L-issue tal-Kaċċa fl-iskejjel tagħna

Minn Edwin Vassallo

Matul dawn il-jiem kellna l-polemika dwar esebizzjoni li ser tkun qed issir fl-iskejjel Għawdxin dwar il-kaċċa. L-union tal-għalliema ma qablitx ma’ din l-esebizzjoni. Il-Kummissarju tat-Tfal ma qablitx anki jekk wieħed irid jgħid li s-surmastrijiet tal-iskejjel tħallew fil-liberta’ jekk itellgħux din l-esebizzjoni jew le.

Nifhem li hawn min ma jaqbilx mal-kaċċa u l-insib u għalhekk kontra dan it-tip ta’ esebizzjonijiet fl-iskejjel. Nifhem il-preokkupazzjoni tal-Kummisarju tat-Tfal dwar il-possibilita’ li esebizzjoni bħal din tista’ ddaħħal kunċett ta’ abbuż fl-użu tal-armi fost it-tfal b’riżultat ta’ din l-edukazzjoni dwar il-kaċċa. Nifhem li hemm min qed jara f’din l-esebizzjoni mezz biex lit-tfal tagħna nikkundizzjonalhom ħajjithom. Nifhem min jgħid li b’din l-esebizzjoni qegħdin ninfluwenzawhom bil-mod ta’ kif jirraġunaw. Imma t-tfal tagħna ġa qed jiġu ikkundizzjonati bid-diskussjonijiet tagħna l-adulti. Għalhekk ħbieb tiegħi jeħtieġ inkunu konsistenti fir-raġunar tagħna fir-rigward ta’ x’jista’ u x’qiegħed jinfluwenza lit-tfal tagħna.

Jekk il-Kummissarju tat-Tfal, bir-raġun kollu, tibża’ li wirja dwar il-kaċċa tista’ twassal għall-probabbilita’ tal-użu tal-armi, bl-istess raġunar iridu noqogħdu attenti kif u x’qed nitkellmu u nagħmlu bħala adulti quddiem it-tfal tagħna. X’qed jisimgħu t-tfal tagħna li ser jgħinhom isiru adulti responsabbli? Ejjew naraw ftit x’qed jixorbu dawn it-tfal mid-dinja tagħna tal-adulti. Ara fuq dawn l-affarijiet ħadd ma qal xejn u ħadd ma hu qed jitkellem.

X’ngħidu għal-loġika liberali li tista’ tagħmel li trid b’ġismek? Huwa tajjeb li din il-loġika tkun mgħallma fl-iskejjel tagħna?

X’ngħidu għat-tagħlim fl-iskejjel tat-tfal żgħar tagħna li qed ngħidulhom li meta jridu jistgħu jsiru nisa jew irġiel skont kif iħossuhom fil-mument, minkejja li ġew imwielda raġel jew mara?

X’ngħidu għat-tagħlim fl-iskola dwar is-sesswalita’ u li din mhix determinata mis-sess li wieħed jitwieled bih iżda skont kif wieħed iħossu?

X’ngħidu għat-tagħlim lit-tfal żgħar dwar l-ugwaljanza tal-ġeneru iżda ma għadniex inkellmuhom rigward il-fatt li l-ugwaljanza hija bbażata fuq ir-rispett lejn id-diversita’ bioloġika?

X ‘ngħidu għall-mentalita’ divorzista li qed inkabbru lit-tfal tagħna fiha fejn qed jispiċċaw jemmnu li huwa sewwa li fiż-żwieġ x’ħin tiddejjaq miżżewweġ tista’ titlaq lill-mara jew lir-raġel għaliex illum kollox sar deċiż fuq x’nixtieq, is-sentiment u ma għadniex nitkellmu aktar fuq responsabbilita’?

X’ngħidu għall-mentalita’ li qed indaħħlu fost it-tfal li wieħed jista’ jkun miżżewweġ u jista’ jibdel iż-żwieġ tiegħu f’wieħed ta’ “open relationship”?

X’ngħidu għall-mod ta’ kif qed nitkellmu fuq is-sess mat-tfal tagħna, li s-sess illum sar ifisser “il-jien” u l-importanti huwa li nissodisfa lill-ġismi u ma jimpurtaniex li nkun qed nuża lill-ħaddieħor biex jien nissodisfa l-jien tiegħi?

X’ngħidu għall-mod ta’ kif qed nitkellmu fuq l-ambjent u ninsew għal kollox il-primat tal-valur tal- bniedem bħala l-għola valur fl-ambjent?

X’ngħidu għall-mod ta’ kif it-tfal qed jaraw lilna l-adulti li min lest li b’saħħa jiddefendi l-bajd tal-fekruna fuq il-bajja u fl-istess waqt ma jimpurtahx milli jiddefendi lit-tarbija fil-ġuf?

X’ngħidu għall-mod ta’ kif qed nitkellmu kontra wirja favur il-kaċċa, u min qed jikkundanna din il-wirja ma jgħid xejn kontra l-qtil ta’ tarbija innoċenti fil-ġuf tal-omm?

X’ngħidu lil min qed jgħid lill-għalliema li mhux sew li jkollna din l-esebizzjoni fl-iskejjel imma meta kien hemm ir-referendum tad-divorzju uża argument bil-kontra u ma ħalliex għalliema fl-iskejjel tal-knisja jqassmu materjal kontra d-divorzju għax qal li l-għalliema għandhom jibqgħu barra minn kwistjoni mhux purament edukattiva? Mela għala fid-divorzju, l-għalliema ma tħallux jindaħlu u f’dan il-każ l-unjon tagħhom trid li jindaħlu?

X’ngħidu għall-mod ta’ kif qed inkabbru lit-tfal tagħna fl-egoiżmu fejn “the end justifies the means”?

X’ngħidu għall-mod ta’ kif qed inkabbru lit-tfal tagħna jemmnu li għandek tieħu r-raġun b’idejk u b’hekk qegħdin inkabbru l-possibilita’ tal-vjolenza domestika bħala mod ta’ kif tasal biex tieħu raġun?

X’ngħidu ghall-loġika ta’ sfruttament li qed innisslu fit-tfal tagħna bil-mentalita’ konsumistika li kull ma tixtieq tista’ tixtrieh u li għandek tixtri kull ma trid?

X’ngħidu għall-mod ta’ kif illum bil-mod qed noqtlu it-tgħallim tar-reliġjon fl-iskejjel biex ngħidu li noffru l-għażla u qed ngħallmu l-“ethics” u issa qed nibdew naraw ir-riżultati fis-soċjeta tagħna?

X’ngħidu għall-mod ta’ kif qed jinkitbu ċertu aħbarijiet fuq il-mezzi tax-xandir u x’jimpurtana li f’dak il-ħin jkun hemm it-tfal jisimgħu?

X’ngħidu għal min jidgħi u jitkellem baxx u juża l-vjolenza fid-dar quddiem uliedu stess?

X’ngħidu għall-ħajja tagħna l-adulti u x’sens ta’ responsabbilita’ sar fiha llum u x’eżempju qed nagħtu lit- tfal tagħna li ser jkunu l-adulti ta’ għada?

Tajjeb jekk iridu nikkundannaw wirja favur il-kaċċa iżda meta nikkunnadawha ejjew naħsbu x’qed jaraw u jisimgħu t-tfal tagħna mill-egħmejjel tagħna l-adulti.