It-tweġiba tiegħi lil Mario de Marco li jrid jibdel lill-PN f’Partit Liberali

Minn Edwin Vassallo

Meta l-PN ħa deċiżjoni li jsir wieħed liberali spiċċa ma jintgħarafx mil-Labour u minn dak iż-żmien ‘l hawn beda jitlef. Dan beda jseħħ b’mod partikolari fi żmien Lawrence Gonzi. Infakkar li minn żmien Gonzi, il-PN pprova jagħmel politika li togħġob lil ta’ The Times u għalhekk in-nies bagħtuh fl-Oppożizzjoni. Din kienet il-vera raġuni għala l-Lejber beda jerbaħ. Nixtieq infakkar li meta Mario de Marco kien viċi-kap, hu mexxa din il-politika liberali u pprova jogħġob lil ta’ The Times. U x’ġara? Il-PN kompla jitlef. Illum l-istess poplu, li skont l-istess de Marco huwa aktar liberali spiċċa bi kwart mill-elettorat ma għadx għandu fiduċja fil-politiċi.

Sinjuri politici tal-PN; ma taħsbux li “the writing is on the wall“? Bil-liberaliżmu kollu li pprova jilbes il-PN, bil-għajnuna ta’ The Times u l-ħbieb kollha elitisti li riedu l-PN ikun liberali, xorta waħda, dan il-partit baqa’ partit tellief? S’issa l-PN għandu ammistrazzjoni li temmen li żmien il-valuri spiċċa. U minn dak iż-żmien li l-PN beda jemmen hekk, baqa’ qatt ma ħa r-ruħ.

Bil-liberaliżmu u l-libertinaġġ kollu li qed ikollu jdaħħal Robert Abela, anki l-partit tiegħu qed jitlef il-voti. Mela mhux veru li bil-liberaliżmu u l-libertinaġġ ser terbaħ il-voti. Infakkar li kull nhar ta’ Ħadd, Robert Abela jgħid lill-folla li jkollu quddiemu li ż-żewġ partiti mhux l-istess. Iżda mhux dak li jgħid Robert Abela jiswa. Dak li jiswa huwa x’jgħidu u jaħsbu n-nies. Il-fatt huwa li għal ħafna Laburisti, iż-żewġ partiti spiċċaw l-istess, għaliex illum il-politika li qed jaraw fil-partit fil-gvern hija dik tal-arrogonza. Infakkar li kienet din il-politika tal-arroganza li tefgħet lill-Partit Nazzjonalista l-baħar. Infakkar li din il-politika tal-arroganza tmexxiet fil-PN mill-istess persuni li qed imexxu l-aġenda Woke u Liberali f’dan il-partit.

U x’inhi l-politika tal-arroganza? Il-politika tal-arroganza hija dik il-politika li ħadd ma jimpurtah miż-żgħir. Li ħadd ma jimpurtah min-nies. Anzi hija dik il-politika li tara lin-nies dubbien. Dan huwa l-liberaliżmu. Din hija l-politika li spiċċat temmen fil-kbir, fis-sinjuruni u mhux fin-nies. Din hija l-vera raġuni għala n-nies qed jitilqu lill-partiti politiċi. L-attendenza għall-attivitajiet politiċi qedha dejjem tonqos.

Li tkun Konservattiv ma fiha xejn ħażin. Jien nemmen li tkun politiku “fake” hija l-ħażin. Jien nistmerr politiċi fake, jiġifieri politiċi li jilbsu libsa b’mod u jkunu jemmnu b’mod ieħor. Issa jekk il- PN ma jridx jibqa’ Konservattiv għaliex skont Mario de Marco l-poplu huwa liberali, allura min irid ikun ġenwien miegħu nnifsu l-ewwel irid isejjaħ Kunsill Ġenerali ieħor ħalli jibdel l-istatut tal-PN, għaliex l-istatut tal-PN huwa statut ta’ partit Konservattiv.

Dak li nista’ ngħid li wara d-diskors tal-bieraħ ta’ Mario De Marco, jien sirt aktar nemmen li hemm futur inċert għall-Partit Nazzjonalista. Jekk xejn fil-Kunsill Ġenerali tal-Partit Nazzjonalista kellna konferma kemm il-politika Maltija nħakmet mill-arroganza tal-elitisti. Waqt li nieħu gost nara li l-kap tal-Partit Nazzjonalista jirrikonoxxi dan bħala fatt, stqarrijiet li saru waqt dan il-kunsill ikomplu jikkonfermaw l-attitudni li teżisti fost il-liberali li hemm fil-Partit Nazzjonalista li jaraw lil dawk ġenwieni li jikkritikaw il-politika woke u liberali ta’ dan il-partit dubbien.

Huwa dan il-liberaliżmu li qed iwassal biex il-poplu tagħna jitlef il-fiduċja fil-ġejjieni ta’ pajjiżu. Infakkar li skont l-aħħar survey, għandna kwart tal-poplu li tilef il-fiduċja fiż-żewġ partiti. Din l-emoroġija ta’ sfiduċja fil-politika hija riżultat tal-fatt li n-nies ma għadx għandhom fiduċja fl-awtoritajiet u l-istituzzjonjiet ta’ dan il-pajjiż għaliex l-istituzzjonijiet tagħna tilfu l-awtorita’ morali tagħhom.

Il-kriżi politika u demokratika ta’ pajjiżna hija waħda morali fejn il-flus, l-egoiżmu, l-individwaliżmu ħakmu u qed jġibu fix-xejn liż-żgħir. Huwa dawn il-weġġgħat li l-Partit Nazzjonalista jrid jindirizza jekk irid verament jagħti tama lill-poplu Malti. Għaliex meta kollox jibda jkun ivvalutat skont il-flus, il-bniedem jiġi ma jiswa xejn.

Kienet din il-politika liberali li wasslet biex il-PN spiċċa partit li jinstiga l-mibgħeda. Mela dak li hemm bżonn illum fil-PN huwa li dan il-partit jmur lura għall-prinċipji bażiċi tiegħu. Dan il-partit irid jerġa’ lura lejn il-politika li sservi lill-bniedem u mhux il-flus. Il-ġlieda wara min ikun kap hija ġlieda li ssir minn dawk li lesti jisfruttaw lill-poplu biex bħal kbar, igawdu huma u ż-żgħar iħallsu għaliha. Din hija l-loġika ta’ dawk li jridu jaħkmu fil-PN. Il-futur tal-PN ma għandux ikun deċiż mill-power mongers iżda mill-poplu. Finalment il-futur tal-PN huwa wkoll il-futur ta’ pajjiżna.

Mela dak li jeħtieġ pajjiżna hija politika Konservattiva li temmen u jimpurtaha min-nies u mhux politika Liberali li tuża lin-nies u tarmi lin-nies wara li tinqeda bihom. Dan huwa l-qofol tal-politika Liberali għaliex il-politika liberali għan wieħed għandha – dak tal-alla tal-flus u fejn jidħlu l-flus, the end justifies the means.