Ikomplu jiżdiedu l-ħaddiema barranin mhux mill-Unjoni Ewropea ġewwa pajjiżna

Minn osservatur politiku

Skond rapport preżentat il-Parlament fil-bidu tal-ġimgħa, kien pubblikat li n-numru ta’ ħaddiema minn barra l-Unjoni Ewropea żdied b’għaxar darbiet. Fl-2011 kienu biss inqas minn 5,000 persuna minn diversi pajjiżi li kienu qed jaħdmu f’Malta. F’Awwissu tal-2022 dan in-numru tela’ għal 50,000. Din l-informazzjoni ħarġet permezz ta’ mistoqsija parlamentari fejn fiha l-Ministru tal-Finanzi u Xogħol qal li 52,664 kienu reġistrati f’pajjiżna biex jaħdmu f’Malta u Għawdex.

Mir-risposta wieħed jifhem li anke matul ix-xhur ta’ pandemija dan in-numru baqa’ jiżdied. Din hi l-politika li ħallewlna Joseph Muscat u Clyde Caruana. Qabel ma sar Ministru tal-Finanzi, Clyde Caruana kien imexxi l-Jobs+ u kien il-mutur wara l-influss ta’ ħaddiema barranin biex jistimula l-ekonomija.

Dak iż-żmien il-Kap Nazzjonalista Adrian Delia kien iwissi dwar din il-politika li timporta l-barranin mingħajr ma tieħu ħsieb jekk tiflaħx għalihom. Din l-importazzjoni ta’ ħaddiema baqgħet għaddejja u ma tawx każ tat-twissijiet li kien jagħmel il-Kap tal-Oppożizzjoni. Għadda ż-żmien u l-istess Ministru, Clyde Caruana, kellu jammetti li dik il-politika ta’ importazzjoni ta’ ħaddiema ma baqgħetx tagħmel sens għax ħolqot ħafna problemi fil-pajjiż.

Imma l-Blue Heroes ma ridux jappoġjaw lil Adrian Delia fuq din. Minflok kienu jgħidu li Adrian Delia razzist. Issa għandna iżjed minn 50,000 barrani minn barra l-Unjoni Ewropea u ma nafux x’se nagħmlu bihom. U għal darb’oħra Adrian Delia kellu raġun u din id-darba fuq ammissjoni mill-istess ministru tal-gvern.