Robert Abela qed juża l-kawża tal-abort biex jeħles minn Chris Fearne

Minn Edwin Vassallo

Ħasra li l-kwistjoni tal-abort spiċċat ballun politiku. Dak li jrid jingħad li għandna l-gvern tal-Lejber li jrid li t-tarbija fil-ġuf tħallas il-prezz biex Chris Fearne jispiċċa Kummissarju Ewropew akkost ta’ kollox.

Imma dik hija l-politika. Fil-politika ġurnata tibda bil-bnazzi u tispiċċa bil-maltemp bla ma tkun taf kif. Il-Lejber kien qed jgħix fil-bnazzi u kif ħareġ bil-proposta tal-abort, ħalli Fearne ikollu x’juri biex isir Kummissarju Ewropew, spiċċa f’maltempata li għadha sejra. Jekk il-Lejber ma joqgħodx attent ser jkollu jġarrab il-ħsara tar-riżultat ta’ din il-maltempata.

Għalhekk il-PN irid joqgħod ukoll attent u ma jħallix konflitti interni jservu ta’ forċina, kif ġara fil-passat, biex jirkeb fuqhom dan il-gvern korrott. Il-PN ma jistax jħalli l-immaġni tiegħu titkaxkar mill-interessi tal-liberali li ħlief flus ma jarawx.

Wieħed irid jiftrakar li din il-proposta tal-abort ħarġet lill-PN mill-maltempata li kien jinsab fiha. Beda jara l-bnazzi. Il-Lejber ser jipprova juża’ l-logħba tal-imgħoddi biex bil-kwistjoni tal-abort jaqsam lill-Partit Nazzjonalista ħalli jgħatti l-veru mottiv għala jrid din l-emenda. Il-Lejber jaqbillu li l-kwistjoni tal-abort tispiċċa ballun politiku.

Hu fatt magħruf, li Robert Abela jrid jeħles minn Fearne. U fuq dan ser inkompli nikteb. Kien dan is-sit qabel kulħadd li kixef il-pjan ta’ Robert Abela li jibgħat lil Chris Fearne Kummissarju Ewropew wara l-elezzjonijiet Ewropej. Niftakar kont qrajtha fuq dan is-sit ġimgħat jekk mhux xhur qabel l-elezzjoni li għaddiet.

Issa l-elezzjonijiet parlamentari Ewropej jinsabu fil-qrib. Għalhekk il-Lejber għandu bżonn l-abort. Il-qtil tat-tarbija fil-ġuf ser ikollu jagħmel tajjeb biex Fearne ikun jista’ jkun aċċettat bħala Kummissarju għall-Ewropa għas-saħħa bla problemi ta’ xejn.

Robert Abela ma jistax jaffordja jibgħat lil Fearne biex ikun Kummissarju Ewropew bla ma jgħid li kien hu l-uniku ministru li rnexxielu jdaħħal l-abort fl-uniku pajjiż li għadu bla abort fl-Ewropa.

Araw x’kontradizzjoni qed ngħixu f’pajjiżna. Robert Abela irid jgħid lilna, hawn Malta, li din il-liġi mhix abortiva iżda fl-istess waqt, Robert Abela irid li Fearne imur fl-Ewropa u jgħid li dan il-ministru daħħal l-abort f’Malta.

Għalhekk, il-gvern issa qiegħed f’paniku għaliex mhux kulħadd fil-Lejber qiegħed wara din l-emenda. Għalhekk ħadd fil-Partit Nazzjonalista ma għandu bl-ebda mod ikun ta’ għajnuna lil dan il-gvern biex jgħaddi din l-emenda ħalli jidher sabiħ ma’ min hu favur l-abort fl-Ewropa.

Meta Fearne jersaq għall-grilling, ikun jista’ jgħid li daħħal l-abort filwaqt li f’pajjiżna jkun jista’ jgħid li dan mhux abort. Għalhekk qatt ma jista’ jkollok partitarji jew deputati fil-Partit Nazzjonalista li jimbuttaw l-aġenda abortiva ta’ dan il-gvern. Meta jimbuttaw din l-aġenda, din il-kontradizzjoni qatt ma tista’ toħroġ fil-beraħ.

Il-prezz biex Fearne jilħaq kummissarju tal-EU ser ikun qed jitħallas bil-qtil tat-trabi fil-ġuf. Għalhekk nibqa’ ninsisti li ħadd fil-Partit Nazzjonalista ma għandu jkun kompliċi f’dan l-imbrolju politiku li jrid jagħmel Robert Abela ġewwa pajjiżna.

Dan huwa l-mod ta’ kif l-abort spiċċa ballun politiku f’saqajn ta’ politiċi li kull ma jimpurtahom huwa kif jaslu imma mbagħad ma jimpurtahomx mill-mod ta’ kif jistgħu jaslu.