Hija gidba li fir-River of Love isir xi tip ta’ ‘conversion therapy’.

Mill-Pastor Gordon John Manche

Nixtieq nibda din il-kitba tiegħi, għażiż qarrej u qarrejja, billi ngħidlek tħallix aktar lil min jiżżuffjetta bl-intelliġenza tiegħek. Jien u dawk kollha li jattendu r-River of Love xbajna nisimgħu li ġewwa r-River of Love isiru xi tipi ta’ terapiji. Dan hu gideb u xejn għajr minn gideb. Verament għarukaża li hawn min qed ixerred dan kollu.

Dak li hu nkwetanti huwa l-fatt li dan il-gideb mhux jingħad min-nies kwalinkwe, imma min-nies li għandhom responsabbilitajiet pubbliċi bħal Gaby Calleja u issa anki l-istess Segretarja Parlamentari tal-Ugwaljanza, Rebecca Buttigieg. Alla jilliberana minn politiċi li jibdlu d-dekasterju tagħhom f’wieħed ta’ dominanza fejn jiġu bbulljati d-drittijiet taċ-ċittadini komuni. Qatt ma hu aċċettabbli f’demokrazija li grupp żgħir ta’ nies jaħtfu pajjiż sħiħ taħt idejhom permezz tal-gideb, l-oddju u qerq sfrenat. Għarukaża għalihom!

1. Ġewwa River of Love qatt u fl-ebda żmien ma saret xi tip ta’ terapija – jew saħansitra dak li huma jsejħu ‘conversion therapy’.
2. Ħadd qatt li ġie, attenda, jew xi darba kien ġewwa River of Love għal xi żmien, kellu jew ingħata xi tip ta’ terapija jew ‘conversion therapy’.
3. F’Malta ma kien hawn qatt u lanqas hawn issa xi ħadd li jagħmel jew jipprattika ‘conversion therapy’ għas-sempliċi raġuni li ‘l-conversion therapy’ ma teżistix u qatt ma kienet teżisti f’ebda rokna ġewwa Malta.
4. Allavolja dan ilu jingħad li din ma ssirx, xorta hawn min għandu interess li jgħid li din qegħda issir mir-River of Love.
5. River of Love hija knisja Kristjana Evanġelika Kariżmatika/Pentekostali li ma tipprattika l-ebda tip ta’ terapija! M’għandniex bżonnha u ma nemmnux fiha!
6. Ġewwa River of Love dejjem kien u għal dejjem ser jibqa jiġi pprietkat l-Evanġelu ta’ Ġesu Kristu, Sultan u Sid li skont il-Bibbja u t-tagħlim SĦIĦ tal-Appostli – hekk imsejħa l-Epistoli (ie. It-Testment l-Ġdid inter).
7. Hi x’inhi ‘l hekk insejħa ‘conversion therapy’, xorta m’għandniex x’nambuha, għax hija b’kull sens inferjuri ħdejn dak li jagħmel Ġesu fil-ħajja ta’ kull individwu li jersaq lejH b’qalbu sinċiera u għatxana għalih. Ġesu Kristu li nxandru u ħa nibqgħu nxandru huwa ĦAJ!
8. Għall-Maltin u l-Għawdxin kollha ta’ rieda tajba, u dawk kollha li daqu minn kemm huwa tajjeb il-Mulej, jafu xi tfisser li jkollok inkontru ħaj ma’ Ġesu Kristu, Sultan Rebbieħ. Ħajtek tkun ittrasformata!
9. Illum ħafna nies ta’ rieda tajba u integrita’ jafu li hemm aġenda qarrieqa liberali, militanti li qed tiġi pperpetwata minn xi wħud biex ikomplu jibbulljaw il-leħen ta’ Kristu u r-rwol tal-Knisja Tiegħu f’Malta. Tpaxxuhomx. Tħalluhomx ibellgħulkom iktar il-valenu tagħhom, waqt li qed jaħdmu biex iktar ikomplu jisirqulkom u jnaqqrulkom id-drittijiet tagħkom, naqra, naqra b’aljenazzjoni!
10. Kull min jemmen fil-liberta’ tal-għażla u tal-espressjoni, illum jemmen li kulħadd għandu dritt sagrosant li b’ħajtu u bih innifsu, jagħmel li jrid, jgħix kif irid, jemmen li jrid u jfittex servizzi, għajnuna, reliġjon, filosofija, eċċ li jrid, hu jew hi min hi u ħadd ma għandu dritt iwaqqfu jew jindaħallu!
11. Ħadd ma’ għandu dritt iwaqqaf lil xi ħadd milli jagħżel x’jemmen u x’jipprattika u kif jesprimi l-fehmiet tiegħu personali. Bil-Malti pur aħna ngħidu – tindaħalx! Dak li ma jridx wieħed, iridu l-ieħor, u dak li jogħġbu lil wieħed ma hux bilfors li jogħġob lill-ieħor.

Fl-aħħarnett, kulħadd għandu jirrispetta lill-proxxmu tiegħu u nkunu maturi li qabel ma’ ‘nillejbilja’ lil xi ħadd, ara li dak li smajt u qrajt humiex vera, għaliex il-gideb u l-ħażen u l-ħmieġ f’kull sfera tal-ħajja kiber ħafna u saħansitra ħataf parti kbira minn pajjiżna.

Jekk tħobb lil Alla, jekk tħobb lill-pajjiżek u lill-proxxmu u saħansitra tħobb lilek innifsek, tagħmilx dak li int ma tridx li jagħmlu lilek lill-ħaddieħor. Kun Integru u kun raġel u mara ta’ unur!

Missier Qaddis, f’isem Ġesu Kristu “Tiġi Saltnatek u jkun dak li trid Int, kif fis-sema u hekk ukoll fuq din l-art” ta’ Malta w Għawdex! Amen! (Mattew 6: 10.)

Barkiet.