“Din kwistjoni li issa tmur oltre l-abort – din kwistjoni jekk il-kostituzzjoni tagħna għadhiex tiswa ħarja jew le”- John Spiteri Gingell.

Qed inġib post li tella’ John Spiteri Gingell fuq il-Facebook page tiegħu biex juri li d-dħul tal-abort f’Malta jmur kontra l-Kostituzzjoni ta’ pajjiżna. Hu post interessanti ħafna li jitkellem kif il-kostituzzjoni ta’ pajjiżna spiċċat tiġi abbużata u ħafna minn dawk li jriduha ta’ kostituzzjonalisti huma b’ħalqhom magħluq.

Ħadd ma jista’ jkollu mandat biex idaħħal l-abort f’Malta- Ħadd!!! Għax tali mandat imur kontra l-kostituzzjoni ta’ pajjiżna. Għalhekk lanqas li kieku xi partit wiegħdu fil-manifest elettorali ma jkun jiswa aħseb u ara jekk dan m’għamlux. L-aktar li partit jista’ jwiegħed huwa li jemenda l-kostituzzjoni (bħalma għamlu ġewwa l-Irlanda) sabiex titneħħa l-protezzjoni tal-ħajja minnha f’ċerti każijiet.

Minkejja li l-kostituzzjoni ta’ Malta ma tgħidx meta tibda l-ħajja, hija ovja li tassumi li tibda mill-konċepiment. Tant hu hekk li għandna diversi ligijiet li juru dan b’mod ċar mhux lanqas dik imsejħa ’embryo protection act’. Il-Kostituzzjoni tagħmel erba’ eċċezzjonijiet fejn wieħed jista’ jitqies li jitlef din il-protezzjoni tal-ħajja (aqrawha – suppost tafuha – huwa l-aktar dokument importanti f’pajjiżna) – u dik għar-raġunijiet tas-‘saħħa mentali’ tal-omm MHIX waħda minnhom. Għalhekk il-President din il-liġi għandu jirrifjuta li jiffirmaha – jekk verament huwa l-gwardjan tal-kostituzzjoni kif ħalef li jkun u jibgħatha fil-qrati kostituzzjonali – għandu dover li jagħmel dan mhux li jirreżenja kif IRIDUH JAGĦMEL ħalli minfloku jaħtru xi aġent pupazz li jiġi jaqa u jqum mill-kostituzzjoni u jiffirma f’ħakka t’għajn.

Din kwistjoni li issa tmur oltre l-abort – din kwistjoni jekk il-kostituzzjoni tagħna għadhiex tiswa ħarja jew le. Jekk il-president ma jieħux dan il-pass u jagħżel li jirreżenja, għandu jkun allura d-dover tal-poplu, jekk jirrispetta lilu nnifsu, li jiftaħ tali kawża sabiex jipproteġi l-kostituzzjoni tiegħu. Hija irrelevanti ukoll jekk dan il-qtil intenzjonali għall-kwalunkwe ċirkustanza oħra minn dawk definiti fil-kostituzzjoni jekk il-gvern jridx issejjaħlu abort jew le – jibqa’ qtil intenzjonali u l-qtil qed isir għar-raġunijiet mhux defeniti fil-kostituzzjoni. Għalhekk nerġa’ ninsisti li ħadd ma jista jieħu l-ħajja ta’ ħadd ħlief għar-raġunijiet imsemmija fil-kostituzzjoni. Biex tibdel il-kostituzzjoni il-gvern ikollu bżonn jew 2/3 tal-vot fil-parlament – jew jagħmel referendum – m’għandux triq oħra – u jaf li m’għandux in-numri fiż-żewg xenarji u huwa għalhekk qed jipprova jinganna f’kampanja ta’ gideb sfaċċat.

Din mhix kwistjoni ta’ politika partiġġjana – povru, injurant u tassew miskin min jirraġuna hekk – din hija kwistjoni fuq kollox jekk nirrispettawx il-kostituzzjoni tagħna jew le. U jekk le – mela ejjew nieqfu nippretendu li aħna Repubblika – ejjew nieqfu nippretendu li hemm xi forma ta’ limiti ta’ x’jista’ jagħmel il-gvern hu min hu fil-poter – ejjew naċċettaw il-fatt li jista’ jagħmel li jrid bina mingħajr il-kunsens tagħna. U skużawni – m’għandix rispett aktar lejn min irid jibqa’ sieket – nirrispetta aktar lil min ma jaqbilx miegħi iżda almenu ma jiddejjaqx juri x’jaħseb. Min ser jagħzel li jibqa’ sieket ikun ħaqqu fuq li ħaqqu meta fl-aħħar ineżżgħu lilu ukoll minn kull dritt għax il-kodard ma jixraqlu xejn aħjar. Tkellmu issa jew ibqgħu hemm imsieken b’fommkom magħluq – għax tkunu tliftu d-dritt saħansitra biex tgergru meta tasal tagħkom kemm quddiem il-bniedem, aħseb u ara, f’dan il-każ partikolari quddiem Alla.

Għalhekk kwalunkwe diskors dwar referendum abrogattiv f’każ li tgħaddi l-liġi kif qed jipproponu xi wħud li huma kontra l-abort huwa fil-fehma tiegħi primatur – m’għandekx għalfejn tabroga liġi li hija kontra l-kostituzzjoni – anzi b’dan l-argument tkun qed tagħti x’tifhem li dawn l-emendi huma kostituzzjonali mentri għandha tkun ovja f’pajjiż mifqugħ bl-avukati li mhix.

Dawn l-emendi apparti li huma anti-umani, jmorru wkoll kontra l-kostituzzjoni.