Għalhekk, din ma kienetx protesta għall-valuri. Din ma kienetx protesta għar-rispett lejn il-ġid komuni u t-tisħiħ tad-dinjita’ umana. Din kienet protesta ffukata fuq il-prinċipju għat-tisħiħ tal-mibgħeda.

Għalhekk nemmen li rridu niġġieldu l-ħażin bit-tajjeb u mhux billi niddefendu lil min, b’għemilu jagħmel il-ħażen. Ma naqbel qatt li l-ħażin jkun miġġieled bil-ħażin. Jien nemmen li niġġieled l-inġustizzja bil- ġustizzja u mhux billi nikkrea aktar inġustizzja. Niġġieled il-korruzzjoni bl-onesta’ u mhux billi niddefendi min kien diżonest. Dan nemmnu għaliex jien nisrani fil-politika. Dak li qed naraw huwa biss egoiżmu. Dak li qed naraw huwa kif ikun leġittimizzat min qatt ma ried ikun parti minn raġunar loġiku demokratiku u minn f’ħajtu dejjem fittex li jkun rent-seeker.

Aktar milli nipprotestaw, bħala poplu għandna ħafna x’nitgħallmu minn din l-istorja ta’ dawn il-“leaks” li ġew ippubblikati. Bħala poplu għandna ħafna x’nistaqsu qabel ma naraw kif u fejn ser nitfgħu r-raġunar tagħna. Dawn huma ftit mistoqsijiet li rridu nagħmlu biex nifhmu jekk il-protesta tal-bieraħ kienetx leġittima jew le.

Dawn “il-leaks” minn fejn ħarġu?
Min hu responsabbli li jara li dan il-leakage ta’ informazzjoni, li kienet sa fejn naf jien f’dominju tal-qrati, ma sarx dominju pubbliku?
Min qed jonqos mis-serjeta’ f’għemilu?

Dawn il-leaks huma ġġustifikatti li jsiru pubbliċi?

Fuq kollox, b’dawn il-leaks sirna nafu affarijiet li ma konniex nafu ta’ natura pubblika?

Jekk “le” għaliex qegħdin narahom iġġustifikati?

Għandha tkun il-folla, kemm jekk ħamra jew blu, tgħid kif għandha ssir il-ġustizzja?

Għandha l-folla tibda tkun l-investigatur, l-imħallef u l-bojja?

Hija l-qorti jew il-folla li tgħid x’inhu sewwa?

U x’ser jiġri minn dik il-folla li la hija blue u lanqas ħamra u li tilfet kull fiduċja fil-politiċi tagħna?

Din il-protesta tal-bieraħ, lil din il-folla li la hija blu u lanqas ħamra kompliet tkabbarha jew tnaqqasha?

X’qiegħed ikun il-mottiv ta’ kull deċiżjoni li nieħdu dwar dan kollu? Hija r-rabja tagħna kontra l-ħażin jew r-rabja tagħna kontra dak li hu kontroversajli? Jew hija r-rabja tagħna kontra l-korruzzjoni fil-politika?

Aħna qed naqblu ma’ dak li għamel Mark Camilleri għaliex issa hekk jaqblilna bħala Nazzjonalisti jew għaliex issa dan sar punt ta’ prinċipju?

U jekk hija r-rabja u/jew il-mibgħeda lejn dak jew l-ieħor li qed tmexxi dan kollu, dan is-sentiment huwa ġust li nippermettuh li jkun il-mottiv u l-iskop ta’ kundanna jew l-approvazzjoni tagħna ta’ dawn il-leaks?.

Huwa politikament ġust li l-PN jagħmel l-argument politiku li qed jagħmel u juża nformazzjoni li ħarġet b’mod illegali għaliex kienet oriġinarjament taħt il-protezzjoni tal-qorti bħala punt ta’ argument politiku?

Huwa korrett li tiġġieled kontra l-korruzzjoni politika b’mod korrott?

Fejn hu r-rule of law f’dan kollu?

Jien nemmen li dan il-leak ta’ informazzjoni huwa preċedent ikrah u fir-realta’ huwa att kriminali.