Priġunier qed jirrifjuta t-trattament mediku kontra l-kanċer bi protesta talli d-Direttur tal-Ħabs qed jirrifjuta li jiltaqa’ miegħu

Prigunier li għandu kanċer ilu ġimgħat jistenna biex jitkellem mad-direttur tal-ħabs il-ġdid. Imma sal-lum id-Direttur għadu ma tax widejn għat-talba tiegħu. Dan wassal biex dan il-priġunier issa ilu għal din l-aħħar ġimgħa jirrifjuta trattament għall-marda tal-kanċer bi protesta għax qed jgħid li b’hekk forsi jiġbed l-attenzjoni tad-Direttur.

Wieħed irid ifakkar li d-Direttur preżenti, qabel ma leħaq direttur kien il-kummissarju għall-ħarsien tal-ħabsin. Jidher li issa għax biddel il-kappell u libes dak ta’ direttur qed jirrifjuta li jkellem lil dan il-priġunier.

Dan huwa ksur sfaċċat tal-liġi li tirregola l-istess ħabs fejn tgħid ċar li d-direttur hu obbligat li jkellem, jisma u jara x’għandhom bżonn il-ħabsin rrilevanti jekk hemmx kummissarju għall-ħarsien tal-priġunieri jew le.

Wieħed jistaqsi jekk il-Ministru tal-Intern, Byron Camilleri, hux infurmat b’din is-sitwazzjoni jew le? Jekk hu nfurmat wieħed jistenna li billi hu avukat jispejga lid-direttur li hu obbligat li jismà il-priġunieri li jridu jitkellmu miegħu u mhux jinħeba wara l-persuna tal-Kummissarju għall-Ħarsien tal-Priġunieri.

Dan ikompli juri kemm il-Ministru Byron Camilleri għaġġel meta ħatar lid-direttur il-ġdid mingħajr ma l-ewwel evalwa sew kull possibilta’. Dan kollu jikxef kif il-ħabs mhux veru li qed jitmexxa qisu m’hemm problemi ta’ xejn u business as usual imma bil-kontra il-problemi qed jinħbew biex jaħbu r-realtajiet diffiċli li qed jiżdiedu fil-ħabs kuljum.

Fuq kollox, jekk kien hemm prova ta’ kemm ir-realtajiet huma ħżiena, wieħed għandu biss iħares lejn x’ġara fil-każ tal-prison leave, fejn l-awtoritajiet jidher ċar li qed jgħattu lil min hu verament risponsabbli wara din l-istorja kollha.