L-ELC Ltd issir GEB Ltd

Mill-bidu ta’ din is-sena, il-kumpanija GEB Ltd ħadet post il-konsorzju ELC Ltd li għal dawn l-aħħar għoxrin sena kienet tieħu ħsieb il-landscaping tal-pajjiż kollu billi tħaddar u tħawwel fjuri fil-ġonna u t-toroq tagħna.

Dan ġara wara li l-gvern ħareġ tender għal dan il-għan u l-irħas offerta rebħet. Illum xahrejn wara li din il-kumpanija rebħet dan it-tender, wieħed qed jinduna u jara differenza tanġibbli fit-toroq tagħna. Il-gvern flok ra li bil-prezz offrut mhux ser jonqos is-servizz, ra biss li jiffranka xi ħaġa. Ara fejn jidħlu l-isptarijiet tagħna, il-gvern ma jrid jiffranka xejn imma jibqa’ jħallas il-miljuni fis-sena lil Stewards u minnhom m’hu qed jieħu xejn.

Jekk wieħed jidħol il-Belt Valletta u jgħaddi minn Triq Santa Anna fil-Floriana ma jarax fjuri li jsebbħu l-ambjent kif ilna snin imdorrijin naraw imma jara ċentral strip imneżża minn kull kulur tal-fjuri. Ma’ din it-triq insemmi ukoll Triq Dun Karm Psaila Birkirkara (Birkirkara bypass) fejn il-water feature u d-dawl li jsebbaħ matul il-lejl ilhom mitfija ġimgħat sħaħ apparti li fjuri ma jidhru mkien. Hawn nistgħu nżidu r-round about ta’ quddiem l-isptar Mater Dei u ħafna oħrajn jinsabu bla fjuri.

Ħaddiema li tkellmu ma’ dan is-sit qalulna li meta tkellmu minħabba l-overtime li qabel kien jingħata u hemm bżonnu minħabba n-nuqqas ta’ nies, ir-risposta kienet li biex nagħtu l-overtime inġibu l-ħaddiema mill-India u noħorġu b’irħas. Hu li għalhekk l-aqwa ġardinara tal-gvern li kienu jaħdmu mal-konsorzju ELC Ltd marru lura mal-gvern għax ma ħassewhomx komdi bil-pakkett finanzjarju li ngħataw u l-mod ta’ kif ġew trattati mill-kumpanija GEB Ltd.

Wieħed jistenna li l-gvern jara li jkun viġilanti li l-kumpanija l-ġdid GEB Ltd tkompli fuq l-istess livell li aħna imdorrijin bih u tara li jekk hu possibli itejjbuh ukoll. Wisq nibża’ li you pay peanuts you get monkeys!