Franco Debono jingħaqad ma’ dawk li kkundannaw l-aġir tal-Ministru tat-Turiżmu

Franco Debono ngħaqad ma’ dawk kollha li qed jikkritikaw lill-Ministru tat-Turiżmu, Clayton Bartolo wara li mar b’ġakketta tat-tracksuit bl-arma tal-Manchester United għal-logħba li l-istess tim tal-Manchester United kien qed jilgħab kontra t-tim Malti ta’ Birkirkara. Bir-raġun, Franco Debono sejjaħ dan kollu bħala mentalita’ kolonjali.

Infakkar li ħafna snin ilu, meta kien indaqq l-innu Ingliż u mhux dak Malti fil-logħba mat-tim tal-Hayduk Split kien qam furur fil-ground tal-futbol tal-Gżira. Dan kien wassal biex Rużar Briffa kiteb dik il-famuża poeżija li nċidentalment kien użaha Franco Debono kontra l-aġir tal-Prim Ministru Gonzi.

Il-poeżija ta’ Rużar Briffa jisimha Jum ir-Rebħ. Illum jaqbel li wieħed ifakkarilu lil Clayton Bartolo:

JUM ir-REBĦ ta’ Rużar Briffa (1906-1963)

U l-Kotra qamet f’daqqa – u għajtet: “Jien Maltija!

Miskin min ikasbarni, – miskin min jidħak bija!”

U l-Kotra għanniet f’daqqa – u semmgħet ma’ l-irjieħ

L-Innu ta’ Malta tagħna, – u l-leħen kien rebbieħ.

Fuq ngħas l-imgħoddi ġwejjef, – in-ngħas ta’ l-Apatija,

X’ħin ruħna kienet rieqda – ġo sodda barranija; –

U l-ombra ta’ Vassalli – qamet minn qiegħ il-qabar,

U għajtet: “Issa fl-aħħar – jiena se nsib is-sabar.”

Illum għandna l-istess aġir minn ministru tal-gvern ta’ Robert Abela li għandu ruħu rieqda f’sodda barranija.